Macaafa Ermiyaas Raajichaa 50:1-46 GAZB1997 - Bible AI

¹Dubbiin Waaqayyo waa'ee biyya Baabilonii fi waa'ee warra Kaldootaa karaa ana Ermiyaas dubbate kanatti fufe jira;

²Dubbichis, ?Faajjii ol fuudhiitii lallabii saba lafa irraatti himi! ?Namni hundinuu haa dhaga'u! Baabilon in qabamti, waaqayyolii tolfamoonni ishee in yeellaasifamu, Maarduk Waaqayyo tolfamaan isaanii in caccaba, bifni fakkeenya Waaqayyo tolfamaa inni ciiggaasisaanis caccabee in hurraa'a? jedhii himi malee, waan tokko illee hin dhoksin*!

³Sabni tokko biyya gara bitaatii dhufee ishee rukutee in onsa, namnii fi horiin achi keessaa baqatanii in ba'u; namni tokko illees achi keessa jiraachuu hin danda'u*.[291]

⁴?Bara sanatti, yeroo sanattis sabni mootummaa Israa'elii fi mootummaa Yihudaa keessaa boo'aa walii wajjin lafa itti booji'amanii ba'anii ana Waaqayyoon gooftaa isaanii in barbaaddatu; kana ana Waaqayyotu dubbate*.

⁵Yommus isaan fuula isaanii gara Xiyoonitti deebisanii karaa gara isheetti geessu iyyaafachaa, ?Kottaa! Kakuu bara baraan hin irraanfatamne, Waaqayyoof in gallaa!? waliin jedhaa in adeemu*.[292]

⁶?Sabni koo akka hoolota tiksoonni isaanii gara tulluutti of irraa isaan oofanii, karaa wallaalchisanii, ta'anii turan; isaan tulloota irra, gaara irras asii fi achi in jooran; iddoo dur itti boqonnaa argachaa turanis in irraanfatan*.

⁷Warri isaan argan hundinuu bineensa isaanitti in ta'an, diinonni isaanii immoo, ?Sababii isaan, Waaqayyo isa tiksee isaanii isa dhugaa ta'e, isa abboonni isaanii abdachaa turan duratti cubbuu hojjetaniif, wanti nuyi isaan irratti hojjenne balleessaa nutti hin ta'u? in jedhu.[293]

⁸?Biyya Baabilon keessaa baqadhaa! warra Kaldootaa keessaas ba'aa! akkuma korbeessi reettii karri yommuu banamu dura bu'ee ba'u, akkasuma isinis dafaatii ba'aa*!

⁹Ani kunoo, saba baay'ee walitti gamtatee, biyya gara bitaatii Baabilon irratti nan kaasa; isaan isheetti qophaa'anii ishee lolanii in qabatu; warra lolatti beekan waan ta'aniifis, xiyyi isaanii waa utuu hin godhin lafa hin bu'u*.

¹⁰Biyyi Baabilon in saamamti, warri ishee saaman hundinuus garaa in ciibsatu; ani Waaqayyo kana dubbadheera.[294]

¹¹?Isin warri biyya koo saamtan, gammaddanii yoo ililchitan iyyuu, akka jiboota midhaan siribsiisanii yoo burraaqxan iyyuu, akka fardeeniis yoo himimsitan iyyuu,

¹²biyyi keessan isheen akka haadha isin deessetti ilaalamtu in yeellaasifamti; isheen biyya keessaa ishee gad deebitu, biyya onaa fi biyya gogaa homtuu keessa hin jirre in taati.

¹³Sababii ani Waaqayyo isheetti dheekkameef ontee in hafti, namni ishee keessa hin jiraatu; warri karaa darban hundinuu Baabilon bira yommuu darban, sababii dha'icha ishee irra ga'e kanaaf na'anii afaan in qabatu*.[295]

¹⁴?Isin warri iddaadhaan loltan hundinuu, Baabilonitti naanna'aatii marsaa! Isheen ana Waaqayyo duratti cubbuu waan hojjetteef, xiyya keessan hin qusatinaatii isheetti gad dhiisaa!

¹⁵Karaa hundumaa isheetti naanna'aa iyyaatii ishee wareersaa! Ani Waaqayyo ishee irratti ijaa waanan baafadhuuf, isheen harka ishee in kenniti, masaraan ishee in jiga, kellaan ishees in diigama; akkuma isheen warra kaan gootes akkasuma ishee irratti hojjedhaa, ijaas itti baafadhaa*!

