UMatewu 24:1-50 NDEOCB2024 - Bible AI

¹UJesu wathi esuka ethempelini esehamba abafundi bakhe beza kuye bathi kake ananzelele izakhiwo zalo.

²Wathi, “Liyazibona na zonke lezizinto? Ngilitshela iqiniso ukuthi akulalitshe lapha elizasala liphezu kwelinye; wonke azabhidlizwa.”*

³Kwathi uJesu ehlezi eNtabeni yama-Oliva abafundi bakhe beza kuye ngasese bathi, “Sitshele, kuzakwenzakala nini lokhu na, njalo kuzakuba lesibonakaliso bani sokuza kwakho lokuphela kwesikhathi na?”

⁴UJesu waphendula wathi, “Qaphelani ukuze lingakhohliswa muntu.*

⁵Ngoba abanengi bazakuza ngebizo lami besithi, ‘NginguKhristu,’ bakhohlise abanengi.*

⁶Lizakuzwa ngezimpi lamahungahunga azo, kodwa lingaze lethuka. Izinto ezinjalo zizakwenzeka, kodwa ukucina kulokhu kuseza.*

⁷Isizwe sizavukela isizwe, lombuso uvukele umbuso. Kuzakuba lendlala lokuzamazama komhlaba ezindaweni ezitshiyeneyo.*

⁸Konke lokhu kuyikuqalisa kobuhlungu bokuhelelwa.*

⁹Lapho lizanikelwa ukuba lihlutshwe njalo libulawe, futhi lizazondwa yizizwe zonke ngenxa yami.*

¹⁰Ngalesosikhathi abanengi bazadela ukukholwa banikelane njalo bazondane,*

¹¹kuvele abaphrofethi bamanga abanengi abazakhohlisa abantu abanengi.*

¹²Ngenxa yokwanda kobubi, uthando lwabanengi luzaphola,*

¹³kodwa lowo oma aqine kuze kube sekupheleni uzasindiswa.*

¹⁴Njalo lelivangeli lombuso lizatshunyayelwa kuwo wonke umhlaba njengobufakazi kuzozonke izizwe, besekufika ukuphela.*

¹⁵Nxa libona kumi endaweni engcwele ‘amanyala aletha incithakalo,’*+ 24.15 UDanyeli 9.27; 11.31; 12.11*okwakhulunywa ngomphrofethi uDanyeli, ofundayo kezwisise.*

¹⁶Lapho-ke akuthi labo abaseJudiya babalekele ezintabeni.*

¹⁷Akungabikhona osophahleni lwendlu ozakwehla phansi ukuyathatha ulutho endlini.*

¹⁸Lowo osemasimini kangabuyeli ngekhaya ukuyathatha ijazi lakhe.*

¹⁹Yeka ubulukhuni obuzakuba khona ngalezonsuku kwabesifazane abakhulelweyo labangabadlezane!*

²⁰Khulekelani ukuba ukuphaphatheka kwenu kungabi sebusika loba ngeSabatha.*

²¹Ngoba ngalesosikhathi kuzakuba lokuhlupheka okukhulu, okungazange kube khona kulokhu kwadabuka umhlaba kuze kube manje, njalo kakusoze kube khona futhi.*

²²Aluba lezinsuku bezingaphungulwanga, kakho obezaphepha, kodwa ngenxa yabakhethiweyo lezinsuku zizaphungulwa.*

²³Nxa ngalesosikhathi omunye esithi kini, ‘Khangela, nangu uKhristu!’ loba ‘Ulaphaya!’ lingakukholwa lokho.*

²⁴Ngoba oKhristu bamanga labaphrofethi bamanga bazavela benze izibonakaliso lezimangaliso ezinkulu ukukhohlisa kanye labakhethiweyo, nxa lokho kungenzeka.*

²⁵Zwanini, sengihle ngalitshela mandulo kwesikhathi.*

²⁶Ngakho-ke, nxa umuntu elitshela esithi, ‘Nanguyana, laphayana egangeni,’ lingayi khona loba athi, ‘Nangu lapha ezindlini ezingaphakathi,’ lingaze lakukholwa lokho.*

