MACAAFA FAARFANNAA 94:1-23 GAZB1997 - Bible AI

¹Yaa Waaqayyo, gooftaa gumaa baaftuu, ati Waaqayyo, inni gumaa baaftu, ifa kee keessaan mul'adhu*!

²Yaa abbaa firdii lafa kanaa ka'i! Warra hamaa hojjetanii ittiin of jajan, hojii isaanii mataa isaaniitti deebisi*!

³Yaa Waaqayyo, jal'oonni hamma yoomiitti akkasitti turu? Jal'oonni hamma yoomiitti gammaduu isaanii argisiisu*?

⁴Dubbii salphinaa gad in jijjigsu, warri hamaa godhan hundinuu of in gurguddisu.[327]

⁵Yaa Waaqayyo, isaan saba kee in caccabsu, warra dhuunfaa keetiis gad in qabu.

⁶Isaan haadha hiyyeessaa, galaas in gorra'u, warra abbaan irra hin jirres in ajjeesu.

⁷Isaan, ?Gooftichi hin argu, Waaqayyo inni kan Yaaqoob yaadaan hin qabu? in jedhu*.[328]

⁸Saba keessaa warri wallaaloo taatan hubadhaa! Isin warri gowwoonni yoom ogeeyyii taatu?

⁹Inni gurra namaaf dhaabe ofii isaatii hin dhaga'uu ree? Inni ija tolche ofii isaatii hin arguu ree*?

¹⁰Inni saba lafa irraa gorsee deebisu, inni beekumsa nama barsiisu, ofii isaatii hin adabuu ree?

¹¹Gooftichi wanta namni yaadu, namni akka qilleensa shuf jedhuu duwwaa ta'uu isaas in beeka*.[329]

¹²Yaa Waaqayyo, namni ati gorsitee deebiftu, inni ati seera kee barsiiftus gammachuu qaba*!

¹³Hamma nama jal'aadhaaf boolli qotamutti, barsiisuu keetiin guyyaa rakkinaatti ati boqonnaa isaaf in laatta.

¹⁴Waaqayyo saba isaa hin buusu, warra dhuunfaa isaa ta'anis hin dhiisu!

¹⁵Firdiin gara qajeelummaatti in deebi'a, gara-qajeelonni hundinuu isa duukaa in bu'u.[330]

¹⁶Eenyutu ka'ee anaaf jedhee warra jal'ootaan morma? Eenyutus warra hamaa hojjetaniin mormuudhaaf gara koo dhaabata?

¹⁷Waaqayyo utuu ana hin gargaarre ta'ee, silaa yowwana lubbuun koo biyya warra cal jedhanii keessa buufatteetti*!

¹⁸Yeroo ani, ?Miilli koo in sigigaate? jedhetti, gaarummaan kee qabee na oolche, yaa Waaqayyo!

¹⁹Yeroo yaaddoon garaa kootti baay'atu, ati na jajjabeessitee lubbuu koo in gammachiifta*.[331]

²⁰Namni badiisa namatti fiduudhaaf barcuma firdii irra taa'u, inni seera jal'isee wanta hamaa nama irratti qopheessus, sii wajjin walitti hidhachuu in danda'aa ree?

²¹Isaan jireenya nama qajeelaa irratti in gamtatu, dhiiga nama balleessaa hin qabneetti dhangala'uu in muru.

²²Waaqayyo garuu da'oo anaaf ta'eera, Waaqayyo kattaa ani kooluu itti galuu dha.

²³Inni yakka isaanii mataa isaaniitti in deebisa, jal'ina isaaniitiifis lafa irraa isaan in balleessa, Waaqayyo keenya gooftichi lafa irraa isaan in balleessa.