1Yase ingitshengisa uJoshuwa umphristi omkhulu emi phambi kwengilosi kaThixo*, loSathane emi kwesokunene sakhe ephikisana laye.
2UThixo* wathi kuSathane, “UThixo* uyakukhuza, Sathane! UThixo* oyikhethileyo iJerusalema, uyakukhuza! Umuntu lo kasisikhuni esihwatshwe sibhebha na?”
3UJoshuwa wema phambi kwengilosi egqoke ezingcolileyo.
4Ingilosi yasisithi kulabo ababemi phambi kwayo, “Mkhululeni izigqoko lezi ezingcolileyo.”
5Ngasengisithi, “Mthwaliseni iqhiye ehlanzekileyo ekhanda lakhe.” Basebemthwalisa iqhiye ehlanzekileyo ekhanda, bamgqokisa njalo, ingilosi kaThixo* ilokhu imi khonapho.
6Ingilosi kaThixo* yasimupha umlayo lo uJoshuwa, yathi:
7“Nanku akutshoyo uThixo* uSomandla: ‘Nxa uzahamba ngezindlela zami ugcine izimiso zami, lapho-ke uzabusa indlu yami, uwaphathe lamaguma ami, njalo mina ngizakupha indawo phakathi kwalaba abemiyo lapha.
8Lalela, wena mphristi omkhulu Joshuwa, kanye labakhula bakho abahlezi phambi kwakho, abangamadoda ayisitshengiselo sezinto ezizayo: Ngizaletha inceku yami iHlumela.
9Uyabona, ilitshe engilimise phambi kukaJoshuwa! Kulamehlo ayisikhombisa phezu kwelitshe lilinye, njalo ngizagubha umbhalo kulo,’ kutsho uThixo* uSomandla, ‘njalo ngizasisusa isono salelilizwe ngelanga elilodwa zwi.