1 Самоилова 19:1-24 MKDB2006 - Bible AI

¹ⓞСаул му говореше на синот свој Јонатан и на сите слуги свои да го убијат Давид. Но Сауловиот син Јо­натан многу го сакаше Давид.

²Јонатан му кажа на Давид и рече: „Татко ми Саул сака да те убие. Затоа пази се утре. Сокриј се и биди на тајно место.

³ⓟЈас, пак, ќе излезам и ќе застанам до татко ми на нивата, каде што ќе бидеш ти, и ќе му позборувам на татко ми за тебе; што ќе разберам, ќе ти сооп­штам.“

⁴ⓠЈонатан му говореше на татко си Саул добро за Давид, велејќи му: „Да не греши царот против својот слуга Давид, зашто тој во ништо не згрешил против тебе, и делата негови се многу корисни за тебе.

⁵ⓡТој ја изложи душата своја на опасност за да го порази Филистеецот; и Господ изврши големо спасение за сиот Израел; ти го виде тоа и се радуваше; зашто сега сакаш да згрешиш против невина крв и да го убиеш Давид без причина?“

⁶И Саул го послуша гласот на Јонатан, и се заколна Саул: „Се колнам во Господ! Давид нема да умре.“

⁷Тогаш Јонатан го повика Давид; му ги соопшти Јонатан сите тие зборови и го доведе Јонатан Давид кај Саул, и тој беше кај него, како и порано.

⁸Почна пак војна, и излезе Давид, пак се биеше против Филистејците, и им нанесе голем пораз, и тие бегаа од него.

⁹ⓢИ лош дух од Бога го нападна Саул, и тој седеше дома со копје во раката, а Давид свиреше со рака по струните.

¹⁰Саул сакаше да го прикове Давид со копјето за ѕидот, но Давид отскокна од Саул, и копјето се забоде во ѕидот; а Давид избега и се спаси таа ноќ.

¹¹И испрати Саул слуги во куќата на Давид да го пречекаат и да го убијат до изутрината. Тогаш му рече на Давид жена му Михала: „Ако не ја спасиш душата своја оваа ноќ, утре ќе бидеш убиен.“

¹²ⓣТогаш Михала го спушти Давид низ прозорецот, и тој отиде, избега и се спаси.

¹³ⓤА Михала зеде една статуа, ја стави во леглото, а на перницата стави козја кожа, и ја покри со облека.

¹⁴ⓥИ Саул испрати слуги да го фатат Давид; но Михала рече: „Болен е.“

¹⁵А Саул испрати слуги да го видат Давид, велејќи: „Донесете ми го на легло за да го убијам.“

¹⁶Дојдоа слугите, и ете, во леглото статуа, а на перницата козја кожа.

¹⁷Тогаш Саул ѝ рече на Михала: „Зошто ме излага така и дозволи мојот непријател да избега?“ А Михала му одговори на Саул: „Тој ми рече: пушти ме, инаку ќе те убијам.“

¹⁸ⓦДавид избега, се спаси; дојде кај Са­моил во Рама и му раскажа сѐ што прави со него Саул. И тргна со Самоил, и се запреа во Нават, во близина на Рама.

¹⁹И му јавија на Саул, велејќи: „Ете, Давид е во Нават, кај Рама.“

²⁰ⓧТогаш Саул испрати слуги да го фатат Давид, и кога тие видоа група пророци, кои пророкуваа, и Самоил, нивниот началник, духот Божји слезе врз Сауловите слуги, и тие почнаа да пророкуваат.

²¹Му јавија за тоа на Саул, и тој испрати други слуги, но и тие почнаа да пророкуваат. Потоа Саул испрати и трети слуги, но и тие почнаа да пророкуваат.

²²Саул отиде сам во Рама, и дојде до големиот бунар во Сеху, и запраша, велејќи: „Каде се Самоил и Давид?“ И рекоа: „Ете, во Нават, кај Рама.“

²³Тој отиде таму во Нават, во близина на Рама, и врз него слезе Духот Божји, и тој одеше и пророкуваше, додека стигна до Нават, кај Рама.

²⁴ⓨЈа соблече и тој облеката своја, и пророкуваше пред Самоил, и целиот тој ден и целата таа ноќ лежеше необле­чен; затоа велат: „Зарем и Саул станал пророк?“