MACAAFA FAARFANNAA 63:1-11 GAZB1997 - Bible AI

¹Yaa Waaqayyo, ati Waaqayyo koo ti, ani sin barbaada; lubbuun koo akkuma bishaanii si dheebotti, akka lafti bishaan dhabee, gogee dhama of keessaa fixus, foon koo si yaadee in gaggaba*;

²kana irraa kan ka'es aangoo kee fi ulfina kee arguudhaaf iddoo kee isa qulqullaa'aa keessa ijaan sin barbaaddadhe.

³Gaarummaa kee argachuun, jireenya ani amma jiraadhu irra in wayya, kanaafis arrabni koo si jajata*;

⁴ani hamman jirutti sin galateeffadha, harka koo ol qabees maqaa kee nan waammadha.[213]

⁵Lubbuun koo akka waan ani coomaa fi dhuka nyaadheetti in quufti, afaan koo arraba ililleetiin si jajata.

⁶Lafa ciisicha kootti sin yaadadha, yeroon ilaalaa bulus waa'ee kee nan yaada*;

⁷ati gargaarsa anaaf taateetta, gaaddisa bobaa kee jalattis sagalee gammachuu nan dhageessisa*;

⁸lubbuun koo sitti in maxxana, harki kee mirgaas qajeelchee ol na qaba.[214]

⁹Warri jireenya koo balleessuu barbaadan garuu, boolla lafa jalaa isa gad fagoo keessa lixuuf jiru.

¹⁰Billaa afaan in bu'u, irbaata waangoos in ta'u.

¹¹Mootichi garuu Waaqayyotti in gammada, namni maqaa Waaqayyootiin kakatu hundinuu of in jaja; afaan warra sobduu immoo in cuqaalama.