MACAAFA FAARFANNAA 44:1-26 GAZB1997 - Bible AI

¹Yaa Waaqayyo, nuyi gurra keenyaan dhageenyeerra, wanta ati bara durii sanatti goote, gochaa ati bara isaaniitti isaaniif raawwattes, abboonni keenya nutti himaniiru*.

²Ati harka keetiin saba warra kaan ariitee baafte, isaan kana garuu jabeessitee in dhaabde; ati warra kaan in balleessite, isaan kana garuu in bal'ifte.

³Isaan billaa isaaniitiin laficha hin qabanne, yookiis irreen isaanii mo'icha hin laanneef; garuu ati waan isaanitti gammaddeef, mirgi kee fi irreen kee, ifni fuula kees kana isaaniif kenne.[155]

⁴Ati mootii koo ti, yaa Waaqayyo, Yaaqoobiif mo'icha kana kan abboome si;

⁵humna keetiin diinota keenya lafaan in dhoofna, maqaa keetiinis warra nu irratti ka'an in dhidhiinna.

⁶Ani iddaa koo hin amanadhu, billaan koos mo'icha ana hin argachiisu*.

⁷Ati garuu harka diinota keenyaa nu oolchiteetta, warra nu jibbanis yeellaasifteetta.

⁸Nuyi guyyaa hundumaa si Waaqayyoon of in jajna, maqaa keetiifis bara hundumaa galata in galchina*.[156]

⁹Amma garuu ati of biraa nu gattee nu salphifteetta, loltuu keenyaa wajjinis lafa duulaatti hin baane.

¹⁰Diinota duraa gara booddeetti deebinee akka baqannu gooteetta; warri nu jibbanis nu saamaniiru.

¹¹Ati akka hoolotaa qalamuutti nu kenniteetta, saba warra kaan keessattis nu bittimsiteetta*.

¹²Ati saba kee wanta gatiitti hin lakkaa'amnetti gurgurteetta, gurgura isaanii keessaas ati homaa hin buufanne;[157]

¹³ati saba ollaa keenya jiraniif muka ga'oo, warra biyya naannoo keenyaafis ceephoo fi tuffiidhaaf nu goote*.

¹⁴Ati sabni warri kaan akka nuyiin mammaakan, namoonni lafa irraas nu tuffatanii mataa akka nutti raasan goote.

¹⁵Salphinni koo guyyaa guutuu na dura jira, yeelloonis ija na fokkisiise.

¹⁶Kunis sababii dubbii warri ga'isanii nama arrabsan dubbataniif, diinonnis ijaa baafachuuf nama ilaalaniif ta'e.[158]

¹⁷Kun hundinuu nu irra ga'eera, utuma ta'uu iyyuu nuyi si hin irraanfanne, kakuu kee keessattis nuyi amanamuu hin dhabne.

¹⁸Garaan keenya gara booddeetti hin deebine, tarkaanfiin keenyas daandii kee irraa hin jal'anne.

¹⁹Haa ta'u iyyuu malee, ati lafa waangonni jiraatanitti nu caccabsiteetta, dukkana sodaachisaas nutti uffifteetta*.[159]

²⁰Maqaa kee maqaa Waaqayyo keenyaa utuu irraanfanneerra ta'ee, harka keenyas gara Waaqayyoo ormaatti utuu bal'ifneerra ta'ee,

²¹ati dhoksaa garaa namaa waan beektuuf, kana bira hin geessu turtee ree?

²²Nuyi garuu akka hoolota qalamaniitti lakkaa'amnee, guyyaa hundumaa sababii keetiif in qalamna*.[160]

²³Ka'i maaliif rafta? Yaa gooftaa, dammaqi, bara hundumaaf nu hin gatin*!

²⁴Ati maaliif fuula kee dhoksita? Gadadamuu keenyaa fi cunqurfamuu keenyas maaliif irraanfatta?

²⁵Lubbuun keenya awwaara keessa gugguufteetti, dhagni keenyas lafatti maxxaneera.

²⁶Ka'i! Nu gargaaruudhaaf kottu! Gaarummaa keef jedhii nu furi![161]