MACAAFA FAARFANNAA 88:1-18 GAZB1997 - Bible AI

¹Yaa Waaqayyo gooftaa ana fayyiftuu, guyyaa gara keetti nan iyyadha, halkanis fuula kee duratti nan wawwaadha.

²Kadhanni koo si bira anaaf haa ga'u, ati immoo gurra kee gara boo'icha kootti qabi!

³Lubbuun koo rakkina quufteetti, jireenyi koos boolla lafa jalaa isa gad fagootti dhi'aateera.

⁴Ani warra gara boollichaa dhaqanitti nan lakkaa'ame, akka nama humna hin qabnees nan ta'e;

⁵ani akka nama warra du'an keessatti gatamee, akka isa waraanamee awwaala keessa ciisuu, akka warra ati deebitee hin yaadannee nan ta'e; eegumsi harka kee isaan kana irraa citeera*.

⁶Ati boollicha gara jalaa keessa, iddoo dukkanaa'aa fi gad fagoo keessa na buufte.

⁷Dheekkamsi kee ulfaatee ana irra in ciisa, dha'aa kee hundumaas ana irra dambaliisifte*.[303]

⁸Firoonni koo akka ana dhi'eessan, ani immoo isaanitti wanta nama jibbisiisu akkan ta'u gooteetta; akka ani jalaa hin baanettis balballi anatti cufameera*.

⁹Gadduu koo irraa kan ka'e iji koo dadhabaa in adeema, guyyuma guyyaatti ani sin waammadha, yaa Waaqayyo! Harka koo gara keetti nan diriirsa.[304]

¹⁰Ati warra du'aniif dinqii hojjettaa ree? Yookiis ekeraan si jajuuf in ka'uu ree?

¹¹Awwaala keessatti gaarummaan kee, lafa badiisaattis amanamummaan kee in himamaa ree?

¹²Hojiin kee inni dinqisiisaan dukkana keessatti, yookiis qajeelummaan kee biyya wanti hundinuu itti irraanfatame sanatti in beekamaa ree*?[305]

¹³Ani garuu yaa Waaqayyo, gargaarsaaf gara keetti nan iyyadha, ganamas kadhanni koo si duratti in dhi'aata.

¹⁴Yaa Waaqayyo, maaliif of irraa na fageessita? Fuula kees maaliif ana duraa dhoksita?

¹⁵Ijoollummaa kootii jalqabee gadadamaa, du'attis kanan dhi'aadhee dha, naasisuu kee baadhee, waanan godhu wallaaleera.

¹⁶Dheekkamsi kee inni boba'aan na irra bu'eera, naasisuun kees badduu na baaseera.

¹⁷Isaan guyyaa guutuu akka lolaa na marsan, gara hundumaanis naanna'anii karaa anatti in cufan.

¹⁸Jaalalleen koo fi firoonni koo akka ana irraa fagaatan in goote, ammas dukkana duwwaatu hiriyaa koo ti!