Masalimo 135:1-21 NYCCL2016 - Bible AI

¹Tamandani Yehova. Tamandani dzina la Yehova; mutamandeni, inu atumiki a Yehova,

²amene mumatumikira mʼnyumba ya Yehova, mʼmabwalo a nyumba ya Mulungu wathu.

²

³Tamandani Yehova, pakuti Yehova ndi wabwino; imbani nyimbo zotamanda dzina lake, pakuti nʼkokoma kutero,

⁴Pakuti Yehova wasankha Yakobo kuti akhale wake, Israeli kuti akhale chuma chake chapamtima.

⁴

⁵Ndikudziwa kuti Yehova ndi wamkulu, kuti Ambuye athu ndi wamkulu kuposa milungu yonse.

⁶Yehova amachita chilichonse chimene chimamukomera, kumwamba ndi dziko lapansi, ku nyanja zazikulu ndi ku malo ake onse akuya.

⁷Iye amatulutsa mitambo kuchokera ku malekezero a dziko lapansi, amatumiza zingʼaningʼani pamodzi ndi mvula ndipo amatulutsa mphepo ku malo ake osungiramo.

⁷

⁸Anakantha ana oyamba kubadwa a Igupto, ana oyamba kubadwa a anthu ndi nyama.

⁹Iye anatumiza zizindikiro zozizwitsa ndi zodabwitsa pakati pako, iwe Igupto, kutsutsana ndi Farao pamodzi ndi atumiki ake onse.

¹⁰Iye anakantha mitundu yambiri ya anthu ndi kupha mafumu amphamvu:

¹¹Sihoni mfumu ya Aamori, Ogi mfumu ya Basani, ndi maufumu onse a ku Kanaani;

¹²ndipo anapereka dziko lawo ngati cholowa, cholowa cha anthu ake Aisraeli.

¹²

¹³Dzina lanu, Inu Yehova, ndi losatha mpaka muyaya, mbiri yanu, Inu Yehova, idziwika mibado yonse.

¹⁴Pakuti Yehova adzaonetsa kuti anthu ake ngosalakwa, ndipo adzachitira chifundo atumiki ake.

¹⁴

¹⁵Mafano a mitundu ya anthu ndi siliva ndi golide, opangidwa ndi manja a anthu.

¹⁶Pakamwa ali napo koma sayankhula maso ali nawo, koma sapenya;

¹⁷makutu ali nawo, koma sakumva ndipo mʼkamwa mwawo mulibe mpweya uliwonse.

¹⁸Iwo amene amapanga mafanowo adzakhala ngati mafanowo, chimodzimodzinso iwo amene amadalira mafanowo.

¹⁸

¹⁹Inu nyumba ya Israeli, tamandani Yehova; inu nyumba ya Aaroni, tamandani Yehova;

²⁰Inu nyumba ya Levi, tamandani Yehova; Inu amene mumaopa Iye, tamandani Yehova.

²¹Wodalitsika ndi Yehova kuchokera mʼZiyoni, amene amakhala mu Yerusalemu.

²¹Tamandani Yehova.