MACAAFA FAARFANNAA 18:1-50 GAZB1997 - Bible AI

¹Yaa Waaqayyo aangoo ko, ani sonaan sin jaalladha;

²Waaqayyo kattaa koo, masaraa koo, oolchaa koo tis; Waaqayyo koo da'oo dhagaa isa ani kooluu itti galuu dha; gaachana koo, isa akka gaanfaa fayyina koof faccisu, iddoo dhokannaa koo isa ol jedhaa dhas.

³Waaqayyoon isa jajamaa nan waammadha, inni immoo harka diinota koo na oolcha*.[47]

⁴Hidhaan du'aa na marsan, dha'aan bishaan badiisaas na naasise;

⁵hidhaan qilee na xaxan, furgaasaan du'aas na qabate*;

⁶rakkina koo keessatti Waaqayyoon nan waammadhe, gargaarsaaf Waaqayyo koottan iyyadhe; inni immoo mana qulqullummaa isaa keessaa sagalee koo dhaga'e, isa duratti gargaarsaaf iyyuun koos gurra isaa bira anaaf ga'e*.[48]

⁷Yommus lafti rom'itee tochoote; sababii aariin isaa boba'eefis, hundeen tullootaas immoo hurgufamanii raafaman*;

⁸funyaan isaa keessaa aarri in yaa'e, afaan isaa keessaas ibiddi xaph godhu in ba'e; barbadaan giimiin isa biraa in boba'e*.

⁹Inni bantiiwwan waaqaa gugguufsisee gad bu'e, duumessi gurraachi dukkanaa'aan miillan isaa jala ture.

¹⁰Inni Kiruub irra taa'ee in balali'e, baalleewwan qilleensaatiinis shuf jedhee dhufe*;

¹¹naanna'aa isaa dukkanni akka golgu godhe, duumessa dukkanaa'aa bishaan keessa guutes godoo isaa in godhate.

¹²Calaqqisa fuula isaa dura jiru keessaa immoo, dhagoonni cabbii fi barbadaan ibiddaa, tarsaasanii duumessicha keessa in ba'an.[49]

¹³Waaqayyo bantiiwwan waaqaa keessaa kakawweessa'e, aabba inni hundumaa gara irraa jirus [dhagoota cabbii fi barbadaa ibiddaatiin] sagalee isaa in dhageessise;

¹⁴inni xiyya isaa gad dhiisee diinota bittimse, balaqqeessa bakakkaatiinis gara itti goran isaan in wallaalchise.

¹⁵Dheekkamsa keetiin yaa Waaqayyo, rukuttaa aara funyaan kee keessaa ba'etiinis, maniin bishaanotaa in mul'atan, hundeewwan biyya lafaas qullaatti in baafaman*.[50]

¹⁶Inni ol gara irraadhaa gad hiixatee na qabe, bishaan gurguddaa keessaa harkisee na baase*;

¹⁷inni harka diina koo isa jabaa, akkasumas harka warra na jibbanii humnas na caalanii na oolche.

¹⁸Yeroo rakkinni ana irra ga'etti isaan ana irratti lafa dha'an, Waaqayyo garuu irkoo koo ture;

¹⁹inni gara iddoo bal'aatti na baasee, waan anatti gammadeef na oolche.[51]

²⁰Waaqayyo akka qajeelummaa kootti kana anaaf godhe, akka qulqullina harka koottis dugda anaaf deebise.

²¹Ani karaa Waaqayyoo duukaa bu'eera; jal'inaanis Waaqayyo koottii gargar hin baane.

²²Wanti isa duratti qajeelaa ta'an hundinuu fuula koo dura turan, seerrata isaa hundumaas of irraa hin butne.

²³Ani balleessaa maleen isaa wajjin ture yakka hojjechuuttiis of nan eeggadhe.

²⁴Waaqayyo immoo akka ani qajeelaa ta'e mul'adhetti, akka harki koo ija isaa duratti qulqulluu ta'ee argamettis, dugda anaaf in deebise.

²⁵Nama gaarummaa argisiisutti, atis gaarummaa in argisiifta; nama hin balleessinetti, atis itti hin balleessitu.

