Macaafa Ermiyaas Raajichaa 51:1-64 GAZB1997 - Bible AI

¹Ammas Waaqayyo itti fufee, ?Kunoo! Ani Baabilonitti, saba ishee gidduudhaa warra anaan mormanittis, bubbee isaan balleessu nan kaasa*.

²Orma isa akka nama midhaan qilleensatti kennee gingilchutti, biyyattii gingilchee balleessu itti nan erga; guyyaan badiisa ishee yommuu ga'u, karaa hundumaa isheetti in ka'u*.

³Loltuu ishee isa xiyya darbatu, akka inni iddaa isaa jabeeffatu, madaa sibiilaa isaas akka inni uffatu hin godhin! Dargaggoota isheetiif hin hilin, loltoota ishee hundumaas raawwadhuu balleessi*!

⁴Warri madaa cimaadhaan madaa'anii fi warri ajjeefaman, karaa mandara Baabilon keessa in cicciisu;

⁵biyyichi utuma ana isa qulqulluu isa kan Israa'el duratti yakkaan guute iyyuu, ani Waaqayyo gooftaan maccaa, Waaqayyo inni hundumaa danda'u isin warra Israa'elii fi warra Yihudaa hin irraanfanne*.[304]

⁶?Egaa ka'aatii biyya Baabilon keessaa baqadhaa, yeroon ani Waaqayyo sababii yakka isheetiif isheetti faradu waan ga'eef, ani akka hojii isheetti isheef waanan kennuuf, isin yakka isheetiif akka hin dhumnetti, tokkon tokkon keessan baqadhaatii of oolchaa*!

⁷Baabilon harka koo keessatti, akka xoofoo warqee irraa hojjetamtee ti; isheen guutummaa biyya lafaa in macheessite, sabni lafa irraa daadhii waynii ishee dhuganii, in maraatan*.

⁸Baabilon dingata kuftee waan caccabduuf, isheedhaaf boo'aa! Tarii yoo fayyiteef madaa isheetiif dhadhaa ejersaa barbaadaa fidaa!? jedhe*.

⁹Sabni sun immoo deebisanii, ?Baabilon in fayyiti utuu ta'e, silaa ishee in gargaara ture; amma garuu yakki ishee duumessa keessa darbee, bantiiwwan waaqaa bira waan ga'eef, isheen fayyuu hin dandeessu; kanaaf ishee dhiifne adduma addaan, gara biyya keenyaatti in deebina? in jedhu*.

¹⁰Yommus sabni Israa'elii fi sabni Yihudaa, ?Waaqayyo dhugaa waan nuuf baaseef, kottaa gara Xiyoonitti ol baanee, wanta Waaqayyo keenya godhe in himnaa!? in jedhu*.[305]

¹¹Xiyya keessan qaradhaa, gaachana keessanis fudhadhaa! Waaqayyo, biyya Baabilon balleessuu waan barbaaduuf, mootota Medoon itti in kaase; inni akkasitti ijaa mana qulqullummaa isaa isa diigame in ba'e*.

¹²Faajjii ol kaasaatii masaraa Baabilon irra dhaabaa! Jabeessaatii egaa, loltoota karaa booddee riphanii eeggatanis isheetti godhaa! Waaqayyo wanta warra Baabilon irratti yaadee qopheesse amma fiixaan in baasa.

¹³Ati yaa ishee galaana gurguddaa bira jirtuu, yaa ishee badhaadhummaa danuu qabduu! Dhumni kee dhi'aateera, akka uffata dha'amee muramu jala ga'es ta'eera*.

