MACAAFA FAARFANNAA 106:1-48 GAZB1997 - Bible AI

¹Haaleluyaa! Waaqayyo gaarii waan ta'eef, gaarummaan isaas bara baraan waan jiraatuuf, isaaf galata galchaa*!

²Hojii Waaqayyoo isa aango-qabeessa eenyutu himuu danda'a? Jajuu isaas hundumaa eenyutu dhageessisa*?

³Warri wanta qajeelaa ta'e eegan, warri yeroo hundumaa qajeelummaadhaan hojjetanis haa gammadan![371]

⁴Yaa Waaqayyo, faara tolaa isa saba keetti argisiiftuun na yaadadhu, fayyisuu keetiinis kottuu na ilaali!

⁵Barakata warra siif fo'amanii argee akka garaan na ciisu, gammachuu saba keettis akkan gammadu, warra dhuunfaa kee wajjinis akkan of jaju anaaf godhi!

⁶Akkuma abboota keenyaa nus cubbuu hojjenneerra, balleessineerra, jal'inas raawwanneerra*.

⁷Abboonni keenya biyya Gibxi yeroo turan, hojii kee isa dinqisiisaa hin hubanne; galaana diimaa isa jajjaba qabu biratti isa hundumaa gara irraa jiru irratti ka'an malee, baay'ina gaarummaa isaa hin yaadanne*.

⁸Haa ta'u iyyuu malee, inni hojii isaa isa aango-qabeessa beeksisuudhaaf, maqaa isaatiif jedhee isaan in oolche.

⁹Inni galaana diimaa in ifate, galaanichis in goge; isa gad fagoo sana keessas akka lafa duwwaa keessaatti isaan in adeemsise.

¹⁰Akkasitti harka warra isaan jibbanii isaan oolche, humna diina isaanii jalaas isaan fure.

¹¹Kanaaf bishaanichi hamajaajii isaanii of jala aanse, isaan keessaas tokko illee hin hafne*.

¹²Kana irratti warri kan isaatii dubbii isaa in amanan, jajuu isaas in faarfatan*.[372]

¹³Garuu isaan dafanii wanta inni godhe in irraanfatan, gorsa inni kennus hin eegganne.

¹⁴Lafa duwwaa keessatti kajeellaan cimaan isaan in qabate; lafa onaa keessattis Waaqayyoon in qoran*.

¹⁵Inni waan isaan barbaadan in kenneef, garuu dhukkuba isaan golgoleessu isaan keessatti erge.[373]

¹⁶Namoonni iddoo buufataa sanatti Museetti, Aaron isa Waaqayyoof qulqullaa'ettis in hinaafan*;

¹⁷lafti afaan banee Daataanin in liqimse, warra garee Abiiraamis in awwaale.

¹⁸Garee isaan irratti immoo ibiddatu boba'e, arrabni ibiddichaas warra jal'oota in gube*.[374]

¹⁹Isaan tulluu Horeebitti jabbii hojjetatan, bifa baqfame sanattis in sagadan.

²⁰Isaan ulfina Waaqayyo isaanii, bifa sangaa marga dheeduutti diddiiran

²¹Waaqayyoon isa isaan oolche, isa biyya Gibxitti wanta gurguddaa hojjete in irraanfatan.

²²Inni hojii dinqisiisaa biyya Kaam keessatti, wanta sodaachisaas galaana diimaa biratti in hojjete.

²³Waaqayyo isaan balleessuuf jedhee ture; Museen inni Waaqayyo fo'ate sun garuu, dheekkamsa isaa jara balleessuu irraa deebisuudhaaf, gidduu lixee fuula isaa dura in dhaabate*.[375]

²⁴Yommus isaan abdii inni kenneef waan hin amaniniif, biyya isa namatti tolu sana in tuffatan*.

²⁵Isaan godoo godoo isaanii keessatti in guunguman, sagalee Waaqayyoos dhaggeeffatanii hin abboomamne.

²⁶Kanaafis inni harka ol fudhatee, lafa duwwaa keessatti isaan kukkufisuufis itti kakate.

²⁷Sanyii isaanii saba warra kaan keessatti gad darbachuudhaaf, guutummaa biyya lafaa irras isaan bittimsuudhaaf irratti dubbate*.[376]

²⁸Isaan, ?Ba'aal Phe'or? Waaqayyo tolfamaadhaaf sagaduutti qabaman, aarsaa waaqayyolii du'oodhaaf dhi'aates in nyaatan*.

²⁹Isaan hojii isaaniitiin tuttuqanii goofticha waan aarsaniif, dha'ichi isaan irra in bu'e.

³⁰Yommus Finehaas ka'ee gidduu lixee namoota irratti firdii raawwate; dha'ichi sunis in ittifame.

³¹Kunis dhalootaa hamma dhalootaatti, bara baraan qajeelummaatti isaaf in lakkaa'ame*.[377]

³²Isaan bishaan Mariibaa biratti goofticha in aarsan; sababii isaaniitiifis dubbiin gadheen Musee irratti in dhufe*.

³³Isaan akka inni keessa ba'ee isatti hadhaa'u waan godhaniif, innis dubbii hin alalfatamin dubbate.

³⁴Akka Waaqayyo isaan abboome, isaan saba warra kaan lafa irraa hin balleessine.

³⁵Garuu saba lafa irraa wajjin wal makan, waan isaan hojjetanis hojjechuu in baran.

³⁶Waaqayyolii tolfamoo isaaniif in hojjetan, kunis kiyyoo isaanitti ta'e*.

³⁷Isaan ilmaan isaanii, intaloota isaaniis aarsaa godhanii, hafuurota hamootaaf in dhi'eessan*.

³⁸Dhiiga ilmaan isaanii fi intaloota isaanii, waaqayyolii tolfamoo warra Kana'aaniif aarsan, dhiiga warra balleessaa hin qabnee in dhangalaasan; biyyichis dhiigaan in xureeffame*.

³⁹Akkasitti hojii isaaniitiin xuraa'oo ta'an, gocha isaaniitiinis amanamummaa in dhaban.[378]

⁴⁰Yommus dheekkamsi Waaqayyoo saba isaa irratti in boba'e, warra dhunfaa isaatiis ijaan ilaaluu isa jibbisiise.

⁴¹Warri isaan jibban isaan irratti akka mo'anitti, inni harka saba lafa irraatti dabarsee isaan in kenne.

⁴²Diinonni isaanii isaan in cunqursan, harka isaanii jalas in galfaman.

⁴³Inni yeroo baay'ee isaan oolche, isaan garuu maree isaatiin mormanii, yakka isaanii keessas gad in fagaatan.

⁴⁴Haa ta'u iyyuu malee, yeroo iyya isaanii dhaga'etti, inni rakkina isaanii in ilaale.

⁴⁵Inni kakuu isaa isaaniif in yaadate, akka baay'ina gaarummaa isaattis isaaniif in gadde.

⁴⁶Warri isaan booji'an iyyuu, akka isaaniif oo'an in godhe*.[379]

⁴⁷Nuyi maqaa kee isa qulqulluu akka galateeffannuuf, warra si jajatan ta'uu keenyaafis akka of himnuuf, yaa Waaqayyo gooftaa keenyaa, ati nu oolchi, saba lafa irraa keessaas walitti nu sassaabi*![380]

⁴⁸Waaqayyo gooftaan inni kan Israa'el, bara baraa hamma bara baraatti ulfinaan haa jajamu! Namoonni hundinuus ?Ameen!? haa jedhan! Waaqayyoon jajadhaa!