MUL'ATA YOHANNIS 21:1-27 GAZB1997 - Bible AI

¹Kana booddees, ani bantii waaqaa haaraadhaa fi lafa haaraa nan arge; bantiin waaqaa inni duraa lafti inni duraas darbaniiru, galaannis deebi'ee hin argamu*.

²Yerusaalem mandarri qulqullittiin isheen haaraan, Waaqayyo biraa bantii waaqaa keessaa, akka misirroo dhirsa isheetiif kuulamtetti, qophooftee utuu gad buutuu nan arge*.

³Yommus ani sagalee guddaa tokko nan dhaga'e; innis teessoo sana biraa, ?Kunoo iddoon Waaqayyo buufatu namoota gidduu dha, inni isaan bira buufachuuf jira, isaanis saba isaa ta'uuf jiru; Waaqayyo ofii isaa isaanii wajjin jiraachuuf jira, Waaqayyo isaaniis ta'uuf jira*.

⁴Inni imimmaan hundumaa ija isaaniittii in haqa; wanti duraa waan darbeef, egaa duuni deebi'ee hin argamu, gadduun, iyyuun, waraansis si'achi hin jiru!? jedhe*.[110]

⁵Inni teessoo irra taa'e immoo, ?Kunoo ani waan hundumaa haaraa nan godha!? jedhe; itti dabalees, ?Dubbiin kun amanamaa, dhugaas waan ta'eef, kana caafi!? naan jedhe*.

⁶Akkasumas, ?Ta'eera! Ani Alfaa dha, Omeegaa dhas, isa jalqabaa ti isa dhumaa tis; ani isa dheeboteef burqituu bishaan isa jireenya kennu irraa tola nan kennaaf*.

⁷Inni mo'u kana itti darbee argachuuf jira; ani Waaqayyo isaa nan ta'a, innis ilma koo in ta'a*.

⁸Qoodi warra lugnootaa, warra amantii hin qabnee, warra ciigga'amoo, warra gumaa, warra halalee, warra qoricha namatti godhanii, warra waaqayyolii tolfaman waaqessanii, warra sobduu hundumaas garuu, kuufama ibiddii fi dhagaan boba'u keessaa balalchu in ta'a; innis du'a lammaffaa dha? naan jedhe*.[111]

⁹Ergasii ergamoota torban warra waciitii torba dha'icha gara dhumaa torban keessa guutan of harkaa qabu turan keessaa inni tokko dhufee, anatti dubbatee, ?Kottu! Ishee misirroo, haadha manaa hoolichaa sitti nan argisiisa!? jedhe*.

¹⁰Hafuuraanis ol fuudhee gara tulluu guddaa dheeraa tokkootti na geesse; Yerusaalem mandara qulqullittii Waaqayyo biraa bantii waaqaa keessaa gad buutus anatti in argisiise*.

¹¹Isheen ulfina Waaqayyoo qabdi, calaqqisi ishees akka dhagaa baay'ee gati-jabeessaa, akka Yaasphis, qullaa'aa akka cabbii tis.

¹²Masaraa guddaa dheeraa qabdi turte, masarichis karra kudha lama qaba; karra sana irras ergamoota kudha lamatu ture. Mataa karra sanaa irratti maqaan gosa ijoollee Israa'el kudha lamaan caafamee jira*;

¹³karaa ba'a-biiftuu karra sadii, karaa harka bitaa karra sadii, karaa harka mirgaa karra sadii, karaa lixa-biiftuu karra sadiitu turan.

¹⁴Hundeen masaraa sanaa kan irra dhaabate immoo dhagoota kudha lama, isaan irratti immoo maqaan ergamoota hoolichaa warra bartoota isaa turan kudha lamaanii caafamee jira.[112]

¹⁵Ergamaan inni anatti dubbates, mandarattii, karra ishee, masaraa ishees safaruudhaaf ulee safaraa warqee irraa hojjetame tokko qaba ture*.

¹⁶Mandarattiin gara arfaniin wal qixxee, hojjaan ishee fi garaan ishees tokkicha ture. Ergamichis ulee safaraa isaatiin mandarattii in safare, gar tokkoon ishees kiilo metrii kuma lamaa fi dhibba sadii in ta'e; hojjaan ishee, garaan ishee, ol ka'inni ishees wal qixxee ture*.

¹⁷Masaraa ishees in safare, innis akka safara dhundhuma namaa, ergamichi ittiin safaretti, dhundhuma dhibbaa fi afurtamii afur ta'e.

¹⁸Masaraan ishee dhagaa Yaasphis irraa hojjetame; mandarattiin immoo warqee qullaa'aa isa akka of ilaalee qullaa'aa keessaan waa arganiitiin ijaaramte.

¹⁹Hundeen masaraa mandarattii dhagaa gati-jabeessa adda addaatiin miidhagfamee ture. Dhagaa gati-jabeessi hundeen irra dhaabate sunis inni duraa Yaasphis, inni lammaffaan Safiiros, inni sadaffaan Kaalqedon, inni afuraffaan Simaaragidos*,

²⁰inni shanaffaan Sardoniikis, inni ja'affaan Saardiyon, inni torbaffaan Krisoliixos, inni saddeetaffaan Beerilos, inni salgaffaan Tophaaziyon, inni kurnaffaan Krisophraasos, inni kudha tokkoffaan Hiiyaakinxos, inni kudha lammaffaan Ametiisxos ture.

²¹Karri kudha lamaan callee gati-jabeeyyii kudha lama turan, karri sunis adduma addaan callee gati-jabeessa tokko irraa hojjetaman; karaan mandarattii sanaa warqee qulqulluu isa akka of-ilaalee keessaan waa argamu irraa hojjetame*.[113]

²²Manni qulqullummaa ishee Waaqayyo gooftaa isa hundumaa danda'uu fi hoolicha waan ta'eef, ani mana qulqullummaa tokko illee mandarattii keessatti hin argine.

²³Biiftuun yookiis ji'i mandarattii irratti ibsuun barbaachisaa miti; ulfinni Waaqayyoo ifa ishee ti, hoolichis ibsaa ishee ti*!

²⁴Sabni ifa isheetiin in deddeebi'u, mootonni biyya lafaas wanta ulfina qabu isaan bira jiru, gara isheetti in fidu*.

²⁵Karri ishee matumaa guyyaadhaan hin cufaman, halkan immoo achi hin jiru*.

²⁶Wanti ulfina-qabeessi, wanti gati-qabeessi saba biyya lafaa bira jiru gara isheetti in fidama.

²⁷Macaafa hoolichaa isa warri jireenya argachuuf jiran keessatti caafaman sana keessatti, warra argaman duwwaa malee, wanti xuraa'aan tokko illee, warri wanta ciiggaasisaa yookiis wanta sobaa hojjetan tokko illee achitti hin galan*.[114]