MACAAFA FAARFANNAA 5:1-12 GAZB1997 - Bible AI

¹Yaa Waaqayyo, gurra kee gara dubbii kootti qabi, isa ani hasaasee sitti himadhus yaadatti anaaf fudhadhu!

²Ani sin kadhadha yaa mootii ko, yaa Waaqayyoo ko, sagalee iyya kootii dhaggeeffadhu!

³Yaa Waaqayyo ganama sagaleen koo si biratti in dhaga'ama, ganama ofii koo siif nan qopheessa, gara kees nan ilaala.

⁴Ati yaa Waaqayyo, isa jal'inni itti tolu miti'o, hamaanis si bira hin buufatu.

⁵Warri of jajanis ija kee dura hin dhaabatan, warra wanta waa'ee hin baafne hojjetan hundumaas in jibbita.

⁶Warra soba dubbatan lafa irraa in balleessita, Waaqayyo warra dhiiga namaa dhangalaasanii fi warra nama wallaalchisan in ciigga'a.

⁷Ani garuu gaarummaa kee isa baay'eedhaan gara mana keetti ol galuun anaaf kennameera; ulfinaan si sodaachuudhaanis, gara mana qulqullummaa keetti gara galee kufee siif nan sagada*.

⁸Yaa Waaqayyo, sababii warri adeemsa koo caqasan jiraniif, ati qajeelummaa keetiin na geggeessi! Karaa kees fuula koo duratti anaaf qajeelchi![10]

⁹Afaan warra akkasii keessaa dubbiin dhaabataan hin ba'u, keessa mar'umaan isaanii badiisatu jira, afaan isaaniitiin gara awwaala banamaatti nama geessu, arraba dhadhaa dibatanii in dubbatu*.

¹⁰Egaa isaan si irratti ka'aniiru, yaa Waaqayyo, yakkitoota ta'uu isaanii beeksisi! Isaan haa kufan, mareen isaaniis lafatti haa hafu! Baay'ina irra-daddarbaa isaaniitiif bakkeetti isaan gati![11]

¹¹Warri kooluu sitti galan hundinuu garuu haa gammadan, bara baraanis haa ililchan! Ati warra maqaa kee jaallatan waan eegduuf; isaan sitti haa gammadan!

¹²Yaa Waaqayyo, ati nama qajeelaa in eebbifta, tolli kees karaa hundumaa gaachana in ta'aaf.