¹⁴Waaqayyo gooftaan maccaa ofii isaatiin kakatee, ?Ani dhugumaan namoota akka gurmuu hawwaanisaa baay'atan biyya kee keessa nan guuta, isaanis si mo'anii weedduu mo'ichaa si irratti in weeddisu? jedhe*.[306]

¹⁵Waaqayyo lafa humna isaatiin uumeera, biyya lafaa ogummaa isaatiin jabeessee dhaabeera, beekumsa isaatiinis bantiiwwan waaqaa dhisee diriirseera;

¹⁶yommuu inni sagalee isaa dhageessisu, bokkaan bantii waaqaa keessaa in huursa; inni daarii lafaatii duumessa ol in kaasa, bokkaa keessas bakakkaa gad in buusa; qilleensas gombisaa isaa keessaa in baasa;

¹⁷namoonni hundinuu garuu beekumsa waan hin qabneef, in gowwoomu; warri warqee baqsan hundumti isaanii, waaqayyolii tolchan sanatti in yeella'u; bifni isaan baqsanii tolchan sun, wanta sobaa fi bifa hafuurri keessa hin jirree dha.

¹⁸Waaqayyoliin tolfamoonni kun, kan waa'ee hin baafnee dha, mi'a ga'oo tis; gaafa adabni isaanitti dhufu isaan in badu.

¹⁹Waaqayyo inni kan Yaaqoob garuu akka isaan kanaa miti; wanta hundumaa kan uume isa; inni dhaabata saba dhuunfaa isaatii ti maqaan isaas ?Waaqayyo gooftaa maccaa ti?*.[307]

²⁰Waaqayyo, ?Yaa namoota Baabilon, isin buruusa koo fi mi'a waraanaa koo, isan ittiin saba lafa irraa caccabsuu dha; isiniin mootummoota rukutee nan balleessa;

²¹isiniin fardeenii fi abboota fardeenii, konkolaattotaa fi warra isa oofan nan caccabsa;

²²isiniin dhiiraa fi dubartii, jaarsaa fi ijoollee, dargaggootaa fi durboota nan caccabsa;

²³isiniin tiksee fi karra bushaayee, qottuu fi qotiyyoo, warra biyya bulchanii fi gurguddoota biyyaa nan caccabsa.

²⁴Ani wanta hamaa isa warri Baabilonii fi warri Kaldootaa Xiyoon irratti hojjetan mataa isaaniitti yommuun deebisu isin arguuf jirtu; ani Waaqayyo kana dubbadheera*.[308]

²⁵?Yaa Baabilon, yaa tulluu balleessituu nana, kunoo, ani si irratti ka'eera! Ati guutummaa biyya lafaa waan balleessiteef, ani immoo harka koo si irratti ol fudhadhee, buqqisee sin konkolaachisa, tulluu ibiddaan gubames sin godha.

²⁶Ati bara baraan ontee in hafta, si'achi dhagaan golee si keessatti hin argamu, dhagaan hundeef ta'us si keessaa hin baafamu; ani Waaqayyo kana dubbadheera*.[309]

²⁷?Yaa saba lafa irraa, faajjii ol kaasaatii biyya keessa dhaabaa! Saba keessatti fiinoo afuufaa! Lolaaf saba qopheessaa! Mootummaa Araaraat, mootummaa Miinii fi Ashkenaaz, Baabilon irratti walitti sassaabaa! Lola kana kan geggeessu angafa loltuu itti godhaa, fardeen akka gurmuu hawwaanisaa** baay'atan gad itti dhiisaa*!

²⁸Mootonni biyya Miidiyaan warra biyya bulchanii fi gurguddoota isaanii hundumaa wajjin, biyyoonni warri biyya Miidiyaan jala bulanis lolaaf isheetti haa qophaa'an!

²⁹Wanti ani Waaqayyo biyya Baabilon balleessuuf, ishee onses kan namni keessa hin jiraanne gochuuf, yaadee qopheessee raawwatamuuf waan jiruuf, lafti sodaatee in rom'iti*.

³⁰Loltoonni Baabilon loluu dhiisanii, masaraa isaanii keessa calluma jedhanii in taa'an; humni isaan in bu'e, akka dubartiis in ta'an; manneen isaaniitti ibiddi in naqame, cufaan karra masaraa isheetiis in caccabe*.

³¹Mandarattiin karaa hundumaa akka qabamte, mootii Baabilonitti himuuf, namoonni wal hordofanii in fiigu turan.

