Macaafa Ermiyaas Raajichaa 46:1-28 GAZB1997 - Bible AI

¹Dubbiin Waaqayyoo inni waa'ee saba lafa irraatiif gara ana Ermiyaas dhufe, kanatti fufee jira;

²Yehoyaaqiim ilmi Yosiyaas Yihudaa irratti mo'ee waggaa afuraffaa isaatti bara Fara'oon Nekoon mootiin biyya Gibxii Nebukadnezaar mootii Baabilonitti duulee mandara Karkemiish isa laga Efraaxiisitti dhi'oo jiru keessatti mo'ame, kun biyya Gibxii fi loltoota ishee irratti dubbatame*.

³Inni, ?Gaachana guddaa fi xinnaa qopheeffadhaa, lolaafis ba'aa!

⁴Fardeen fe'adhaatii yaabbadhaa, gonfoo sibiilaa kaa'adhaatii dhi'aadhaa! Eeboo keessan qaradhaa, madaa sibiilaa uffadhaa!

⁵Ani attamittan utuu isaan sodaatanii baqatanii arga? Gootonni isaanii warri jajjaboonni mo'amanii in baqatan, gara booddee utuu hin mil'atin sodaatanii jalaa in fiigan, sodaanis karaa hundaa isaan in marse*.[266]

⁶?Warri baay'ee fiigan duraa ba'u, warri jajjaboonnis jalaa ba'uu hin danda'an; isaan biyya gara bitaa, qarqara laga Efraaxiisitti, gufatanii kufanii in hafu.

⁷Inni akka galaana Abbayyaa ol ka'u, inni akka bishaan guutee manii irra dhangala'us lafa sochoosaa yaa'u kun eenyu?

⁸Gibxi akka galaana Abbayyaa ol in ka'a, akka bishaan guutee manii irra dhangala'us lafa in sochoosa; Gibxi, ?Ani ol ka'ee lafa hundumaa nan uffisa, mandarootaa fi namoota isaan keessa jiraatan nan balleessa;

⁹yaa abboota fardeenii ka'aa, warri konkolaataa ooftanis ariitiidhaan fiigsisaa! Isin warri gaachana baatan, yaa gootota Kuush, yaa gootota Fux, isin warri iddaa qabattan, yaa gootota Lud, isin warri iddaa qabachuuf ittiin hojjechuu beektan ka'aatii fiigaa!? jedhe.

¹⁰?Guyyaan sun guyyaa Waaqayyo gooftaa maccaa, guyyaa inni itti diinota isaa irratti ijaa baafatuu dha; billaan hamma quufutti isaan in nyaata, hamma machaa'uttis dhiiga isaanii in dhuga; Waaqayyo gooftaan maccaa, biyya gara bitaatti, galaana Efraaxiis biratti, aarsaa qalamu isaan in godhata*.

¹¹Isin yaa saba Gibxi, warra akka durbaa, gara Giil'aad dhaqaatii qoricha dibatamu bitadhaa! Isin akkasumaan qoricha baay'ee barbaaddu, inni homaa isin fayyisuu hin danda'u*.

¹²Yeella'uun keessan saba lafa irraa biratti dhaga'ameera, iyyi keessanis lafa irra guuteera; gootni goota gufatee lachuun isaanii walii wajjin kufaniiru? jedhe.[267]

¹³Nebukadnezaar mootiin Baabilon dhufee biyya Gibxii rukutuuf akka jiru Waaqayyo akka kanatti fufee jirutti ana Ermiyaasitti in dubbate*.

¹⁴Inni, ? ?Billaan warra naannoo keessan jiraatan fixuuf waan jedhuuf, ka'aatii lolaaf qophaa'aa!? jedhiitii warra Gibxiitti himi! Warra mandara Miigdol, mandara Nofii fi mandara Taahafenee keessa jiraatanitti labsi*!

