1Dubbiin gaariin garaa koo guutee irraa in hafa, wanti ani qopheessu kunis mootiidhaaf in ta'a; arrabni koo akka birii nama waa caafuutti beekamee ti.
2Ilmaan namaa keessaa ati miidhaginaan hundumaa irra in caalta; afaan kees namatti in tola; kanaan Waaqayyo bara baraan si eebbiseera.
3Ati yaa jagnaa, billaa kee mudhii keetti hidhadhu; ulfina kee fi guddina kee argisiisi!
4Guddina keetiin ba'i, dubbii dhugaa fi garraamummaaf, qajeelinaaf fe'adhu ka'i! Harki kee mirgaas gocha sodaachisaa sitti in argisiisa!
5Xiyyooliin kee qara-qabeeyyii dha, onnee diinota mootichaas in waraanu, sabni warri kaan immoo si jalatti in kufu.
6Teessoon kee inni Waaqayyo siif kenne, yeroo hundumaaf kan bara baraa ti, uleen mootummaa kees ulee qajeelummaa ti;
7ati qajeelina jaallattee jal'ina jibbite, kanaaf Waaqayyo gooftaan kee dibata gammachuutiin si dibee, hiriyoota kee akka caaltu in godhe*.
8Uffanni kee hundinuu qumbiidhaan, sabiriidhaan, solloqqee muka urgooftuutiin in gilimbisa; mana mootummaa isa ilka arbaatiin miidhagfame keessaas, sagaleen mi'a ribuu qabuun dhageessifamu si gammachiisa;
9intaloonni moototaa warra si biratti ulfina argatan keessa jiru; misirroon warqee biyya Ofiir naqattes gara mirga kee in dhaabatti.[162]
10Dhaga'i yaa intalo, as ilaali, gurra kees as qabi, namoota kee, mana abbaa kees irraanfadhu!
11Mootichi miidhagummaa keetiif si hawwa, inni gooftaa kee waan ta'eef, ati ulfina isaaf kenni!
12Namoonni Xiiroosii fi sooressonni biyyaa, harka-fudhaa isaanii fidanii sitti dhi'aachuu in barbaadu.
13Intalli mootii uffata warqeedhaan kuulame uffattee, ulfinaan diinqa ishee jirti;
14uffata ishee isa kuula baay'ee qabuun gara mootichaatti in geeffamti, durboonni ishee geggeessanis ishee wajjin gara isaa in dhaqu;
15yommus isaan gammachuu fi ililleedhaan geggeeffamanii, mana mootichaatti ol in galu.
16Ilmaan kee iddoo abboota kee in bu'u, ati lafa hundumaatti akka isaan biyya mo'an in goota;
17dhalootaa hamma dhaloota hundumaatti, maqaan kee galataan akka yaadatamu nan godha; kanaafis namoonni lafa irraa yeroo hundumaa bara baraan si jajatu.