Macaafa Ermiyaas Raajichaa 14:1-22 GAZB1997 - Bible AI

¹Dubbiin Waaqayyo waa'ee caamsaatiif ana Ermiyaasitti dubbate kanatti fufee jira;

²?Yihudaan in boossi, mandaroonni ishees gad deebi'aniiru, warri ishee keessa jiraatan biyyattiidhaaf gadduu irraa kan ka'e, daaraa in uffatan; Yerusaalem keessaas iyyi in dhaga'ama.

³Warri gurguddoonni, hojjetoota isaanii bishaan barbaaduutti in ergu; isaan gara boolla bishaanii yommuu dhaqan garuu, bishaan achii hin argatan; waan godhan dhabanii, qaana'anii haguuggataniis, okkotee duwwaa baatanii gara manaatti in deebi'u.

⁴Bokkaan waan hin roobiniif lafti gogee in dadayya'a, warri qottuunis qaana'anii in haguuggatu.

⁵Borofni marga waan dhabdeef, bakkee itti dhalte sanatti ilmoo ishee dhiiftee in adeemti.

⁶Harroonni diidaa gaara margi irra hin jirre irra dhaabatanii, akka waangoo qilleensa in suufu; marga waan dhabaniifis iji isaanii arguu in dhaba? jedhe*.[92]

⁷Yaa Waaqayyo, yakki keenya nu irratti yoo dhugaa ba'e iyyuu, ati maqaa keetiif jedhii nu gargaari! Nuyi si'a baay'ee si irraa gara gallee turre, si durattis cubbuu hojjenneerra*.

⁸Yaa abdii Israa'el, yaa isa yeroo gidiraa isheetti fayyisaa ishee taatee! Ati maaliif biyya kanatti akka keessummaa isa bulee darbuu taate*?

⁹Ati maaliif akka nama waan godhu wallaalee dhaabatuu taate? Goota of oolchuu dadhabes maaliif fakkaatta? Yaa Waaqayyo, ati nu gidduu jirta, maqaa keetiin in waamamna'o, nu hin gatin*![93]

¹⁰Waaqayyo waa'ee saba kanaaf wanta kanatti fufee jiru dubbatee, ?Isaan asii fi achi labuu in jaallatu, of qabuus hin dandeenye; kanaaf ani immoo isaanitti hin gammadu, amma ani yakka isaanii nan yaadadha, sababii cubbuu isaaniitiifis isaan nan adaba? jedhe*.

¹¹Yommus Waaqayyo anatti dubbatee, ?Sabni kun wanta ba'eessa akka argatuuf hin kadhatin*!

¹²Isaan soomanii yoo kadhatanis ani isaaniif hin dhaga'u; aarsaa gubamuu fi kennaa midhaanii yoo dhi'eessanis ani isaaniif hin fudhadhu; ani billaadhaan, beelaan, dha'ichaanis isaan nan balleessa? jedhe*.[94]

¹³Yommus ani immoo deebisee, ?Kunoo, yaa Waaqayyo gooftaa raajonni saba kanaan, ?Waaqayyo iddoo kanatti nagaa amansiisaa isiniif nan kenna waan jedheef, billaan isinitti hin dhufu, beellis isin hin argatu? in jedhu? nan jedhe.

¹⁴Waaqayyo immoo anaan, ?Raajonni sun maqaa kootiin raajii sobaa dubbatan malee, ani isaan hin ergine, ani isaan hin abboomne, isaanittis hin dubbanne; isaan mul'ata sobaa, hooda waa'ee hin baafne, gowwoomsaa garaa isaanii keessatti yaadanii qopheessanis isinitti raajii in dubbatu*;

¹⁵kanaaf raajonni warri utuu ani isaan hin ergin maqaa kootiin raajii dubbatanii, ?Billaa fi beelli biyya kanatti hin dhufu? jedhan sun, ofii isaaniitii billaadhaa fi beelaan in dhumu*.

¹⁶Saba warra isaan raajii itti dubbatan sanatti hammina isaanii mataa isaaniitti waanan deebisuuf, billaa fi beela irraa kan ka'e, karaa mandara Yerusaalem keessa jiru irratti kukkufanii in hafu; namni isaanii fi niitota isaanii, ilmaan isaanii fi intaloota isaanii lafaa fuudhee awwaalus hin jiru? jedhe*.[95]

¹⁷Kanaaf Waaqayyo waa'ee gadda kootii saba kanatti akkan himuuf na abboomee, ?Isaaniinis, ?Mandarri saba kootii isheen hin tuqamin rukuttaa gaddisiisaadhaan rukutamtee caba guddaa waan cabdeef, ani halkanii fi guyyaa utuu wal irraa hin kutin, imimmaan koo nan lolaasa*.

¹⁸Bakkee keessa yommuun adeemu, kunoo, warra billaan fixe nan arga; mandara keessa yommuun lixu immoo, warra beelli fixuu ga'e nan arga raajonnii fi luboonni garuu waan tokko iyyuu utuu hin hubatin, biyya keessa asii fi achi in jooru? jedhi!? naan jedhe.[96]

¹⁹Yaa Waaqayyo, ati Yihudaa raawwattee in gattee? Xiyooniinis in tuffattee ree? Ati maaliif nuyi akka fayyuu hin dandeenyetti nu rukutte? Nuyi nagaatu dhufa jennee abdanne, garuu wanti gaariin hin dhufne; yeroon nuyi itti fayyinu in dhufa jennee eegganne, kunoo, waan nu naasisutu dhufe*.

²⁰Yaa Waaqayyo, nuyi si duratti cubbuu waan hojjenneef, jal'ina keenya beekneerra, yakka abboota keenyaas argineerra*.

²¹Kakuu nuuf galte yaadadhu malee, isa hin cabsin! Maqaa keetiif jedhii nu hin tuffatin, teessoo ulfinaa kees hin salphisin*!

²²Waaqayyolii tolfamoo saba warra kaanii keessaa, bokkaa roobsuu kan danda'u jiraa ree? Yookiis bantiin waaqaa ofii isaatiin bokkaa in roobsaa ree? Yaa Waaqayyo gooftaa keenyaa! Si malee, kana hundumaa gochuu kan danda'u hin jiru, kanaafis nuyi si abdanna*.[97]