MACAAFA FAARFANNAA 69:1-36 GAZB1997 - Bible AI

¹Ati ana oolchi, yaa Waaqayyo! Bishaan morma na ga'e;

²ani dhaqdhaqii keessatti nan liqimfame, miilli koos waan irra dhaabatu in dhabe; bishaan gad fagoo keessa nan lixe, humni bishaanii na fudhatee sokke.

³Amma immoo wawwaachuu iyyuu nan dadhabe, laagaanis na babbaqaqe; ija qisee Waaqayyoon eeggachuu irraa kan ka'es, iji koo arguu dadhabe;

⁴warri sababii malee ana jibban, rifeensa mataa kootii irra in baay'atu; diinonni koo warri sobduun warri ana balleessuu barbaadan, baay'ee dha; wanta ani hin saamin ?Iddoo isaatti deebisi!? naan jedhu*.[235]

⁵Yaa Waaqayyo, ati gowwummaa koo in beekta, wanti ani balleesses tokko illee si duraa hin dhokanne.

⁶Yaa Waaqayyo gooftaa maccaa, warri si abdatan sababii koof jedhanii hin yeellaasifamin! Yaa Waaqayyo isa kan Israa'el, warri si barbaadan sababii koof jedhanii hin qaaneffamin!

⁷Ani siif jedhee arrabsoo baadheera, yeelloonis ana irra buufameera*;

⁸ani obboloota kootti orma, haadha koottis alagaa nan ta'e*.[236]

⁹Mana keetiif hinaafuun na gube, arrabsoon ittiin si arrabsanis ana irra bu'e*;

¹⁰soomuun koo, lubbuu koos dhiphisuun koo arrabsoodhaaf anaaf ta'e.

¹¹Uffata gaddaa nan uffadhe, isaaniif garuu nama mammaaksaa nan ta'e.

¹²Warri karra mandarichaa dura taa'an waa'ee koo in dubbatu, warri machooftuunis waa'ee koo in weeddisu*.[237]

¹³Ani garuu yaa Waaqayyo, yeroo si biratti fudhatamaa ta'etti, kadhata koo sittan dhi'eeffadha; yaa Waaqayyo, akka gaarummaa kee isa guddaatti gargaarsa kee isa amanamaadhaan anaaf deebisi*!

¹⁴Ani akka hin liqimfamnetti dhoqqee keessaa na baasi, warra na jibban jalaa, bishaan gad fagoo keessaas akkan ba'u godhi!

¹⁵Humni bishaanii na fudhatee hin sokkin, tuujjubni ana hin nyaatin! Boolli na liqimsee afaan isaa ana irratti hin cufamin![238]

¹⁶Arjummaa kee isa gaariidhaan, deebii anaaf deebisi, yaa Waaqayyo! Gara-laafummaa kee isa baay'eedhaanis na ilaali!

¹⁷Fuula kee garbicha kee duraa hin dhoksin; ani rakkina keessa waanan jiruuf, ariifadhuu deebii anaaf kenni!

¹⁸Anatti dhi'aadhuu na furi, dhiibbii diinota kootiif jedhii na oolchi!

¹⁹Arrabsamuu koo, yeellaasifamuu koo, salphifamuu koos ati in beekta; warri ana cunqursan hundinuu si dura jiru.

²⁰Arrabsoon garaa koo rukuteera, anis miidhameera; namni anaaf oo'a jedheen abdadhe, garuu nan dhabe; na jajjabeessu jedhees nan eeggadhe, garuu hin arganne.

²¹Hadhaa akkan nyaadhuuf anaaf kennan, dhugaatii dhangaggaa'es dheebuuf akka ani dhuguuf anatti hiixatan*.[239]

²²Buddeenni maaddii isaanii irraa isaan haa qabu, warri nagaadhaan walii wajjin taa'anis kiyyootti haa galan!

²³Akka isaan hin arginetti iji isaanii haa jaamu; yeroo hundumaa mudhiin isaanii akka hin jabaanne godhi*!

²⁴Dheekkamsa kee isaan irratti roobsi, aariin kee inni boba'aanis isaan haa qaqqabu!

²⁵Buufanni isaanii haa onu, godoo isaanii keessas namni hin jiraatin*!

²⁶Isaanoo isa ati reebde in ari'atu, waa'ee dhiphina namicha ati madeessitees in haasa'u.

²⁷Yakka isaanii irratti yakka akka dabalataniif isaan dhiisi, gara qajeelummaa keetti isaan hin fidin!

²⁸Macaafa warri jiraatoonni itti caafaman keessaa maqaan isaanii haa balleeffamu, isaan warra qajeelotaa wajjin hin caafamin*![240]

²⁹Ani garuu gadadamaa dha, dhiphataa dhas, gargaarsi kee ol ana haa qabu, yaa Waaqayyo!

³⁰Weedduudhaan maqaa Waaqayyoo nan jajadha, galataanis guddina isaa nan hima.

³¹Kun korma yookiis tuntunoo isa gaanfaa fi kottee qabu dhi'eessuu caalaa, Waaqayyotti in tola*.

³²Warri gad qabaman kana arganii haa gammadan, isin warri Waaqayyoon barbaaddattan, garaan keessan haa bayyaannatu*!

³³Waaqayyo warra dhabaniif in dhaga'a, saba isaa warra hidhamanis hin tuffatu*.[241]

³⁴Bantiin waaqaa, lafti, galaanni gurguddaan, wanti isaan keessaa munyuuqan hundinuus isa haa jajan!

³⁵Waaqayyo mandara Xiyoon in fayyisa, mandaroota Yihudaas deebisee in ijaara; hojjetoonni isaas isa keessa in jiraatu, biyyichas in qabaatu;

³⁶sanyiin isaaniis isa in dhaala, warri maqaa isaa jaallatanis isa keessa in jiraatu.