MACAAFA FAARFANNAA 37:1-40 GAZB1997 - Bible AI

¹Warra waan jal'aa hojjetanitti hin aarin, waan isaan hamaa godhanii argatanittis hin hinaafin*!

²Isaan akka margaatti dafanii in coolligu; akka biqiltuu misee goguttis in golgolaa'u*.[126]

³Waaqayyoon amanadhu, wanta gaarii ta'es hojjedhu; biyyuma keessa nagaadhaan taa'i, amanamummaas eeggadhu!

⁴Waaqayyotti gammachuu qabaadhu! Inni immoo kadhata garaa kee siif in kenna*.

⁵Karaa kee Waaqayyotti kennadhu, isa amanadhu! Innis siif in raawwata*.

⁶Inni qajeelummaa kee akka ifaatti, dhugaa kees akka aduu saafaatti, bakkeetti in baasa*.[127]

⁷Waaqayyo duratti gab jedhi, obsaanis isa eeggadhu, nama karaa isaa wal qixxeeffatetti, nama wanta hamaa koratee fiixaan baafatettis hin aarin!

⁸Dheekkamuu irraa of dhowwi, banbanuus dhiisi, inni hamaa hojjechuu duwwaatti waan si geessuuf hin aarin!

⁹Warri jal'oonni lafa irraa in balleeffamu, warri Waaqayyoon eeggatan garuu lafa in qabaatu.

¹⁰Inni jal'aan yeroo xinnoo booddee achitti hin argamu, iddoo inni ture hubattee yoo ilaalte, inni hin jiru.

¹¹Warri garraamonni garuu lafa in qabaatu, isaanis nagaa guututti jiraachuu isaaniitiin sonaan in gammadu*.[128]

¹²Namni jal'aan nama qajeelaatti in mala, ittis in ciniinata;

¹³guyyaan namicha jal'aa akka dhi'aate waan arguuf, gooftichi namichatti in kolfa.

¹⁴Warri jal'oonni, nama gadadamaa fi dhabaa lafaan dha'uudhaaf, warra karaa qajeelaa irra jiranis ajjeesuudhaaf billaa isaanii in luqqifatu, iddaa isaaniis in dabsatu.

¹⁵Billaan isaanii garaadhuma isaaniitti gala, iddaan isaaniis in caccaba.

¹⁶Qabeenya guddaa jal'oonni baay'een qaban irra, qabeenya xinnaa namni qajeelaan qabu wayya*.

¹⁷Irreen jal'ootaa in caccaba, warra qajeelota garuu Waaqayyo qabaa isaa keessatti in eega.[129]

¹⁸Waaqayyo bara jireenya warra balleessaa hin qabnee beekee, yaada jaalalaatiin duukaa in bu'a, wanti isaan itti darbanii argachuuf jiranis kan isaanii ta'ee in hafa*;

¹⁹bara gadheetti hin yeella'an, bara beelaattis in quufu*.[130]

²⁰Warri jal'oonni garuu badduu in ba'u; diinonni Waaqayyoo akka miidhagina margaa ti, akkuma aarri badu, isaanis in badu.

²¹Namni jal'aan in liqeeffata, danda'ee hin baasus; namni qajeelaan immoo arjaa dha, waan kennus qaba.

²²Warri Waaqayyo eebbise lafa in qabaatu; warri inni abaare immoo lafa irraa in balleeffamu.

²³Ejjennaan namaa inni Waaqayyo jabeessu isa biraa in ka'a; karaan isaa sunis gooftaatti in tola,

²⁴Waaqayyo harka isaa qabee waan isa eeguuf, inni yoo kufe iyyuu, lafa hin ga'u*.[131]

²⁵Dargaggummaa argeera, dulluma biras ga'eera; garuu namni qajeelaan utuu gatamuu, ijoolleen isaas waan nyaatan dhabanii utuu kadhatanii ani takkaa argee hin beeku*.

²⁶Inni yoom iyyuu in arjooma, in liqeessas, ijoolleen isaas eebbaaf in ta'u.[132]

²⁷Wanta hamaa irraa fagaadhu, wanta gaarii hojjedhu! Yoos bara baraan nagaatti in teessa.

²⁸Waaqayyo waan dhugaa ta'e in jaallata, warra isaaf of kennanis hin gatu; isaan bara baraan in eegamu, ijoolleen jal'ootaa immoo lafa irraa in balleeffamu.

²⁹Warri qajeelonni biyya in qabaatu, yeroo hundumaafis keessa in taa'u*.[133]

³⁰Afaan nama qajeelaa ogummaadhaan in dubbata, arrabni isaas waan dhugaa ta'e in hima;

³¹seerri Waaqayyo isaatii garaa isaa keessa jira, faanni isaas isa irraa hin mittiqu.

³²Namni jal'aan riphee nama qajeelaa in eeggata, isa ajjeesuus in barbaada.

³³Waaqayyo garuu harka isaatti isa hin kennu, yommuu namni itti faraduuf jedhus yakka itti hin mursiisu.

³⁴Waaqayyoon abdiidhaan eeggadhu, karaa isaa irraa akka hin jal'annes eeggadhu! Biyya akka qabaattuuf ulfina siif in kenna, lafa irraa balleeffamuu warra jal'ootaas argitee in gammadda.

³⁵Nama jal'aa humnaan nama irratti ka'u ani argeera, inni akka muka lafti itti tolee dagaagee ta'e;

³⁶ergasii yeroon achiin darbuutti, ilaalee nan dhabe; ani isa nan barbaade, inni immoo hin argamne.

³⁷Nama hir'ina hin qabne caqasi, nama yaada qajeelaas ilaali! Qacceen nama nagaa hin badu.

³⁸Warri irra-daddarbituun garuu wal duukaa in duguugamu, qacceen warra jal'ootaas lafa irraa in balleeffamu.

³⁹Fureen qajeelotaa Waaqayyo biraa in dhufa, Waaqayyo yeroo rakkinaatti da'oo isaanii ti;

⁴⁰Waaqayyo isaan in gargaara, isaan in oolchas; waan isaan kooluu isatti galaniif, inni harka warra jal'ootaa duraa oolchee isaan in fura*.[134]