भजनसंग्रह 56:1-13 NNRV2012 - Bible AI

1सङ्गीत-निर्देशकको निम्‍ति दाऊदको मिक्‍ताम [1] हे परमेश्‍वर, ममाथि कृपा गर्नुहोस्‌, ⓜ किनकि मानिसहरूले मेरो अति खेदो गर्छन्‌। दिनभरि तिनीहरूले ममाथि आक्रमण गर्छन्‌।

2मेरा निन्‍दकहरू दिनभरि नै मलाई खेदो गर्छन्‌, धेरै जना अहङ्कारसाथ ममाथि आक्रमण गर्दछन्‌।

3जुन बेला मलाई डर लाग्‍छ, म तपाईंमा भरोसा राख्‍नेछु।

4परमेश्‍वरमा, जसका वचनको म प्रशंसा गर्दछु, परमेश्‍वरमा भरोसा राख्‍छु, म डराउनेछैनँ, मरणशील मानिसले मलाई के गर्न सक्‍छ र?

5दिनभरि तिनीहरूले मेरा कुराहरूको उल्‍टो अर्थ लाउँछन्‌। तिनीहरूले सधैँ मेरो हानिको लागि षड्‌यन्‍त्र रच्‍छन्‌।

6तिनीहरू मेरो प्राण लिनलाई मेरो विरुद्ध षड्‌यन्‍त्र रच्‍छन्‌, र मलाई मार्न भनी ढुकिबस्‍छन्‌।

7हे परमेश्‍वर, तिनीहरूका अपराधको दण्‍ड तिनीहरूलाई दिनुहोस्‌, तपाईंको क्रोधमा जाति-जातिहरूलाई ढालिदिनुहोस्‌।

8मेरो विलापको लेखा राख्‍नुहोस्‌। मेरो आँसु तपाईंको फिरिस्‍तमा राखिदिनुहोस्‌। के ती तपाईंको पुस्‍तकमा लेखिएका छैनन्‌ र?

9जब सहायताको निम्‍ति म पुकारा गर्छु, मेरा शत्रुहरू पीठ फर्काएर भाग्‍नेछन्‌। यसबाट यो म जान्‍नेछु कि परमेश्‍वर मेरो पक्षमा हुनुहुन्‍छ।

10परमेश्‍वरमा, जसका वचनको म प्रशंसा गर्दछु, परमप्रभुमा, जसका वचनको म प्रशंसा गर्दछु,

11परमेश्‍वरमा, भरोसा गर्दछु, म डराउनेछैनँ। मानिसले मलाई के गर्न सक्‍छ र?

12हे परमेश्‍वर, तपाईंसित मेरा भाकल छन्‌, म तपाईंमा मेरो धन्‍यवाद बलि चढ़ाउनेछु।

13किनकि तपाईंले मेरो प्राणलाई मृत्‍युबाट छुटाउनुभएको छ, र मेरा गोडालाई ठेस लाग्‍नुदेखि बचाइदिनुभएको छ, कि म परमेश्‍वरको सम्‍मुख जीवनको ज्‍योतिमा हिँडूँ।

>