MACAAFA FAARFANNAA 86:1-17 GAZB1997 - Bible AI

¹Yaa Waaqayyo, ani gadadamaa dha dhabaa dhas, gurra kee gara kootti qabi, na jalaa owwaadhus!

²Ani siif of kenneera ati lubbuu koo baraari, garbicha kee isa si amanatu ati gargaari! Ati Waaqayyo koo ti!

³Ani guyyaa guutuu gara keetti nan iyya, ati araara anatti argisiisi, yaa gooftaa!

⁴Ani hawwa lubbuu koo gara keetti ol nan kaafadha, yaa gooftaa, ati lubbuu garbicha kee gammachiisi!

⁵Yaa gooftaa, ati gaarii dha, jaalala keetiinis namaaf cubbuu isaa in dhiifta, warra si waammatan hundumaafis gaarummaan kee in baay'ata*.

⁶Yaa Waaqayyo, kadhata koo gurratti fudhadhu, isa ani sitti himachuuf iyyus yaadaan anaaf qabi!

⁷Ati waan anaaf owwaattuuf, ani guyyaa rakkina kootti sin waammadha*.[298]

⁸Waaqayyolii keessa kan akka kee tokko illee hin jiru, yaa gooftaa! Waan hojjetame keessaas kan akka hojii kee hin jiru*.

⁹Sabni ati uumte hundinuu in dhufu, fuula kee durattis in gombifamu, yaa gooftaa! Maqaa keetiifis ulfina in kennu*.

¹⁰Ati guddaa dha, hojiin kees dinqisiisaa dha, si'uma duwwaatu Waaqayyo![299]

¹¹Ani siif amanamee akkan deddeebi'utti, yaa Waaqayyo, karaa kee na barsiisi, maqaa kee safeeffachuufis nama garaa tokkichaa na godhi*!

¹²Yaa Waaqayyo gooftaa ko, ani garaa koo guutuudhaan sin galateeffadha, bara baraanis maqaa keetiif ulfina nan kenna.

¹³Gaarummaan ati ana argisiifte guddaa dha, ati lubbuu koo boolla lafa jalaa isa gad fagoo keessaa baafteetta*.[300]

¹⁴Yaa Waaqayyo, warri gad-dhiisatti jiraatan ana irratti ka'an, gareen warra nama sodaachisaniis jireenya koo balleessuu in barbaadu; isaan kun of dura si hin buufanne.

¹⁵Ati garuu yaa gooftaa, Waaqayyo oo'a-qabeessaa fi araara-qabeessa; aariitti suuta jetta, gaarummaan kee fi amanamummaan kee immoo guddaa dha*.

¹⁶Gara kootti gara gali, araara anatti argisiisi, humna kee garbicha keetiif kenni, ilma garbittii keetiis oolchi!

¹⁷Milikkinni gaarummaa kee ana irratti akka argamu godhi, yaa Waaqayyo, akka ati na gargaarte, akka ati na jajjabeessites, warri ana jibban arganii haa yeella'an.[301]