³²Malkaan ce'umsaa qabamaniiru, riqaan keessa taa'anii diina of irraa eegan gubamaniiru, loltoonnis na'anii waan godhan wallaalaniiru? jedhe.[310]

³³Waaqayyo gooftaan maccaa, Waaqayyo inni kan Israa'el ammas itti fufee, ?Mandarri Baabilon akka oobdii midhaan keessatti siribsiifamuu in taati; yeroon namoonni ishee gad ciramanii keessatti dhidhiitaman dafee in dhufa;

³⁴warri Xiyoon keessa jiraatan, ?Nebukadnezaar mootiin Baabilon akka jawwee nu liqimsee, caccabsee nu nyaate, coomaan keenya garaa isaa in guutate; ergasii debasee nu tufee, akka qodaa duwwaatti lafa nu buuse.

³⁵Jal'inni Baabilon nuuf ijoollee keenya irratti hojjete isheedhuma irra haa bu'u!? jedhu; Yerusaalemis, ?Dhiigni koo warra Baabilon keessa jiraatan irraa haa barbaadamu!? in jetti.

³⁶Kanaaf kunoo! Ani sin gargaara, siif ijaa nan ba'a; galaana ishee fi burqaa bishaanii ishee nan gogsa; ani Waaqayyo kana dubbadheera*.

³⁷Mandarri Baabilon diigamtee in tuulamti, iddoo waangonni itti galan, iddoo namni ilaalee sodaatu, iddoo ga'oo, kan namni keessa jiraachuu hin dandeenyes in taati*.

³⁸Warri Baabilon hundumti isaanii akka leencaa in aadu, akka ilmoo leencaas in gururi'u;

³⁹isaan nyaata dhabanii yommuu gubatan, akka isaan gammadanitti, ani cidha isaaniif nan qopheessa, isaan nan macheessas; kana irraa kan ka'es hirriba bara baraa in rafu, deebi'aniis hin ka'an; ani Waaqayyo kana dubbadheera*.

⁴⁰Akka ilmoolee hoolaa, korbeeyyii hoolaa fi korbeeyyii reettii gara qalmaatti geeffamaniitti isaan gad deebi'anii akka oofaman nan godha.[311]

⁴¹?Baabilon isheen ?Sheshaak? jedhamtu attamitti kufte! Isheen guutummaan biyya lafaa ittiin of jajus attamitti qabamte! Attamittis saba lafa irraa gidduutti wanta namni ilaalee sodaatu taate*!

⁴²Galaanni Baabilon irra in ba'a, dha'aan galaanichaa inni huursus ishee irra in dhangala'a.

⁴³Mandaroonni Baabilon warri kaanis in diigamu; biyyi Baabilon gogee lafa duwwaa in ta'a; namni achi keessa hin jiraatu, keessas hin darbu.

⁴⁴?Beel? Waaqayyo tolfamaa isa kan Baabilon nan adaba, isa inni fudhates nan deebisiisa; si'achi sabni gara isaatti hin yaa'u, dallaan Baabilon inni dhagaadhaan ijaarames in jiga*.[312]

⁴⁵?Yaa saba koo, isin garuu ishee keessaa ba'aatii baqadhaa, tokkon tokkon keessan dheekkamsa Waaqayyoo isa boba'aa jalaa baqadhaatii of oolchaa*!

⁴⁶Barana oduu tokko in dhageessu, bara eger immoo oduu biraa in dhageessu; egaa jal'inni biyya irratti hojjetamuu isaa, warri biyya bulchanis humnaan wal irratti ka'uu isaanii, oduu yommuu dhageessan hin na'inaa, hin sodaatinaas!

⁴⁷Kanaafis kunoo! Barri ani itti waaqayyolii tolfamoo Baabilon adabu in dhufa; guutummaan biyyattii in yeellaasifamti, warri dhuman hundinuus achi keessa in cicciisu*;

⁴⁸diinni biyya gara bitaatii dhufee Baabiloniin yommuu rukutu, waaqniif lafti wanti isaan keessa jiraatan hundinuus in ililchu*.

