Faaruu Ermiyaas 4:1-22 GAZB1997 - Bible AI

¹Attamitti warqeen gurraacha'ee, warqee qullaa'aan bifa geddarate! Attamittis dhagoonni mana qulqullummaa wal ga'ii karaa gurguddaa hundumaa irratti bitimfaman!

²Ilmaan Xiyoon warri dur akka warqee qullaa'aatti ilaalamaa turan, amma attamitti akka qodaa suphee isa harki namaa hojjete ta'an!

³Waangonni illee ilmaan isaanii harma in hoosisu, sabni koo garuu akka guchii lafa onaa keessa jirtuu gara-jabeeyyii in ta'an*.

⁴Mucaan harma hodhu dheebotee arrabni isaa in goga; ijoollonni buddeena in kadhatu, garuu kan isaaniif kennu hin jiru;

⁵warri dur nyaata ba'eessa nyaachaa turan, amma karaa irratti in gaggabu; warri dur uffata mimiidhagaa uffachaa turan, amma tuullaa kosii keessa in ciisu.

⁶Yakki saba kootii Sodoom ishee cubbuu hojjettee, harki nama tokko illee utuu itti hin bu'in battala tokkotti badde sana irra in caala*.

⁷Gurguddoonni ishee cabbii caalaa qullaa'oo, aannan caalaas adii turan; dhagni isaanii callee gati-jabeessa caalaa diimaa ture, maddiin isaaniis calaqqisaa akka Safiiros ture.[26]

⁸Amma garuu bifni isaanii cilaattii caalaa in gurraacha'e, karaa irratti namni yoo isaan arge iyyuu isaan beekuu hin danda'u; gogaan isaanii shuntuuree lafee isaaniitti in maxxane, akka mukaas in goge;

⁹warra beelaan rukutamanii muka iji isaa nyaatamu illee maasii keessaa dhabanii dhuman irra, warra billaadhaan dhuman wayya;

¹⁰badiisi saba kootti yommuu dhufe dubartoonni gara-laafeyyiin iyyuu mucoolii isaanii harka isaaniitiin affeelanii in nyaatan*.

¹¹Waaqayyo dheekkamsa isaa saba koo irratti gad in dhiise, aarii isaa isa boba'aas isaan irratti in dhangalaase; Xiyoonitti ibidda qabsiisee, hamma hundee isheetiitti ishee in gube*.

¹²Mootonni lafa irraa fi sabni lafa irraa hundinuu, diinonnii fi warri ishee jibban dallaa Yerusaalem keessa lixuu akka danda'an hin amanne;

¹³haa ta'u iyyuu malee, sababii cubbuu raajota isheetii fi yakka luboota isheetii isa isaan dhiiga nama qajeelaa ishee keessatti dhangalaasaniif kun in ta'e*.

¹⁴Amma isaan akka jaamotaa karaa keessa in jooru, dhiiga dhangalaasuudhaan waan xuraa'aniif, namni uffata isaaniitti illee bu'u hin jiru;

¹⁵namoonnis, ?Isin warra xuraa'oo nana, sokkaa! Sokkaa waan tokkotti iyyuu hin bu'inaa!? jedhanii isaanitti in iyyu; yommuu isaan baqatanii sokkan immoo saba lafa irraa keessaa gar-tokko, ?Isaan kun itti fufanii as jiraachuu hin danda'an? isaaniin in jedhu*.[27]

¹⁶Waaqayyo ofii isaatii isaan in tamsaase, deebi'ees isaan arguu hin barbaanne; namoonnis lubootaaf ulfina hin kennine, jaarsoliittis faara hin tolle*.

¹⁷Iji keenya akkasumaan gargaarsa eeggachuutti dadhabe, sabni nuyi abdachaa turres nu oolchuu hin dandeenye*.

¹⁸Isaan gara nuyi itti adeemnu hundumaatti, nu gaadaa waan turaniif, karaadhuma irra iyyuu akka itti adeemnu in dhabne; raawwatamuun keenya waan ga'eef, dhumni bara keenyaa dhi'aateera, guyyoonni keenyas lakkoobsatti galaniiru.

¹⁹Warri nu ari'an joobira qilleensa keessa balali'u caalaa fiigu; isaan tulloota irra nu ari'anii, lafa onaa keessas dhokatanii nu eeggatan*;

²⁰inni Waaqayyo nuuf dibe, inni nuyi, ?Hafuura jireenya keenyaa ti, gaadidduu isaatiin illee saba warra kaan gidduu in jiraanna? jennee yaanne, boolla isaan nuuf qotan keessatti in qabame*.

²¹Yaa namoota mandara Edoom, warra biyya Uz keessa jiraattanii, gammadaa ililchaa! Garuu xoofoon dheekkamsaa kun isinittis immoo in darba; isa keessaas dhugdanii machooftanii qullaa in buuftu*.

²²Egaa yaa namoota Edoom! Waaqayyo sababii yakka keessaniitiif isin in adaba, cubbuu keessanis bakkeetti in baasa; yaa namoota Xiyoon, adabni sababii yakka keessaniitiif isinitti dhufe raawwatameera; Waaqayyo si'achi biyyaa isin hin baasu*.[28]