1 Царевите 5:1-32 MKDB2006 - Bible AI

¹ⓘСоломон владееше со сите царства од реката Еуфрат до филистејската земја и до границата на Египет. Тие принесуваа дарови и му служеа на Со­ломон во сите дни на неговиот живот.

²Потребите од храна за Соломон и за неговиот персонал за еден ден беа: три­есет кори пченично брашно и шеесет кори друго брашно,

³десет одбрани телиња и дваесет згоени волови и сто овци, а освен елени и срни, и диви кози и птици;

⁴зашто тој господареше над целата земја од оваа страна на Еуфрат, од Тифса до Газа, над сите цареви од оваа страна на реката, и имаше мир со сите околни земји.

⁵ⓙИ живееја Јудејците и Израел спо­кој­но, секој под лозата своја и под смоквата своја, од Дан до Вирсавија, преку сите Соломонови дни.

⁶Соломон имаше четириесет илјади коњи за коли и дванаесет илјади за коњицата.

⁷И управниците му доставуваа на цар Соломон сѐ што требаше за царската трпеза, секој во својот месец, и не доз­волуваа да има недостиг од нешто.

⁸Исто така и јачмен, и слама за коњи­те и за маските доставуваше секој на­времено во местото, каде што се наоѓа­ше царот.

⁹ⓚА Бог му даде на Соломон мудрост, многу голем разум и широчина на срцето како песокот на морскиот брег.

¹⁰И Соломоновата мудрост беше поголема од мудроста на сите синови на Исток, од сета мудрост на Египќаните.

¹¹ⓛТој беше помудар од сите луѓе, помудар и од Етан Езрахиецот и од Хе­ман, и од Калкол и од Дарда, синови на Махол, и името негово се славеше по сите околни народи.

¹²ⓜТој изрече три илјади мудри изреки, а песните негови беа илјада и пет;

¹³тој говореше и за дрвјата, од кедар што е во Ливан, до исопот што никнува по карпите; тој говореше и за животните, за птиците, за влекачите и за рибите.

¹⁴И од сите народи доаѓаа да ја чујат Соломоновата мудрост, и сите земни цареви што беа слушнале за неговата мудрост.

¹⁵ⓝХирам, тирскиот цар, ги испрати слугите свои кај Соломон, откако слу­ш­на дека го помазале за цар на местото на татко му, зашто Хирам беше Дави­дов пријател во текот на целиот негов живот.

¹⁶А и Соломон испрати да му кажат на Хирам:

¹⁷„Ти знаеш дека татко ми Давид не можеше да изгради дом за името на Господ, својот Бог, поради војните со околните народи, додека Господ не ги покори под нозете негови;

¹⁸но сега Господ, мојот Бог, ми даде спокојство од сите страни: нема против­ник и нема веќе стапици.

¹⁹ⓞИ, ете, јас имам намера да изградам дом за името на Господ, мојот Бог, како што му беше рекол Господ на татко ми Давид, велејќи: ‚Твојот син, кого што ќе го поставам на твојот престол место тебе, ќе изгради дом за Моето име.‘

²⁰ⓟⓠЗатоа, заповедај да ми насечат кед­рово дрво од Ливан; и ете, моите слуги ќе бидат заедно со твоите слуги, како ти што ќе определиш, зашто знаеш дека кај нас нема луѓе, кои умеат да сечат дрва така, како Сидонците.“

²¹Кога Хирам ги слушна зборовите од Соломон, многу се зарадува и рече: „Благословен нека е денес Господ, Кој му даде на Давид мудар син за да управува со тој многуброен народ!“

²²И Хирам испрати кај Соломон да кажат: „Го сослушав тоа, за кое ти беше испратил порака до мене; ќе ја исполнам твојата желба за кедровото дрво и кипарисовото:

²³слугите мои ќе ги довлечкаат од Ливан до морето, и на сплавови ќе ги дотераат по море до местото што ќе ми го определиш; таму ќе ги растоварам, и ти ќе ги земеш; но и ти исполни ја желбата моја да доставуваш храна за мојот дом.“

²⁴И Хирам му даваше на Соломон кедрово дрво и кипарисово дрво, според желбата негова.

²⁵А Соломон му даваше на Хирам дваесет илјади кори пченица за исхрана на неговиот дом и дваесет кори цедено маслиново масло, — толку Соломон му даваше на Хирам секоја година.

²⁶Господ му даде на Соломон муд­рост, како што му беше ветил. И меѓу Хирам и Соломон имаше мир, а склу­чија и сојуз меѓу себе.

²⁷ⓡЦар Соломон наложи принудна работа во сиот Израел, а бројот на ма­жите што работеа принудно изнесуваше триесет илјади.

²⁸Тој ги испраќаше во Ливан, по де­сет илјади на месец, на смени; еден месец престојуваа во Ливан, а два месеци — по домовите свои. Хадорам, пак, беше нивни управник.

²⁹Соломон имаше уште седумдесет илјади мажи што го пренесуваа това­рот, и осумдесет илјади каменоделци во планините,

³⁰освен трите илјади и триста настој­ници што Соломон ги беше поставил над работата, да го надгледуваат народот што ги извршуваше работите.

³¹И царот заповеда да донесуваат големи камења за основата на храмот, камења делкани.

³²Ги делкаа, пак, Соломонови работници и Хирамови работници и Гевлиј­ци, и подготвуваа дрвја и камења за градење на храмот три години.