²⁷Ngoba njengombane osuka empumalanga uhle ubonakale lasentshonalanga, kuzakuba njalo ukufika kweNdodana yoMuntu.*

²⁸Lapho okulesidumbu khona kulapho amanqe abuthana khona.*

²⁹Masinyane ngemva kokuhlupheka kwalezonsuku,*

³⁰Kulesosikhathi isibonakaliso seNdodana yoMuntu sizavela emkhathini, kuthi zonke izizwe zomhlaba zilile. Zizabona iNdodana yoMuntu isiza ngamayezi esibhakabhakeni, ilamandla lobukhosi obukhulu.*

³¹Njalo izathumela izingilosi zayo zitshaya icilongo ngomsindo omkhulu, beseziqoqa abakhethiweyo bayo emagumbini womane omhlaba, kusukela ngapha kwamazulu kusiya ngale kwawo.*

³²Manje-ke, fundani lesisifundo esihlahleni somkhiwa: Amahlumela aso angaqalisa ukuba buthakathaka lamahlamvu aso ahlume, lihle lazi ukuthi ihlobo selisondele.*

³³Kanjalo-ke, nxa lingabona zonke lezizinto, lazi ukuthi sekusondele, khonapho emnyango.*

³⁴Ngilitshela iqiniso, lesisizukulwane kasiyikudlula zize zenzakale zonke lezizinto.*

³⁵Izulu lomhlaba kuzedlula, kodwa amazwi ami kawayikwedlula lanini.”*

³⁶“Kodwa kakho olwaziyo lolosuku lehola, loba izingilosi zasezulwini, kumbe iNdodana, kodwa uBaba kuphela.*

³⁷Njengoba kwakunjalo ensukwini zikaNowa, kuzakuba njalo ekufikeni kweNdodana yoMuntu.*

³⁸Ngoba ensukwini ezandulela uzamcolo, abantu babesidla, benatha, bethatha njalo besenda, kwaze kwafika usuku uNowa angena ngalo emkhunjini;*

³⁹futhi babengazi lutho ngalokho okwakuzakwenzeka uzamcolo waze wafika wabatshabalalisa. Kuzakuba njalo ekufikeni kweNdodana yoMuntu.*

⁴⁰Kuzakuthi amadoda emabili esensimini, eyodwa izathathwa, eyinye isale.*

⁴¹Kuzakuthi abesifazane bebabili bechola ngembokodo, oyedwa uzathathwa omunye asale.*

⁴²Ngakho, lindani ngoba kalikwazi ukuthi iNkosi yenu izafika ngaluphi usuku.*

⁴³Kodwa zwisisani lokhu: Kube umninindlu wayekwazile ukuthi isela lizafika ngasiphi isikhathi sobusuku ngabe walinda kaze avumela ukuthi indlu yakhe igqekezwe.*

⁴⁴Ngakho lani hlalani lilindile, ngoba iNdodana yoMuntu izafika ngesikhathi leso elizabe lingayikhumbuleli sona.*

⁴⁵Ngubani kambe oyinceku ethembekileyo lehlakaniphileyo umninimuzi ayibeke esikhundleni sokukhangela izisebenzi zalapha ekhaya ukuthi azinike ukudla kwazo ngesikhathi esifaneleyo?*

⁴⁶Kuzakuba kuhle kuleyo nceku inkosi ezayifica isenza njalo ekuphendukeni kwayo.*

⁴⁷Ngilitshela iqiniso, izakumbeka ukuthi aphathe yonke impahla yayo.*

⁴⁸Kodwa cabanga mhlawumbe inceku leyo ikhohlakele njalo ingazitshela ithi, ‘Inkosi yami isesekhatshana ukubuya,’*

⁴⁹ibisiqalisa ukutshaya ezinye izinceku njalo lokudla inatha lezidakwa.*

⁵⁰Inkosi yaleyonceku izabuya ngosuku engacatshangelwa khona langesikhathi inceku engasaziyo.*