MACAAFA FAARFANNAA 55:1-23 GAZB1997 - Bible AI

¹Yaa Waaqayyo, gurra kee gara kadhata kootti qabi, himata koo jalaas hin didin!

²Ati ana dhaggeeffadhu, anaaf deebisis! Dhibeen koo na joorsee nagaa na dhowweera.

³Diinonni anatti in iyyu, namoonni jal'oonni gad na qabu, isaan badiisa na irratti in fidu, aarii isaaniitiinis diina anatti in ta'u.

⁴Keessa kootti lapheen koo in sirba; naasuun du'aas ana irratti lafa in dha'e.

⁵Sodaanii fi rom'i na qabatan, pherpheramnis guutummaatti na raase.

⁶Utuu ani akka gugee baallee qabaadhee, balali'ee iddoo tokko nan boqodhan ture.

⁷Silaa illee jalaa baqadhee achis fagaadhee, lafa namni hin jirre nan bubbulan ture.

⁸Qilleensa jabaadhaa fi bubbee jalaas, gara iddoo baqannaa kootti nan ariifadhan ture.

⁹Akka isaan wal hin hubanne godhi, afaan isaaniis gargar baasi, yaa gooftaa! Humnaan wal irratti ka'uu fi qoccolloo, mandarattii keessatti argeera.

¹⁰Halkanii fi guyyaas masaraa ishee irra in naanna'u, hamminni, jal'innis mandarattii keessa jira;

¹¹keessa ishee badiisatu jira, gabaa ishee keessaas nama gad qabuunii fi gowwoomsuun hin mittiqu*.[191]

¹²Diinatu ana arrabsa utuu ta'ee, nan baadhan ture; isa na jibbutu anatti of gurguddisa utuu ta'ee, isa duraa nan sokkan ture.

¹³Amma garuu situ kana godhe, si isa hiriyaa kootii, nama garaa kootii, nama ani ba'eessa godhee beekus,

¹⁴si isa haasaan keenya walitti miyaa'e, isa wajjin tuuta gidduu buunee gara mana Waaqayyoo dhaqne.

¹⁵Hamminni garaa isaanii fi mana isaanii keessa waan guuteef, isaan utuu itti hin yaadin du'i itti haa dhufu! Jiraatti gara iddoo lafa jalaatti gad haa bu'an*!

¹⁶Ani garuu Waaqayyoon nan waammadha, gooftichis ana in oolcha;

¹⁷galgalaa fi ganama, waareettis, isatti nan himadha, isatti nan boo'as, innis sagalee koo in dhaga'a.

¹⁸Warri ana irratti ka'an waan baay'ataniif, lola anatti ka'e keessaa lubbuu koo nagaatti galchi!

¹⁹Waaqayyo inni durii durii jalqabee teessoo isaa irra jiru, kana in dhaga'a; sababii isaan yaada garaa isaanii geddarachuu didanii, isas sodaachuu dhiisaniif, gad isaan in deebisa*.[192]

²⁰Inni hiriyaa koo ture sun, warra isaa wajjin nagaatti jiraatan irratti harka ol fudhate, kakuu isaas in cabse.

²¹Haasaan afaan isaatii akkuma dhadhaa ti, nama hin quuqu, garaa isaa keessa immoo lolatu jira; dubbiin isaas dibata caalaa in laafa, garuu akka billaa luqqifamee jiruu ti*.[193]

²²Wanta yaada sitti ta'u Waaqayyotti gatii dhiisi, inni akka ati hin kufnetti si irkisa! Namni qajeelaan raawwatee akka hin mittiqne in godha*.

²³Warri dhiiga namaa dhangalaasanii fi, warri haxxummaadhaan nama gowwoomsan garuu, boolla gad fagootti akka gad bu'an in goota; yaa Waaqayyo! Isaan bara jireenya isaanii hin walakkeessan; ani garuu sin amanadha.[194]