Macaafa Fakkeenyaa 11:1-31 GAZB1997 - Bible AI

¹Miijanni sobaa Waaqayyo duratti jibbamaa dha, dhagaan safaraa inni guutuun garuu isatti in tola*;

²yommuu of gurguddisuun dhufu, salphinni in dhufa; yommuu gad of deebisan ogummaatu dhufa*;

³balleessaa dhabuun warra qajeelotaa isaanuma in geggeessa; micciiramummaan warra hin amanamnee garuu, isaanuma in balleessa.

⁴Guyyaa dheekkamsaatti soorumni homaa waa'ee hin baasu, qajeelummaan garuu du'a nama oolcha*;

⁵qajeelummaan warra mudaa hin qabnee, isaanumaaf karaa qajeelcha, jal'oonni garuu jal'inuma isaaniitiin in kufu;

⁶qajeelummaan warra gara-qajeelotaa isaanuma oolcha, warri hin amanamne garuu, kajeellaa hamaadhaan in qabamu.[45]

⁷Abdiin nama jal'aa yommuu inni du'u in bada, soorumni inni amanatus waan tokkotti illee hin galu*;

⁸namni qajeelaan rakkina jalaa in ba'a, namni jal'aan garuu, iddoo isaa rakkinatti in gala*;

⁹namni Waaqayyo malee jiraatu, dubbii afaan isaatiitiin nama balleessa; namni qajeelaan garuu, beekumsaan isa duraa in ba'a*.[46]

¹⁰Warra qajeelotatti yommuu tolu, mandarri in gammaddi; namni jal'aan yommuu badu, mandarattiin gammaduu ishee in mul'ifti;

¹¹eebba gara-qajeelotaatiin mandarri in guddatti, dubbii afaan jal'ootaatiin garuu, gara in gaggalfamti*.

¹²Namni nama tuffatu qalbii hin qabu, namni hubataan garuu calluma jedha;

¹³namni hama deddeebisu dhoksaa mul'isa, namni amanamaan garuu dhoksaa eega*;

¹⁴geggeessaan yoo itti hir'ate sabni in kufa, gorsituun baay'achuun garuu, biyya nagaatti jiraachisa.[47]

¹⁵Namni nama ormaaf wabii darbu in rakkata, namni wabii namaaf darbuu jibbu garuu, nagaatti in jiraata*.

¹⁶Dubartii gaariin ulfina in argatti, warri humnaan nama irratti ka'an garuu in sooromu;

¹⁷namni gara-laafessi ofiidhuma isaatiif bu'aa argata, namni gara-jabeessi garuu ofuma isaa miidha;

¹⁸namni jal'aan beenyaa sobaa argata; qajeelummaa kan facaasu garuu gatii isa dhugaa in argata;

¹⁹qajeelummaan gara jireenyaatti, wanta hamaa duukaa bu'uun garuu gara du'aatti nama in geessa.[48]

²⁰Waaqayyo namoota yaada micciiramaa qaban in jibba, warra jireenyi isaanii mudaa hin qabnetti garuu, in gammada.

²¹Warri jal'oonni utuma harka wal qabatanii iyyuu, utuu hin adabamin hin hafan, sanyiin warra qajeelotaa garuu duraa in ba'a.

²²Dubartiin miidhagduun dubbii alalfattee haasa'uu hin beekne, akka amartii warqee funyaan boyyeetti jiruu ti;

²³hawwiin nama qajeelaa waanuma gaarii duwwaa dha, abdiin jal'ootaa garuu, dheekkamsaan in deebi'a*.[49]

²⁴Horii isaa kan asii fi achi bittimsu jira, kana keessaa immoo ittuma dabalamaafii in adeema; safara malee kan doqnoomu jira, kana keessaa immoo in hiyyooma;

²⁵namni arjaan in lalisa; namni dheebuu nama baasus dheebuu in baafama*.

²⁶Nama midhaan harka keessa qabatu namoonni in abaaru, mataa nama midhaan gurguruu irratti garuu eebbatu dhufa.[50]

²⁷Namni wanta gaarii dhimmee barbaadu, faara tolaa in argata; nama wanta hamaa barbaadutti garuu hamaatu dhufa.

²⁸Namni sooruma isaa amanatu in kufa, namni qajeelaan garuu, akka muka jiidhaatti in lalisa*;

²⁹namni maatii isaa rakkisu harka duwwaa in hafa; gowwaan nama ogeessaaf hojjetaa in ta'a;

³⁰iji hojii nama qajeelaa muka jireenyaa ti, namni ogeessi malaan lubbuu namaa in deebifata.

³¹Warrumti qajeelonni iyyuu lafa irratti gatii isaanii kan argatan erga ta'ee, kan warra jal'ootaa fi kan warra cubbamootaa immoo hammam kana irra haa hammaatu ree*?[51]