⁴⁹Baabilon namoota biyya baay'ee akkuma fixe, namoota Israa'elis waan fixeef, isheenis kuftee in barbadoofti? jedhe*.[313]

⁵⁰Waaqayyo ammas itti fufee ?Isin warri billaa jalaa baqattanii ooltan achi keessaa ba'aa malee, hin dhaabatinaa! Biyya fagoo keessa warri jirtan ana Waaqayyoon yaadadhaa! waa'ee Yerusaalemis yaadaa!? jedhe*.

⁵¹Isin immoo, ?Warri ormaa mana qulqullummaa keessaa gara iddoo isa qulqullaa'aatti waan lixaniif, nuyi arrabsamnee, yeellaasifamnee, salphanneerras? jettan*.

⁵²Kana irratti Waaqayyo, ?Kunoo! Waaqayyolii tolfamoo ishee barri ani itti adabu in dhufa, warri madaa'an biyya ishee hundumaa keessaa in aadu*.

⁵³Baabilon hamma waaqaatti yoo ol kaate iyyuu, masaraa ishees ol dheeressite yoo ijaarratte iyyuu, kan ishee balleessu isheetti nan erga; ani Waaqayyo kana dubbadheera*.

⁵⁴Mandara Baabilon keessaa iyyi in dhaga'ama, warra Kaldootaa keessattis badiisi guddaan ta'eera.

⁵⁵Ani Waaqayyo Baabilonin qullaatti nan hambisa, sagalee guddaa ishee keessaa dhaga'amus nan balleessa; sagaleen diinota isheetii inni akka dha'aa bishaan guddaatti huursu, ishee keessaa in dhaga'ama.

⁵⁶Ani Waaqayyo isa ijaa baafatu waanan ta'eef, Baabiloniif akka hojii isheetti nan kenna; diinni isheetti in dhufa, loltoonni ishee warri jajjaboonni in booji'amu, iddaan isaanii hundinuus in caccaba*.

⁵⁷Ani gurguddoota ishee, ogeessota ishee, warra biyya bulchan, angafoota loltuu fi loltoota ishee nan macheessa; kana irraa kan ka'es hirriba bara baraa in rafu, deebi'aniis hin ka'an; ani mootichi maqaan koo Waaqayyo gooftaa maccaa kan jedhamu, kana dubbadheera*.

⁵⁸Kellaan mandara Baabilon inni yabuun diigamee, lafatti in dabalama; karoonni ishee warri dhedheeroonni ibiddaan in gubamu, egaa sabni akkasumaan dhama'ee hojjeta, akkasumaanis wanta ibiddaan gubamutti dadhaba; ani Waaqayyo gooftaan maccaa kana dubbadheera? jedhe*.[314]

⁵⁹Zedeqiiyaan mootii Yihudaa ta'ee waggaa afuraffaa isaatti gara biyya Baabilonitti yeroo gad bu'etti, ani Ermiyaas raajichi ergaa kanatti aanee jiru Seraayaa ilma Neriiyaa ilma Ma'aseyaa isa iddoo bultii namootaatti gaafatamaa turetti nan hime;

⁶⁰ani wanta hamaa isa biyya Baabilonitti dhufuuf jiru, waa'ee isheetiif kan dubbatame hundumaas wanta akka macaafa maramu keessatti caafeen ture.

⁶¹Isas Seraayaatti kennee, ?Ati biyya Baabilon yommuu dhaqxu, yaadadhuutii wanta macaafa kana keessatti caafame hundumaa sagalee guddaadhaan isaaniif dubbisi!

⁶²Yommuu dubbiftus, ?Yaa Waaqayyo ati iddoo kana akka balleessitu namni yookiis horiin achi keessa akka hin jiraanne, hamma bara baraattis onee akka inni hafu dubbatte turte? jedhi!

⁶³Macaafichas dubbifte yommuu raawwattu, dhagaa itti hidhii bishaan Efraaxiis keessa buusi!

⁶⁴Achumaanis, ?Sababii Waaqayyo badiisa isheetti fiduuf Baabilon akkasuma in liqimfamti, deebitee achi keessaa hin baatu, sabni ishees akkasumaan in dadhabu!? jedhiin!? nan jedhe.

⁶⁴Wanti Ermiyaas dubbate as irratti in raawwatame*.[315]