1 Царевите 14:1-31 MKDB2006 - Bible AI

¹Во она време се разболе Јеровоамовиот син Авија.

²ⓠИ Јеровоам ѝ рече на жена си: „Ста­ни и преоблечи се за да не те познаат дека си Јеровоамова жена, па оди во Силом. Таму е пророкот Ахија што ми претскажа дека ќе бидам цар на овој народ.

³Земи со себе десет леба, питки и грне мед, па оди кај него; тој ќе ти каже што ќе стане со детето.“

⁴Јеровоамовата жена така направи: стана, отиде во Силом и влезе во куќата на Ахија. А Ахија веќе не можеше да гледа, зашто очите му беа станале не­подвижни од старост.

⁵Тогаш Господ му рече на Ахија: „Ете, Јеровоамовата жена доаѓа да те праша за својот син, бидејќи е болен; кажи ѝ така и така; ќе ти дојде препра­вена како да е некоја друга.“

⁶Ахија штом го слушна шумот од нејзините чекори, кога влезе низ вратата, рече: „Влези, Јеровоамова жено; зо­што требаше да се преправаш во друга жена? Јас сум пратен да ти кажам зло.

⁷Оди и кажи му на Јеровоам: вака вели Господ, Бог Израелов: ‚Јас те из­дигнав од средината на простиот народ и те поставив за водач на Мојот народ Израел,

⁸го одзедов царството од Давидовиот дом и ти го дадов тебе; но ти не си таков, каков што беше Мојот слуга Давид, кој ги пазеше заповедите Мои и кој Ме следеше од сѐ срце, вршејќи го само она што е угодно пред очите Мои;

⁹ти постапуваш полошо од сите што беа пред тебе, и отиде, та си направи други богови и идоли за да Ме дразниш, а Мене ме отфрли зад грбот свој,

¹⁰ⓡзатоа Јас ќе испратам зло врз Јеро­воамовиот дом и ќе го истребам кај Јеровоам сѐ што е машко, и оној што е роб и оној што е слободен во Израел, и ќе го исчистам Јеровоамовиот дом сосема, како што чистат ѓубре;

¹¹ⓢкој од Јеровоамовиот дом ќе умре во град, него кучињата ќе го изедат, а кој ќе умре во полето, него птиците небески ќе го исколваат‘; така вели Господ.

¹²Стани, па оди во домот свој; и штом ногата твоја ќе стапне во градот, детето ќе умре;

¹³сите Израелци ќе го оплачат и ќе го погребат, зашто само тоа од Јеро­воамовиот дом ќе влезе во гроб, бидејќи само во него, од целиот Јеровоамов дом, се најде нешто добро пред Господ, Израеловиот Бог.

¹⁴И Господ ќе Си издигне над Израел цар, кој ќе го истреби Јеровоамовиот дом во оној ден; и што? — еве денес!

¹⁵И Господ ќе го порази Израел, и тој ќе биде како трска, која се лула во водата, и ќе ги исфрли Израелците од оваа убава земја што им ја даде на татковците нивни, и ќе ги расфрли зад Реката, поради тоа што си направија идоли и Го гневеа Господа;

¹⁶и ќе го напушти Господ Израел поради гревовите на Јеровоам што сам си ги направи, и со кои го наведе во грев Израел.“

¹⁷Јеровоамовата жена стана, тргна и дојде во Тирца; и штом стапи на куќ­ниот праг, детето умре.

¹⁸И сите Израелци го погребаа и оплакаа, според словото на Господ, што Тој го изрече преку Својот слуга, пророкот Ахија.

¹⁹Другите дела на Јеровоам — како војувал и како царувал — се опишани во летописите на израелските цареви.

²⁰Времето, во кое царуваше Јерово­ам, беше дваесет и две години; и почина кај татковците свои, а место него се зацари синот негов Надав.

²¹ⓣСоломоновиот син Ровоам царуваше во Јудеја. Ровоам беше на четири­есет и една година кога стана цар, и царуваше седумнаесет години во Еру­салим, во градот што Господ го избра од сите Израелови племиња за да ос­тане засекогаш таму името Негово. Името на мајка му беше Ноема, Амон­ка.

²²ⓤИ Јуда го вршеше она што не беше угодно пред очите на Господ, и Јуди­ните синови го разгневуваа повеќе, отколку татковците нивни со гревовите свои што беа ги правеле.

²³ⓥТие си беа издигнале идоли и идолски светилишта на секој висок рид и под секое сенчесто дрво.

²⁴ⓦВо таа земја имаше и блудници што ги вршеа сите гнасотии на оние народи, кои Господ ги беше прогонил од лицето на Израеловите синови.

²⁵ⓧНа петтата година од Ровоамовото царување египетскиот цар Шишак се крена против Ерусалим,

²⁶ⓨи ги ограби ризниците на домот Господов и ризниците на царскиот дом. Сѐ зеде; ги зеде и сите златни штитови што ги беше направил Соломон.

²⁷И наместо нив царот Ровоам на­прави бронзени штитови и ги даде во рацете на старешините и телохра­нителите, кои го чуваа влезот во царски­от дом.

²⁸Кога царот одеше во домот Гос­подов, телохранителите ги носеа, а по­тоа ги враќаа во стражарницата.

²⁹Другото за Ровоам и за сѐ што вр­шел, е опишано во летописите на јудејските цареви.

³⁰Меѓу Ровоам и Јеровоам имаше вој­на за сето време додека беа живи.

³¹Ровоам почина кај татковците свои и беше погребан кај нив во Давидовиот град. Името на мајка му беше Ноема, Амонка. Наместо него стана цар синот негов Авијам.