MACAAFA FAARFANNAA 108:1-13 GAZB1997 - Bible AI

¹Garaan koo hin shakku, yaa Waaqayyo! Sin faarfadha, sagalee mi'a garaa garaas nan dhageessisa; yaa lubbuu ko, yaa ulfaattuu ko ka'i!

²Yaa kiraaraa, yaa maseenqoo dammaqaa! Ani barii lafaa nan dammaqsa!

³Ani namoota keessatti sin galateeffadha, yaa Waaqayyo, saba lafa irraa keessattis faarfannaadhaan sin jajadha!

⁴Gaarummaan kee hamma bantii waaqaa gara irraatti in guddata, amanamummaan kees hamma duumessaa in ga'a.

⁵Bantiiwwan waaqaa gara irraatti ol ka'i, yaa Waaqayyo! Ulfinni kees lafa hundumaa irratti ol haa jedhu*!

⁶Michoonni kee akka oolfamaniif immoo, harka kee mirgaadhaan gargaari, anaafis deebii deebisi![387]

⁷Waaqayyo iddoo isaa isa qulqullaa'aa keessaa dubbatee, ?Ani guddisee itti nan gammada, Sheekem kutaa biyyaa nan hira, dachaa Suukootis safaree gargar nan hira.

⁸Biyyi Gili'aad kan koo ti, biyyi Minaasees kan koo ti; biyyi Efreem gonfoo sibiilaa isa ani mataa koo ittiin eeggachuuf kaa'adhuu dha; biyyi Yihudaa siiqqee mootummaa kootii ti.

⁹Biyyi Mo'aab caabii dhiqannaa kootii ti, biyyi Edoom kan koo ta'uu isaa argisiisuudhaaf, kophee koo isa irra nan buusa; biyya Filisxiyaa irratti mo'uu koo guddisee nan dhageessisa? jedhe.

¹⁰Gara mandara naannoon isaa dallaa dhagaatiin marfameetti, eenyutu na fida ree? Eenyutus gara Edoomitti na geessa ree?

¹¹Yaa Waaqayyo, nu gatteetta mitii? Ati yaa Waaqayyo, loltuu keenyaa wajjinis lafa duulaatti hin baatu,

¹²gargaarsi namaa homaa waa'ee waan hin baafneef, rakkina jalaa ba'uuf, ati gargaarsa nuuf kenni!

¹³Waaqayyoo wajjin, nuyi humna in godhanna, diinota keenya gad kan dhidhiitu isa.