MACAAFA FAARFANNAA 22:1-31 GAZB1997 - Bible AI

¹Waaqayyo ko, Waaqayyo ko, maaliif na dhiifte? Ana gargaaruuttii, dubbii aadnaa koottiis maaliif fagaatte*?

²Yaa Waaqayyoo ko, guyyaa gara keetti nan iyya, ati garuu anaaf hin deebiftu; halkanis nan iyya, qabbana immoo hin argadhu.[64]

³Kana keessaa immoo, ati qulqulluu dha, teessoo kee irra jirta; galanni Israa'el faarfannaadhaan siif dhi'eessus teessoo kee jala jira.

⁴Abboonni keenya si amanatan, isaan in amanatan, atis isaan in oolchite;

⁵gara keetti iyyanii, in baraaraman, si amanatanii, hin yeellaasifamnes*.[65]

⁶Ani garuu raammoo dha, namas miti, namni na arrabsa, sabnis na tuffata*.

⁷Warri na argan hundinuu anatti in gai'su, isaan arraba anatti baasanii mataa anatti raasanii*,

⁸?Mee inni Waaqayyotti of haa gatu, inni immoo mee isa haa oolchu; isatti in gammada'o, mee isa haa furu!? anaan jedhu*.[66]

⁹Amma gadameessa haadha kootii keessaa situ na baase, harma haadha kootii irrattis situ nagaatti na eege;

¹⁰ani dhalachuu kootii jalqabee sitti of gateera, erga haati koo na deesses situ Waaqayyo koo ti;

¹¹kunoo, rakkinni dhi'aateera, tokko illees kan gargaaru hin jiru, ati ana irraa hin fagaatin!

¹²Korommiin baay'een na naanna'an, korommiin biyya Baashaan warri jajjaboonnis na marsan;

¹³akka leenca isa waa cucuffatuuf isa aadutti, isaan afaan isaanii bal'isanii anatti in banu;

¹⁴ani akka bishaanii nan dhangala'e, lafeen koo hundinuus wal gad dhiise; onneen koos akka gagaa ana keessatti in baqe;

¹⁵qoonqoon koo gogee na awwaara'e, arrabni koos laagaa kootti qabate; atis biyyoo du'aa keessa na ciibsita*.[67]

¹⁶Warri akka saree adamsan ana in naanna'an, gareen warra hamaa godhaniis ana in marsan, harka koo fi miilla koos uranii in fullaasan*.

¹⁷Lafeen koo hundinuu lakkaa'amuu in danda'a, jarri immoo ana ilaalanii akkasitti na arguutti in gammadan.

¹⁸Isaan uffata koo in hirmaatan, wayyaa koottis muka in buufatan*.[68]

¹⁹Ati garuu yaa Waaqayyoo ko, anattii hin fagaatin, yaa aangoo ko, ana gargaaruuf ariifadhu!

²⁰Jireenya koo billaa anaaf oolchi, lubbuu tokkittii ani qabus qabaa warra akka sarootaa kana keessaa baasi!

²¹Afaan leencaa na oolchi, akka deebii kadhata koottis gaanfa gafarsaa jalaa na baasi*![69]

²²Ani immoo maqaa kee obboloota kootti nan labsa, walga'ii keessattis sin jajadha*!

²³Isin warri Waaqayyoon sodaattan, isa jajadhaa! Isin sanyiin Yaaqoob, isaaf ulfina kennaa! Isin sanyiin Israa'el, isaaf safuu buufadhaa!

²⁴Inni nama gad qabamaa hin tuffanne, gad qabamuu isaatiinis maal dhibdi hin jenne; yeroo inni gad qabamaan gara isaatti iyye in dhaga'eef malee, inni fuula isaa isa duraa hin dhoksine*.[70]

²⁵Wal ga'ii guddaa keessatti si jajachuun koo si biraa anaaf in dhufa; warra isa sodaatan durattis, ani wareega koo of irraa nan baasa*.

²⁶Warri gadadamoonni nyaatanii in quufu, warri Waaqayyoon barbaadanis isa in jajatu; baruma baraanis garaan keessan gammadee haa jiraatu*![71]

²⁷Andaarri lafaa hundinuu in yaadata, gara Waaqayyoottis in deebi'a; qomoon saba hundumaas fuula isaa duratti in sagada.

²⁸Mootummaan kan Waaqayyoo waan ta'eef, inni saba hundumaa in seerrata;

²⁹eyyee, warri quufoon lafa kana irraa hundinuu isaaf in sagadu, warri biyyootti gad deebi'an hundinuu, inni jireenyatti of hambisuu hin dandeenyes isa duratti in gugguufu;

³⁰dhaloonni dhufu isaaf in hojjeta, namoonni dhaloota dhufutti waa'ee gooftaa in himu;

³¹isaanis dhufanii qajeelummaa isaa isa fayyisu, saba si'achi dhalatutti in labsu; kanas isatu godhe.