¹⁵Gootonni kee maaliif jabaatanii dhaabachuu dadhabanii kufu? Waaqayyo waan isaan darbatuuf kufu;

¹⁶isaan ammaa amma gufatanii wal irratti in kukkufu, walii walii isaaniittis, ?Kottaa gara saba keenyaatti in deebinaa, gara biyya itti dhalanne in dhaqnaa, billaa diinotaa kana jalaas in baqannaa!? jedhanii in dubbatu.

¹⁷Isaan achitti, ?Fara'oon mootiin Gibxii nama afaaniitti, yeroon isaaf murame duraa darbeera? jedhanii sagalee guddaadhaan in dubbatu? jedhe*.[268]

¹⁸Waaqayyo gooftaan maccaa inni mootichi, ? ?Dhugaa ana isa jiraataa, namni akka tulluu Taabor isa tulloota gidduudhaa mul'atu, akka tulluu Qarmelos isa galaana bukkee dhaabatu, jabaatu tokko in dhufa? jedhe*.

¹⁹Isin warri biyya Gibxii keessa jiraattan, booji'amuudhaaf mi'a keessan xaxadhaatii qopheeffadhaa! Mandarri Noof diigamee one, kan namni keessa hin jiraanne in ta'a*.[269]

²⁰?Gibxi akka goromsaa miidhagduu dha, garuu qarxaasaan ishee ciniinu biyya gara-bitaatii dhufee dhugumaan ishee irra in qubata*.

²¹Yommus loltoonni isheen bitatte biyya ishee keessa jiraatan, warri akka tuntunoo sooramanii coomanis immoo deebi'anii baqatanii in sokku; yeroon isaan itti adabamanii fi yeroon badiisaa waan isaanitti dhufeef, isaan keessaa tokko illee dhaabatee kan hafu hin jiru.

²²Diinonni akka nama muka muru, qottoo mirmirsaa yommuu isaanitti dhufan, warri Gibxii akka bofa yaa'utti hasaasaa isaan jalaa in baqatu;

²³isaan caakkaa warra Gibxii isa gobbuu, isa namni lixuu hin dandeenye murmuranii in fixu; lakkoobsi isaanii akka hawaannisaa baay'ee waan ta'eef, namni isaan lakkaa'uu hin danda'u; kana ana Waaqayyotu dubbate.

²⁴Yommus warri Gibxii saba warra biyya gara-bitaatii dhufutti dabarfamanii in kennamu, in yeellaasifamus? jedhe.[270]

²⁵Waaqayyo gooftaan maccaa, Waaqayyo inni kan Israa'el, ?Kunoo! Amoon Waaqayyo tolfamaa isa mandara Tebes keessa jiru, biyya Gibxii fi mootii ishee akkasumas waaqayyolii ishee, gurguddoota ishee, warra mooticha amanatan hundumaas nan adaba*;

²⁶Nebukadnezaar mootii Baabilonii fi loltoota isaa warra lubbuu isaanii balleessuu barbaaddanitti dabarsee isaan nan kenna; kana booddee garuu deebi'anii biyyattii keessa akka isaanii duriitti in jiraatu; kana ana Waaqayyotu dubbate*.

²⁷Yaa garboota ko, yaa sanyii Yaaqoob hin sodaatinaa, yaa saba Israa'el hin na'inaa! Ani kunoo! Biyya fagoodhaa isin nan fida, sanyii keessanis iddoo isaan itti booji'amanii nan baasa; sanyiin Yaaqoob achitti deebi'anii bir'aa malee nagaatti in jiraatu; kan isaan sodaachisus hin jiru.

²⁸Yaa garboota ko, yaa sanyii Yaaqoob, ani isinii wajjin waanan jiruuf, hin sodaatinaa! Saba warran keessa isin tamsaase hundumaa nan balleessa, isiniin garuu qajeelummaadhaan adabeen deebisa malee, raawwadhee isin hin balleessu; isin adabuu garuu hin dhiisu? jedhe; kana Waaqayyotu dubbate*.[271]