MACAAFA FAARFANNAA 30:1-12 GAZB1997 - Bible AI

¹Yaa Waaqayyo, ati na oolchiteetta, diinonni koos anatti akka hin gammanne gooteetta; ani immoo ulfina kee ol kaasee sin galateeffadha.

²Yaa Waaqayyo gooftaa ko, ani gargaarsaaf gara keetti iyyadheera, ati immoo ana fayyifteetta*.

³Yaa Waaqayyo, ati lubbuu koo iddoo lafa jalaa keessaa ol baafteetta, warra boollatti gad bu'an gidduudhaas jireenyatti na deebifteetta*.[95]

⁴Isin warri Waaqayyoof of kennitan faarfannaadhaan isa jajadhaa, seenaa qulqullina isaatiifis galata isaaf galchaa!

⁵Dheekkamsi isaa hamma liphsuu ijaatti, fuulli isaa inni ifaan garuu bara jireenyaatiif in ta'a; galgala boo'ichi yoo namatti dhufe, ganama immoo ililleen in ta'a*.[96]

⁶Ani ofii kootii yeroo anatti toletti, ?Matumaa ani hin mittiqu? nan jedhe.

⁷Fuula ifaadhaan na ilaaluu keetiin yaa Waaqayyo, tulluun ani irra dhaabadhu jabaatee akka eegamu goote; yeroo ati fuula kee na duraa dhoksitetti immoo, naasuutu na qabate.

⁸Yaa Waaqayyo, ani gara keettan iyyadha, faarri gooftaa koo akka anaaf toluufis nan eeggadha.

⁹Ani boollatti yoon gad bu'e, ati du'a koo keessaa maal argatta? Biyyoon si jajaa ree? Yookiis amanamummaa kee in himaa ree*?

¹⁰Yaa Waaqayyo na dhaga'i, araaras anatti argisiisi! Yaa Waaqayyo, ati gargaaraa koo anaaf ta'i![97]

¹¹Ati boo'icha koo sirbatti anaaf geddarte, uffata gaddaas ana irraa hiikte, gammachuu ana hidhachiifte*.

¹²Lubbuun koo faarfannaadhaan akka si jajattuuf, callumas akka hin jenneef, yaa Waaqayyo gooftaa ko, ani bara baraan galata siif nan galcha![98]