2 GARA THIMOTEWOS 3:1-17 GAZB1997 - Bible AI

¹Guyyoota gara dhumaatti yeroon sodaachisaan akka dhufu hubadhu*!

²Namoonni warra ofittoo, sassatoota, of-jajoo, afuufamoo, arrabsituuwwan, warra abboota isaanii fi haadhota isaaniif hin abboomamne, galata-hinqabnee, warra wanta qulqullaa'aadhaan morman in ta'u*.

³Warra jaalala of keessaa hin qabne, warra araara hin jaallanne, warra maqaa namaa balleessan, warra of-hinqabne, warra namatti hin madaqne, warra waan gaarii jibban,

⁴warra dabarsanii nama kennan, warra eeggannaa hin qabne, warra of arguu dhabuudhaan of bokoksan, Waaqayyoon jaallachuu caalaa, warra waan isaan gammachiisu jaallatan ta'uuf jiru*.

⁵Akka bakkeedhaan mul'atutti nama Waaqayyoo in fakkaatu, humna isa nama akkasii keessa jiru garuu in ganu; warra akkasii irraa fagaadhu*![13]

⁶Isaan keessaa kaan mana namaa lixanii dubartoota dadhaboo warra cubbuun irra tuulamee, kajeellaa garaa garaatiin asii fi achi oofaman in wallaalchisu*.

⁷Dubartoonni kun yeroo hundumaa in baru; garuu dhugaa beekuu bira ga'uu matumaa hin danda'an.

⁸Akkuma Yaaneesii fi Yaambres, Museedhaan morman, jarreen sammuun isaanii bade, karaa amantii isaanii qoramanii hin ilaalamin kunis akkasuma dhugaadhaan in mormu*.

⁹Garuu akkuma gowwummaan jarreen sana lamaanii irratti beekame, kan isaan kanaas nama hundumaa biratti beekamuuf waan jiruuf, fagoo hin ga'an*.[14]

¹⁰Ammas ati barsiisa koo, amala koo, akeeka jireenya koo, amantii koo, obsaan danda'uu koo, jaalala koo, waanan qabetti cimuu koo caqafteetta.

¹¹Ari'atamuu koo, dhiphachuu koos warra Anxokiyaatti, Iqoniiyumitti, Lisxiraatti ana irra ga'an yaadaan qabdeetta; ari'atamuu attamiin danda'es! Kana hundumaa keessaa immoo gooftaan na oolche*.

¹²Akkasuma karaa Kristos Yesus nama Waaqayyoo ta'ee jiraachuu kan hawwu hundinuu ari'atamuuf jira*.

¹³Namoonni hamoonni, warri ija namaa gowwoomsanis isa gadhee irraa gara isa caalaa gadheetti gad in adeemu; namoota in wallaalchisu ofii isaaniitiis in wallaalchifamu*.[15]

¹⁴Ati garuu isa barsiifamte, cimsitees itti amante sana eenyufa'i irraa akka barte waan beektuuf, isatti qabamii jiraadhu*!

¹⁵Mucummaa keetii jalqabdee caaffata qulqullaa'aa isa Kristos Yesusitti amanuudhaan akka fayyitutti ogummaa siif kennuu danda'u, akka barte in beekta*.

¹⁶Caaffanni qulqullaa'aan hundinuu geggeessaa hafuura Waaqayyootiin caafame; barsiisuuf, balleessaa hubachiisuuf, qajeelchuuf, qajeelummaattis leejjisuudhaaf dhimma in baasa*.

¹⁷Namni Waaqayyoo waa gochuuf kan danda'e, hojii gaarii hundumaafis kan qophaa'e akka ta'u in godha*.[16]