Macaafa Ermiyaas Raajichaa 17:1-27 GAZB1997 - Bible AI

¹Waaqayyo, ?Cubbuun saba Yihudaa bir'ii sibiilaatiin, arfii dhagaa almaaziitiinis gabatee garaa isaanii fi gaanfa iddoowwan aarsaa isaanii irratti caafameera*.

²Yommus ilmaan isaanii iddoo aarsaa isaanii fi utuboota waaqayyittii tolfamtuu isaanii, warra mukkeetii baalli isaanii lalisu jalaa fi gaarota ol ka'oo irra dhaabaman in yaadatu.

³Isin yaa warra tulloota irratti sagaddanii, ani kunoo, sababii cubbuu keessaniitiif badhaadhummaan keessanii fi qabeenyi biyya keessan keessa jiru hundinuu, akka saamamu nan godha*.

⁴Balleessaan keessan biyya ani dhaala godhee isiniif kenne isin in dhabsiisa; biyya isin hin beekne keessatti, diinota keessaniif akka isin hojjettan nan godha; ibiddi isin na aarsuudhaan qabsiiftan, yeroo hundumaa in boba'a? jedhe*.[109]

⁵Ammas Waaqayyo itti fufee, ?Namni nama amanatu, jabina irree foonii kan abdatu, yaada isaas Waaqayyo irraa kan deebisu abaaramaa dha*.

⁶Inni akka muka baalli irraa harca'ee, kophaa isaa lafa onaa keessa ijaajjuu, isa akka lafa gogaa waa biqilchu hin dandeenyee, akka lafa soogiddaa iddoo namni keessa hin jiraanne keessatti argamuu ti; wanti gaariin yommuu dhufus arguu hin danda'u.[110]

⁷?Garuu namni ana Waaqayyoon amanatu, ana duwwaattis kan of kennu, haa gammadu!

⁸Namni akkasii akka muka yaa'aa bishaanii qarqara dhaabamee, hidda isaa gara bishaaniitti yaafatuu ti; mukichi ho'i yommuu dhufu hin sodaatu, yeroo hundaa in lalisa, caamsaan isa hin yaaddessu, yeroo yeroottis ija in godhata*.[111]

⁹?Garaan namaa waan hundumaa irra jal'aa dha, namnis isa qajeelchuu hin danda'u; egaa eenyutu isa beekuu danda'a ree*?

¹⁰Ani Waaqayyo garaa namaa fi yaada namaa isa dhokataa qoree nan ilaala; nama hundumaafis akka akeeka isaatii fi akka ija hojii isaatiitti nan kennaaf? jedhe*.

¹¹Namni jal'inaan badhaadhummaa walitti qabatu, akka goggorii hanqaaquu ammattee hin yaasin haftuu ti; qabeenyi sun walakkaa bara jireenya namichaa keessa isa dhiisee in dhuma, namichis gara dhumaatti akka nama gowwaa harka qullaa in hafa*.[112]

¹²Manni qulqullummaa keenya lafa teessoon ulfina-qabeessi, inni durii durii jalqabee iddoo ol ka'aa irra jiru, itti argamuu dha*;

¹³yaa Waaqayyo, yaa abdii Israa'el, warri sittii gargar ba'an hundinuu in yeella'u; si isa burqaa bishaan jireenyaa ta'e dhiisanii, waan si irraa gara galaniif, akka maqaa awwaara irratti caafamee dafanii in badu*.[113]

¹⁴Yaa Waaqayyo, ati jajannaa koo ti'o, na fayyisi, yommus ani nan fayya; ati na oolchi, yommus ani nan oola*.

¹⁵Kunoo! Namoonni, ?Wanti Waaqayyo dubbate meerree? Mee amma haa raawwatamu kaa!? in jedhu*.

¹⁶Ani garuu akka ati na abboomtetti, tiksee ta'uu hin dhiifne; barri hamaan biyya kana irratti akka dhufus hin hawwine; wanti ani dubbadhe hundinuus si biratti beekamaa dha.

¹⁷Ati yeroo rakkinaatti iddoo itti baqannaa kootii ti'o, ana hin sodaachisin!

¹⁸Warri ana ari'atan haa yeellaasifaman, ana garuu yeellootti dabarsitee hin kennin! Isaan haa sodaachifaman, ana garuu sodaachifamuutti dabarsitee hin kennin! Bara rakkinaa isaanitti fidii, dha'icha dachaa lama isaanitti buusi*![114]

¹⁹Waaqayyo, ?Dhaqii, karra sabni ittiin ol lixu, karra isa mootonni Yihudaa ittiin ol lixanii gad ba'an dura, karrawwan Yerusaalem hundumaa duras dhaabadhuutii,

²⁰?Isin mootonni Yihudaa, isin sabni biyya Yihudaa keessa jiraattan hundinuu, warri Yerusaalem, warri karrawwan kanaan ol galtan hundinuus dubbii Waaqayyoo dhaga'aa!? jedhiin!? jedhee anatti dubbate.

²¹Waaqayyo, ?Lubbuu keessaniif of eeggadhaa, guyyaa Sanbataa ba'aa hin baatinaa, dallaa Yerusaalemittis ol hin galchinaa!

²²Akkuma ani abboota keessan abboomee ture, guyyaa Sanbataa qulqullinatti eegaa malee, guyyaa sanatti ba'aa baattanii mana keessanii hin ba'inaa, hojii tokko illees hin hojjetinaa*!

²³Isaan garuu boquu jabaatanii gorsa fudhachuu didan malee, anaaf hin dhageenye, anaafis hin abboomamne*.[115]

²⁴?Isin immoo gaarii gootanii anaaf yoo dhageessan, guyyaa Sanbataatti dallaa mandara kanaatti ba'aa ol galchuu yoo dhiiftan, gaafas hojii hojjechuu dhiiftanii qulqullinatti yoo isa eegdan,

²⁵yommus mootonni teessoo Daawit irra taa'anii fi gurguddoonni biyyaa konkolaataa fi fardeen isaaniitiin, namoota Yihudaa fi warra mandara Yerusaalemii wajjin dallaa mandara kanaatti ol in galu; mandarattii kana keessas bara baraan namni in jiraata*.

²⁶Yommus namoonni mandaroota Yihudaa keessaa, gandeen naannoo Yerusaalem keessaa, kutaa biyya Benyaamiin keessaa, biyya gaaraa keessaa, biyya dachaa keessaa, biyya gara-mirgaa keessaas qalma gubamu, aarsaa, kennaa midhaanii, ixaanaa fi kennaa galataa gara mana qulqullummaa kootiitti in fidu;

²⁷isin garuu anaaf dhaga'uu yoo diddan, guyyaa Sanbataa qulqullinatti eeguu yoo dhiiftan, guyyaa sanattis ba'aa baattan dallaa Yerusaalemitti yoo ol galchitan, ani immoo karrawwan isheetti ibidda nan qabsiisa, innis masaraa Yerusaalem in fixa, kan isa dhaamsuu danda'us hin jiru? jedhe*.[116]