MACAAFA FAARFANNAA 9:1-20 GAZB1997 - Bible AI

¹Garaa koo guutuudhaan sin galateeffadha yaa Waaqayyo! Gocha dinqisiisaa ati goote hundumaas nan hima*.

²Ani sitti nan gammada, nan burraaqas; maqaa kees faarfannaadhaan nan jajadha, yaa aabba!

³Kunis diinonni koo gara booddee isaanii waan deebi'aniif, kufaniis fuula kee duraa waan balleeffamaniif;

⁴ati dubbii koo ilaaltee anaaf faraddeetta, abbaa firdii isa qajeelaa waan taateef, barcuma firdii irra teesseetta.[21]

⁵Ati saba lafa irraa hundumaa ifattee, warra jal'ootas balleessitee, maqaan isaaniis yeroo hundumaa baruma baraan akka hin yaadatamne in goote.

⁶Diinonni bara baraan caccabanii dhumaniiru, ati mandaroota isaanii iddoodhaa balleessiteetta, seenaan isaaniis badeera*.[22]

⁷Waaqayyo immoo bara baraan teessoo isaa irra jira, barcuma firdii isaas jabeessee dhaabateera.

⁸Inni biyya lafaa qajeelummaadhaan in seerrata, saba hundumaafis firdii qajeelaa in kenna*.

⁹Waaqayyo, warra gad qabamaniif da'oo ol jedhaa dha, isaan yeroo rakkinaatti da'oo isa in godhatu.[23]

¹⁰Yaa Waaqayyo, warri maqaa kee beekan kooluu sitti in galu, ati warra si barbaadan hin ganne'o.

¹¹Waaqayyoon isa Xiyoon irra teessoo isaa dhaabate faarfannaadhaan jajadhaa! Hojii isaa hundumaas saba lafa irraatti labsaa!

¹²Inni dhiiga dhangala'eef gumaa baasu, warra gadadamoo in yaadata, wawwaannaa isaaniis hin irraanfatu*.[24]

¹³Yaa Waaqayyo anaaf oo'i! Gadadamuu koo isa warra na jibban biraa anatti dhufe ilaali! Afaan boollaa irra yoon ga'e iyyuu, ati ol na deebisi*!

¹⁴Yommus ani waanan ittiin si jajadhu hundumaa karra Xiyoon keessatti nan hima, na gargaaruu keetiifis walga'ii ijoollee ishee duratti guddaa nan gammada*.

¹⁵Sabni lafa irraa boolla ofii isaaniitii qotanitti gad in liqimfaman; kiyyoodhuma dhoksaniinis miilli isaanii in qabame*.

¹⁶Waaqayyo, firdii kennuu isaatiin of beeksise, namni jal'aan waan harka isaatiin hojjeteen in korokkodame. [Sagalee mi'a ribuu qabutu gidduutti dhageessifame.][25]

¹⁷Warri jal'oonni gara iddoo lafa jalaatti gad haa bu'an, lafa irraa warri Waaqayyoon irraanfatanis akkasuma gad haa lixan.

¹⁸Warri wanta barbaachisaa dhaban, irraanfatamanii hin hafan, abdiin warra gadadamoos bara baraan hin badu*.

¹⁹Yaa Waaqayyo, humni namaa harka akka hin fudhannetti, ati ka'i! Sabni lafa irraa si duratti firdii akka fudhatan godhi*!

²⁰Yaa Waaqayyo, sabni lafa irraa namootuma foon uffatan duwwaa ta'uu isaanii akka beekaniif, ati pherpheramuu isaanitti fidi![26]