²⁶Isa of qulleessutti, ati ofii keetii qulqullaa'aa ta'uu kee in mul'ifta, nama micciiramaa immoo akka micciiramummaa isaatti qabuu kee itti in mul'ifta.

²⁷Ati saba gad qabamaa in oolchita, warra mataa irra-keessa qabatanii adeeman immoo, lafa in ilaalchifta*.

²⁸Yaa Waaqayyo, ibsaan koo haleelee akka ifu in goota, yaa Waaqayyo gooftaa ko, dukkana koo in ibsita*.

²⁹Eyyee, ani siin kutata loltuu diinaatti nan bu'a, Waaqayyo kootiin gelaa irra iyyuu nan utaala.[52]

³⁰Waaqayyo kun karaan isaa mudaa hin qabu, dubbiin isaa dhugaa ta'uu isaa amansiiseera; Waaqayyo warra isatti kooluu galan hundumaaf gaachana*.

³¹Goofticha malee Waaqayyo eenyu ree? Waaqayyo keenya malees kattaa jabaan eenyu ree*?

³²Waaqayyo kun, isa mudhii koo humnaan hidhachiisee isa karaan koo mudaa akka hin qabaanne godhee dha;

³³miilla koo ariifataa akka miilla biichee anaaf godhe kaarra gubbaas ana dhaabachiise;

³⁴irreen koo iddaa sibiila diimaa akka dabsutti, inni harka koo lola in barsiise.[53]

³⁵Gargaarsa kee gaachana gootee anaaf laatte, harki kee mirgaas ana in hirkise; anatti gad dhi'aachuun kees na guddise.

³⁶Tarkaanfii miilla kootiif na jalatti iddoo bal'aa anaaf laatte, gulubiin koos ana jala gara hin galle;

³⁷ani diinota koo ari'ee isaan nan qaqqabe, hamma isaan dhumanittis ani gara booddeetti hin deebine.

³⁸Akka isaan deebi'anii hin kaanetti immoo, ani rukutee isaan nan caccabse, isaanis miilla koo jalatti in kufan.

³⁹Ati lola sanaaf mudhii koo humnaan hidhachiifteetta, warri ana irratti ka'anis na jalatti akka gombifaman in goote.

⁴⁰Ati diinonni koo dugda duuba deebi'anii akka na baqatan goote, ani immoo warra na jibban nan balleesse.

⁴¹Isaan gargaarsaaf iyyan, garuu tokko illee kan isaan gargaaru hin turre, gara Waaqayyootti iyyan, inni garuu isaaniif hin deebifne.

⁴²Akka awwaara qilleensi fudhatutti ani caccabsee isaan nan bulleessa, akka dhoqqees karaa keessatti isaan nan dhooba.

⁴³Ati saba wal lolu keessaa na baaftee, saba warra kaaniif mataa akkan ta'u gooteetta; namoonni saba ani hin beeknees anaaf in hojjetan.

⁴⁴Waa'ee koo gurrumaan dhaga'uudhaan anaaf abboomaman, warri ormaas gugguufaa gara koo in dhufan;

⁴⁵ijoolleen ormaa in dadhaban, rom'aas iddoo cufatanii taa'an keessaa ba'an*.[54]

⁴⁶Waaqayyo jiraataa dha! Kattaan koos jajamaa dha! Waaqayyo fayyina kootiis ol ol haa qabamu!

⁴⁷Waaqayyo inni ijaa baasuu anaaf kenne, saba lafa irraas harka koo jala galche;

⁴⁸harka diinota kootii keessaa immoo na baase; eyyee, ati warra ana irratti ka'an gara irraatti, ol na qabdeetta, namoota humna anatti argisiisan harkaas na butatteetta.

⁴⁹Kanaaf yaa Waaqayyo, ani saba hundumaa keessatti sin jajadha, faarfannaa galataatiinis maqaa kee nan faarfadha*.

⁵⁰Mootii isa kan isaatiif fayyina guddaa isa kennu, gaarummaa isaa isa ofii isaatii dibetti, Daawitii fi sanyii isaattis bara baraan isa argisiisu, Waaqayyoon faarfachuu koo ti*.[55]