¹⁶Nama sanyii facaasuuf nama midhaan haamu biyya Baabilon keessaa fixaa! Warri ormaa hundinuus warra biyyicha rukutan jalaa gara biyya isaaniitti haa deebi'an, gara saba isaaniittis haa baqatan![296]

¹⁷?Sabni Israa'el akka hoolaa leenci ari'u in tatamsa'an; duraan dursee mootii biyya Asortu qabee isaan nyaate, itti aanse immoo Nebukadnezaar mootii Baabilontu lafee isaanii caccabse*.

¹⁸Kanaaf ani Waaqayyo gooftaan maccaa, Waaqayyo inni kan Israa'el, ?Kunoo, ani mootii Asor akkuman adabe, akkasuma mootii Baabilon, biyya isaas nan adaba*.

¹⁹Israa'elin immoo lafa isaanii duriitti nan deebisa, wanta tulloota Qarmelosii fi Baashaan irraa galfatanis in nyaatu; akaakuu midhaan barbaadanii hundumaas gaara Efreemii fi gaara Giil'aad irraa galfatanii itti in gammadu? jedhe*.

²⁰Bara sanatti, yeroo sanattis yakki Israa'elii fi cubbuun Yihudaa in qoratama; garuu warran hambise hundumaaf yakka isaanii waanan dhiiseef, tokko illee isaan irratti hin argamu; ani Waaqayyo kana dubbadheera? kan jedhu ture*.[297]

²¹Waaqayyo itti fufee, ?Warra biyya Meraataayim irratti, warra Pheqod keessa jiraatan irrattis ka'aatii rukutaa! Isaan ari'aa, isaan ajjeesaa, raawwadhaas isaan balleessaa! Wanta ani isin abboomu hundumaas godhaa*!

²²Badiisi guddaan waan itti dhufeef, sagaleen lolaa biyyicha keessaa in dhaga'ama.

²³Baabilon isheen guutummaa biyya lafaa irratti akka buruusaa turte, amma immoo attamitti saba biyya lafaa keessaa caccabdee onte*!

²⁴Yaa Baabilon, ani kiyyoo si dura kaa'eera, atis qabamteetta; ati garuu isa hin beekne; ana Waaqayyo irratti waan kaateef, qabamtee in argamte.

²⁵Ani Waaqayyo gooftaan maccaa, biyya warra Kaldootaa irratti waanan hojjedhu waanan qabuuf, ani mana mi'a lolaa isa kan kootii banee, mi'a dheekkamsa kootii gad baaseera;

²⁶biyya fagoodhaa kottaatii isheetti duulaa, gombisaa ishee banaa! Ona ishee diigaatii tuulaa, raawwadhaas ishee balleessaa! Waan tokko illee achitti hin hambisinaa!

²⁷Jajjaboota ishee hundumaa gara iddoo itti ajjeesanitti geessaatii gorra'aa, yeroon isaanii ga'ee, barri isaan itti adabamanis waan dhufeef, isaaniif wayyoo!? jedhe*.

²⁸Sagalee warra Baabilon keessaa baqatanii jalaa ba'anii dhaggeeffadhaa! Isaan Waaqayyo gooftaan keenya ijaa akka baafate mandara Xiyoon keessatti in himu, inni ijaa mana qulqullummaa isaatii akka baafate in odeessu*.[298]

²⁹Waaqayyo, ?Sababii isheen ana Waaqayyo isa qulqulluu kan Israa'el irratti of bokoksiteef, warra xiyya darbachuutti beekaman Baabilon irratti waamaa! Warri iddaa baatan hundinuu isheetti marsanii haa buufatan! Namni tokko illee mandarattii keessaa hin ba'in! Akkuma isheen warra kaan irratti hojjechaa turte, ishee irratti hojjedhaa! Adaba isheedhaaf ta'u kennaaf*!

³⁰Yommus dargaggoonni ishee karaa mandara isheetii irratti kukuffifamanii in hafu, loltoonni ishee hundinuus in dhumu; ani Waaqayyo kana dubbadheera.

