MACAAFA FAARFANNAA 40:1-17 GAZB1997 - Bible AI

¹Ani abdii guutuudhaan Waaqayyoon nan eeggadhe, inni immoo gara kootti jedhee, iyya koos anaaf in dhaga'e.

²Inni boolla huursaa bishaan sodaachisaa keessaa, dhoqqee akka suphee nama qabatu keessaas harkisee na baase; inni miilla koo dhagaa hin sochoone irra anaaf dhaabachiise, ejjennaa koos anaaf in jabeesse.

³Inni faarfannaa haaraa, isa ani ittiin isa jajadhu afaan koo keessa in kaa'e; baay'een kana arganii isa in sodaatu, waaqayyummaa isaa in amanatu*.[144]

⁴Namni Waaqayyoon amanannaa isaa godhatu, warra of bokoksanitti, warra amantii isaanii gananii, soba duukaa bu'anittis inni hin gorin haa gammadu*!

⁵Yaa Waaqayyo gooftaa ko, gocha kee isa dinqisiisaadhaa fi, yaada gaarii nuuf qabdu nuuf baay'ifteetta; tokko illee kan siin qixxaatu hin jiru; isaan kana yoon labse, yoon himes, isaan wanta lakkaa'amuu danda'u gara irraa in ta'u*.[145]

⁶Ati qalmaa fi kennaa midhaaniitti hin gammanne, qalma gubamuu fi aarsaa cubbuus, ati hin barbaanne; anaaf garuu gurra banamaa in kennite*.

⁷Yommus ani, ?Kunoo ani nan dhufa, maraa macaafaa keessatti anaaf kan ta'u caafameera;

⁸yaa Waaqayyoo ko, fedha kee gochuun anatti in tola, seerri kees garaa koo keessa jira? nan jedhe.[146]

⁹Ani waldaa guddicha keessatti, waa'ee dhugaa argatanii furamuu misraachoo himeera; yaa Waaqayyo, akkuma ati beektu, kunoo, ani afaan koo kana labsuuttii hin dhowwine,

¹⁰waa'ee qajeelummaa kee ani garaatti qabadhee hin dhoksine, ani waa'ee amanamummaa kee fi waa'ee gargaarsa kee himeera; ani waldaa isa guddaa sana keessatti, gaarummaa kee, amanamummaa kees afaan kootti hin ittifne.

¹¹Yaa Waaqayyo, ati garaa laafuu kee harkatti qabattee na duraa hin hambisin; gaaromuun kee fi amanamuun kee gaaf hundumaa ana haa eegan!

¹²Wanti hamaan lakkoobsa hin qabne na marsan, hamma ani wanta biraa arguu dadhabuttis irra-daddarbaan koo anatti in dacha'an; isaan rifeensa mataa koo caalaa in baay'atu, kanaafis onneen koo in laafa.

¹³Yaa Waaqayyo, ana oolchuun jaalala kee haa ta'u, yaa Waaqayyo, na gargaaruudhaaf ariifadhu!

¹⁴Warri jireenya koo butachuu barbaadan, guutummaatti haa yeella'an, haa qaana'anis; warri hamaan ana argachuutti gammadan, gara booddee deebi'anii haa salphifaman!

¹⁵Warri ?Baga, baga? anaan jedhan, qaanii isaaniitiin na'anii haa gogan*![147]

¹⁶Warri si barbaadan hundinuu garuu, isaanitti haa tolu, sittis haa gammadan; warri fayyisuu kee jaallatanis utuu gargar hin kutin, ?Waaqayyo guddaa dha!? haa jedhan!

¹⁷Waa'ee koof yoo ta'e, ani gadadamaa dha, dhabaa dhas; garuu gooftaan koo anaaf in yaada; ati gargaarsa koo, furee koo tis, yaa Waaqayyoo ko, egaa hin turin*![148]