MUL'ATA YOHANNIS 6:1-17 GAZB1997 - Bible AI

¹Kana booddee hoolichi mallattoowwan torban keessaa isa tokko utuu banuu nan arge; uumama lubbuu qaban arfan keessaa immoo inni tokko sagalee akka kakawweetiin, ?Kottu!? jechuu isaa nan dhaga'e*.

²Ani achi ilaaleen farda adii tokko arge; inni fardicha irra taa'e immoo iddaa harkatti qabate; gonfoon tokkos isaaf in kenname. Inni mo'aa, ammas mo'uudhaaf in ba'e*.[31]

³Yeroo hoolichi mallattoo isa lammaffaa bane immoo, uumamni lubbuu qabu inni lammaffaan, ?Kottu!? jechuu isaa nan dhaga'e*.

⁴Fardi biraa diimaa biluun tokkos in ba'e; isa fardicha irra taa'eef immoo nagaa lafa irraa balleessuuf, namoonnis akka wal gorra'an gochuun in kennameef; akkasumas billaan guddaan tokko isaaf in kenname*.[32]

⁵Yeroo hoolichi mallattoo isa sadaffaa bane immoo, uumamni lubbuu qabu inni sadaffaan, ?Kottu!? jechuu isaa nan dhaga'e. Anis achi ilaaleen farda gurraacha tokko arge; inni fardicha irra taa'es madaalii of harkaa qaba ture*.

⁶Yommus ani wanta sagalee fakkaatu, isa uumama lubbuu qaban arfan gidduudhaa, ?Qamadii safartuu xinnoo tokko gatii dadhabbii guyyaa tokkoo, garbuu safartuu xinnoo sadiis gatii dadhabbii guyyaa tokkoo godhi! Ejersaa fi muka waynii garuu hin miidhin!? jedhu nan dhaga'e*.[33]

⁷Yeroo hoolichi mallattoo isa afuraffaa bane immoo, sagaleen uumama lubbuu qabu isa afuraffaa, ?Kottu!? jechuu isaa nan dhaga'e.

⁸Yommus ani achi ilaaleen farda baalqajjii tokko arge. Inni fardicha irra taa'es maqaan isaa ?Du'a? in jedhama, mootummaan warra du'aniis isa duukaa adeeme. Lafa kana irratti harka afur keessaa harka tokko, billaadhaan, beelaan, dha'ichaan, bineensa caakkaatiin akka ajjeesaniif aboon isaaniif in kenname*.[34]

⁹Yeroo hoolichi mallattoo isa shanaffaa bane immoo, ani iddoo aarsaa jalatti lubbuu warra dubbii Waaqayyootiif, wanta dhugaa ba'aa turanitti jabaachuu isaaniitiifis jedhanii qalamanii nan arge*.

¹⁰Isaan sagalee guddaadhaan iyyanii, ?Yaa gooftaa guddaa, qulqulluu fi dhuga-qabeessaa! Warra lafa irra jiraatanitti nuuf faraddee hamma dhiiga keenyaaf gumaa nuuf baaftutti hammam tura?? jedhan*.

¹¹Yommus adduma addaan uffanni adaadiin isaaniif kenname, obboloonni isaanii, hojii Waaqayyoo keessatti hidhati isaanii, warri akkuma isaanii ajjeefamuuf jiran hamma raawwatanii gumaa'anitti, yeroo xinnoo dabalanii akka aara galfatan isaanitti himame*.[35]

¹²Kana booddee hoolichi mallattoo isa ja'affaa banuu isaa nan arge. Socho'a lafaa guddaa tokkotu ta'e; biiftuunis akka cilaattii eelee in taate, ji'i guutummaatti akka dhiigaa diimate*.

¹³Akka ija harbuu qilleensi jabaan raasee harcaasutti, urjoonni waaqa keessaa lafatti gad harca'an*.

¹⁴Waaqni tarsa'ee gargar baafame, akka macaafa maramuu danda'utti in marame; tulluun, biyyi bishaan keessaa hundinuus iddoo isaaniitii in butaman*.

¹⁵Kana booddee, mootonni lafa kana irraa, namoonni gurguddoonni, abboonni duulaa, sooreyyiin, jajjaboonni, garbichi, birmaduunis hundinuu holqa keessa, kattaa tullootaa gidduus in dhokatan*.

¹⁶Tullootaa fi kattaawwanis waammatanii, ?Nu irratti jigaa, fuula isa teessoo irra taa'uu duraa, dheekkamsa hoolichaa duraas nu dhoksaa*!

¹⁷Guyyaan guddaan inni itti isaan kun dheekkaman dhufeera; egaa eenyutu dura dhaabachuu danda'a ree?? jedhan*.[36]