Masalimo 75:1-10 NYCCL2016 - Bible AI

¹Kwa mtsogoleri wa mayimbidwe, potsata mayimbidwe a “Musawononge.” Salimo la Asafu. Nyimbo. Tikuthokoza Inu Mulungu, tikuthokoza, pakuti dzina lanu lili pafupi nafe, anthutu amafotokoza za ntchito zanu zodabwitsa.

²Mumati, “Ine ndimayika nthawi yoyenera, ndine amene ndimaweruza mwachilungamo.

³Pamene dziko lapansi ndi anthu ake onse anjenjemera, ndine amene ndimagwiriziza mizati yake molimba.

³Sela

⁴Kwa odzitama ndikuti, ‘Musadzitamenso,’ ndipo kwa oyipa, ‘Musatukulenso nyanga zanu.

⁵Musatukule nyanga zanu motsutsana ndi kumwamba; musayankhule ndi khosi losololoka.’ ”

⁵

⁶Kugamula milandu sikuchokera kummawa kapena kumadzulo kapena ku chipululu.

⁷Koma ndi Mulungu amene amaweruza: Iyeyo amatsitsa wina, nakwezanso wina.

⁸Mʼdzanja la Yehova muli chikho chodzaza ndi vinyo wochita thovu, wosakanizidwa ndi zokometsera; Iye amamutsanulira pansi ndipo onse oyipa a dziko lapansi amamwa ndi senga zake zonse.

⁸

⁹Kunena za ine, ndidzalengeza izi kwamuyaya; ndidzayimba matamando kwa Mulungu wa Yakobo.

¹⁰Ndidzadula nyanga za onse oyipa koma nyanga za olungama zidzakwezedwa.