³¹Ati of tuultuu?? nana! Barri ani itti si adabu waan ga'eef, kunoo, ani Waaqayyo gooftaan maccaa si irratti nan ka'a*!

³²Isheen of tuultuun kun gufattee in kufti, namni lafaa ishee kaasu garuu hin jiru; ani mandaroota isheetti ibidda nan naqa, innis wanta naannoo ishee jiru hundumaa in guba? jedha.[299]

³³Ammas Waaqayyo gooftaan maccaa, ?Sabni Israa'elii fi sabni Yihudaa cunqurfamaniiru, warri isaan booji'an jabeessanii isaan qabatanii gad dhiisuu didaniiru;

³⁴inni isaan gargaaru garuu jabaa dha, maqaan isaa Waaqayyo gooftaa maccaa ti; inni isaaniif in dubbata, biyyattiidhaaf nagaa in kenna, warra Baabilon keessa jiraatan garuu nagaa in dhowwata*.[300]

³⁵?Warra Kaldootaa irratti, warra Baabilon keessa jiraatan irratti, gurguddoota isaanii fi ogeessota isaanii irratti lolli haa dhufu! Ani Waaqayyo kana dubbadheera.

³⁶Raajota sobduu irratti billaan haa dhufu! Isaanis gowwoota haa ta'an! Loltoota ishee warra jajjaboo irratti billaan haa dhufu, isaanis na'anii humni isaan haa bu'u*!

³⁷Fardeen ishee fi konkolaattota ishee irratti billaan haa dhufu, orma warra isheedhaaf bitaman irratti billaan haa dhufu! Dadhaboos haa ta'an! Badhaadhummaa ishee irratti billaan yommuu dhufu haa saamaman*!

³⁸Caamsaan biyya ishee irratti haa dhufu, bishaan ishees haa gogsu! Biyyichi waaqayyolii tolfamoodhaan waan guuteef, fakkeenya waaqayyolii tolfamoo warra ciiggaasisoo kanaan of in jaju;

³⁹kanaaf bineensonni caakkaatti galan, guchiin, waangoon, waraabessis isheetti in galu; namni garuu dhalootaa hamma dhalootaatti achitti hin galu, bara baraanis achi keessa hin jiraatu*.

⁴⁰Sodoomii fi Gomoraa mandaroota naannoo isaanii jiran hundumaa wajjin akkuman diigee balleesse, akkasuma ishee kanas diigee nan balleessa; namni tokko illee deebi'ee achitti galee keessa hin jiraatu; ani Waaqayyo kana dubbadheera*.[301]

⁴¹?Kunoo! Sabni guddaan tokko biyya gara bitaatii ka'ee in dhufa, mootonni jajjaboonnis andaara lafaatii ka'anii in dhufu*;

⁴²loltoonni isaanii iddaa fi eeboo in qabatu, isaan gara jabeeyyii dha, araaras hin beekan; yaa Baabilon, isaan lolaaf hidhatanii, fardaan si loluudhaaf yommuu dhufan, sagaleen isaanii akka galaanaa in huursa*;

⁴³mootiin Baabilon akka isaan dhufan yommuu dhaga'u, harki isaa in laafa, naasuunis isa in qabata; akka dubartii ciniinsifattuus in ta'a.[302]

⁴⁴?Akkuma leenci caakkaa laga Yordaanos isa gobbuu keessaa gara bakkee marga lalisaatti ol ba'u, kunoo, anis akkasuma dingata Baabilonitti ol nan ba'a, namoota ishees achi keessaa nan ari'a; isan ofii kootii fo'adhes ishee irratti nan moosisa; egaa kan akka kootii jiraa ree? Namni, ?Kana maaliif goote?? naan jedhus argamaa ree? Mootiin ana dura dhaabatee na dhowwuu danda'us meerre ree*?

⁴⁵Kanaaf wanta ani Waaqayyo biyya Baabilon irratti fiduuf yaadee jiru, akeeka ani warra Kaldootaa irratti qopheesse jirus dhaga'aa! Ijoolleen isaanii akka ilmoolee bushaayee bineensi qabatetti humnaan in fudhatamu, kaloon isaaniis raawwatee in ona.

⁴⁶?Baabilon in qabamte? yommuu jedhan lafti in socho'a, boo'ichi biyyattiis saba lafa irraa hundumaa biratti in dhaga'ama? jedhe.[303]