MUL'ATA YOHANNIS 5:1-14 GAZB1997 - Bible AI

¹Yommus ani mirga isa teessoo irra taa'e sanaatti macaafa maramee taa'u tokko nan arge; macaafichis keessaa fi duubaan caafamee, erga cufamee immoo mallattoo torbaan mallateeffamee ture*.

²Ergamaa aango-qabeessa sagalee isaa dhageessisee, ?Mallattoo macaafichi ittiin cufame irraa kute macaaficha banuudhaaf kan male eenyu?? jedhee labsu tokkos nan arge.

³Waaqa keessaa, lafa irraa, lafa jalaas tokko illee macaaficha banee keessa isaa ilaaluu hin dandeenye.

⁴Tokko illee macaaficha banee, keessa isaa ilaaluuf kan male waan hin argaminiif, baay'isee nan boo'e.

⁵Maanguddoota keessaa inni tokko immoo, ?Hin boo'in! Kunoo, leencichi gosa Yihudaa, hidda Daawit keessaa ka'ee mo'eera, inni mallattoo sana torban kutee macaaficha banuu in danda'a? naan jedhe*.[28]

⁶Teessicha duras uumama lubbuu qaban arfanii fi maanguddoota gidduu hoolaa waan qalame fakkaatee dhaabatu tokko nan arge. Hoolichi gaanfa torbaa fi ija torba qaba ture; isaan torban kun hafuurota Waaqayyoof hojjechuudhaaf guutummaa biyya lafaatti ergamanii dha*.

⁷Hoolichi yeroo sanatti dhaqee harka mirgaa isa teessoo irra taa'ee jiru keessaa macaaficha fudhate.

⁸Yommuu inni macaaficha fudhates uumamni lubbuu qaban arfan, maanguddoonni digdamii arfanis hoolicha duratti in gombifaman. Adda addaan kiraaraa fi qodaa ixaana itti aarsan, isa warqee irraa hojjetame of harkaa qabu; ixaanni qodicha keessa guutee ture; innis kadhata warra Waaqayyoof qulqullaa'anii ti*.

⁹Isaan faarfannaa haaraa yommuu faarfatan,

⁹?Ati macaaficha fudhachuudhaaf, mallattoo isaas banuudhaaf kan maltee dha; ati ofii keetii qalamtee, gosa hundumaa keessaa, afaan hundumaa keessaa, nama hundumaa keessaa, saba hundumaa keessaas, namoota dhiiga keetiin Waaqayyoof bitte*.

¹⁰Waaqayyo keenyaaf mootummaadhaaf, luboota isaas akka ta'an isaan godhatte, isaanis lafa irratti mo'uuf jiru? jedhan*.[29]

¹¹Kana booddee ani ergamoota baay'ee teessichatti, uumama lubbuu qaban sanatti, maanguddoota sanattis naanna'an nan arge; lakkoobsi isaaniis kumaatama, kuma kumaatamaas ture; sagalee isaaniis nan dhaga'e*.

¹²Isaan sagalee guddaadhaan, ?Hoolichi inni qalame aangoo, badhaadhummaa, ogummaa, humna, ulfina, guddina, hooqubaa fudhachuuf kan malee dha? jedhan*.

¹³Wanti waaqa irratti, lafa irratti, lafa jalatti, galaana keessatti uumamee, isaan keessa jirus hundinuu,

¹³?Hooqubaan, ulfinni, guddinni, aangoon, isa teessoo irra taa'ee jiru sanaaf, hoolichaafis baraa hamma bara baraatti haa ta'u!? jechuu isaanii nan dhaga'e*.

¹⁴Uumamni lubbuu qaban arfanis, ?Ameen!? jedhan; maanguddoonnis gombifamanii sagadan*.[30]