MACAAFA FAARFANNAA 81:1-16 GAZB1997 - Bible AI

¹Waaqayyo aangoo keenya waan ta'eef, ililchaa! Waaqayyo isa kan Yaaqoobitti gammaduu keessan dhageessisaa!

²Faarfannaa jalqabaa, dubbisa rukutaa, maseenqoo namatti toluu fi kiraara dhageessisaa!

³Baatii ji'aatti, goobana ji'aatti, guyyaa ayyaana keenyaattis fiinoo afuufaa*!

⁴Inni kun Israa'eliif seerrata, Waaqayyo isa kan Yaaqoob birattis, wanta qajeelaa ta'ee fudhatamee dha.

⁵Yeroo biyya Gibxi rukutuuf ba'e, inni abboommii isaaf dhugaa ba'u ijoollee Yoseef gidduu dhaabe; anis sagalee dur hin beekne tokko nan dhaga'e.[284]

⁶Innis, ?Gatiitii isaa ba'aa jalaa nan baase, harka isaas guuboo baachuu nan dhiisise*.

⁷Ati yeroo rakkinaatti in waammatte, ani immoo keessaa sin baase, golgaa duumessa kakawwee qabu keessaa siif dhaga'eera; bishaan morkii sana biratti si qoreera*.

⁸Dhaggeeffadhu yaa saba ko, ani waanan si gorsu qaba; yaa Israa'el, utuu anaaf dhageessee, attam gaarii dha!

⁹Waaqayyolii warra ormaa keessaa tokko illee si keessatti hin argamin, waaqayyolii warra kaaniifis hin sagadin*!

¹⁰Ani Waaqayyo gooftaa kee ti, anatu biyya Gibxiitii si baase; afaan kee as qabadhu, ani immoo siif nan guuta.[285]

¹¹?Sabni koo garuu sagalee koo dhaggeeffachuu in dide, Israa'el yaada kootti galuu hin barbaanne*.

¹²Isaan mata-jabeeyyii akka ta'aniif nan dhiise; yaada isaanii isa qopheessan duukaas in bu'an.

¹³Sabni koo utuu anaaf dhaga'ee, Israa'el utuu karaa koo irra adeemee,

¹⁴silaa ani immoo diinota isaa salphaatti nan gugguufsisa, hamajaajii isaa irrattis harka koo nan gara galfadha.

¹⁵Warri Waaqayyoon jibban isaaf in gugguufu, yeroon isaaniis hamma bara baraatti kanumaan dhumuu isaa ti.

¹⁶Ani immoo qamadii isa caaluun sin soora, damma holqa kattaa keessaa ba'uunis sin quufsa? jedhe*.[286]