Macaafa Fakkeenyaa 30:1-33 GAZB1997 - Bible AI

¹Jechi kanatti fufee jiru, jecha Aguur ilma Yaaqee isa nama biyya Maasaa ti; namni kun Itii'elitti, Itii'elii fi Ukaalitti dubbateera;

²inni, ?Ani nama hundumaa irra gowwaa dha, hubannaa namni qabus hin qabu;

³ogummaa tokko illee hin barre, waa'ee isa qulqullaa'aa raawwadhee homaa hin beeku*;

⁴eenyutu gara bantii waaqaa dhaqee deebi'ee immoo dhufe? Eenyutu qilleensa aboottee isaa keessatti walitti qabe? Eenyutus bishaanitti uffata maree ittise? Eenyutu daarii lafaa hundumaa jabeessee dhaabe? Eenyu maqaan isaa, eenyu maqaan ilma isaas? Beekta yoo taate anatti himi*![178]

⁵?Dubbiin Waaqayyoo hundinuu dhugaa ta'uun isaa amansiiseera, inni warra isatti kooluu galan hundumaaf gaachana*.

⁶Inni akka si hin ifannetti, akka si hin sobsiifnettis, dubbii isaatti waa hin dabalin!? jedhe*.[179]

⁷Yaa Waaqayyo, ani waan laman si kadhadha, hamman jirutti isaan ana hin dhowwatin!

⁸Dubbii waa'ee hin baafnee fi dubbii sobaa anattii fageessi, soora har'aa-borii anaaf kenni malee, na hin badhaasin, na hin deegsinis!

⁹Ani quufee akkan si hin wallaalletti, ?Waaqayyo eenyu inni?? akka ani hin jennetti, yookiis immoo hiyyoomee, hatee maqaa Waaqayyo kootii akka ani hin salphifne anaaf godhi*![180]

¹⁰Hojjetaan akka si hin abaarretti, ati immoo rakkinatti akka hin galletti, gooftaa isaatti isa hin hamatin!

¹¹Abbaa isaanii kan abaaran, haadha isaaniis kan hin jajanne jiru;

¹²xurii isaaniittii utuma hin qullaa'in, qullaa'oo kan of se'an jiru*;

¹³warri waan guddaatti of ilaalan, nyaara isaaniitiinis of tuuluu isaanii kan mul'isan jiru;

¹⁴warri hiyyeessa nyaatanii lafa irraa balleessuudhaaf, warra wanta barbaachisaa dhabanis namoota gidduudhaa badduu baasuudhaaf ilkaan isaanii akka billaa qaramaa, ha'oon isaaniis akka haaduu kan ta'e jiru*.[181]

¹⁵Dhulaandhulli intaloota ?Warra kenni! Kenni!? jedhanii iyyan lama qabdi; ?Quufe? kan hin jenne wanta sadiitu jira, inni afuraffaan immoo ?Na ga'a? jechuu hin beeku;

¹⁶isaanis, iddoo lafa jalaa, gadameessa dhala hin godhatin hafe, lafa gogaa jiidha of keessaa hin qabneef ibidda, ?In ga'a? jedhee hin beeknee dha*.[182]

¹⁷Nama abbaa isaatti ga'isuuf abboommii haadha isaa tuffatu, qurruun gammoojii ija isaa isa keessaa haa baasu, foggis isa haa nyaatu*!

¹⁸Wanti ana dinqan sadiitu jira, isa afuraffaa immoo hubachuu iyyuu hin danda'u;

¹⁹isaanis, karaa joobirri qilleensa keessa balali'u, karaa bofni kattaa irra adeemu, karaa markabni galaana irra adeemuu fi karaa dargaggeessaa fi dargaggeettiin wal jaallatanii dha.[183]

²⁰Dubartii ejjituun, akka ishee nyaattee afaan ishee haxaa'attee, ?Ani homaa hin balleessine? jettuu ti; karaan dubartii ejjituu kan akkasii ti.

²¹Wanta sadiitu lafa sochoosa, isa afuraffaa immoo danda'ee iyyuu hin baatu.

²²Isaanis, garbicha mootii ta'e, gowwaa quufe,

²³haftuu abbaa manaa argattee fi xomboree iddoo giiftii isheetii fudhattee dha*.[184]

²⁴Uumamni bifaan xixinnoo ta'anii, baay'ee immoo ogeeyyii ta'an afurtu lafa irra jira;

²⁵mixiin uumama dadhabduu dha, garuu nyaata ishee bona walitti in qabatti*;

²⁶osoleenis uumama humna hin qabnee dha, garuu kattaa keessatti in galti;

²⁷hawaannisi mootii hin qabu, garuu wal gurmeessee in adeema.

²⁸Loccuun bar'uudhaan looti, garuu keenyan mana moototaa irratti iyyuu in argamti.[185]

²⁹Wanti adeemsa tolu sadiitu jira, inni afuraffaan immoo simboo ulfina isaatiif ta'u qaba;

³⁰leenci bineensota hundumaa keessaa jabaa dha, wanta hundumaa irraas hin deebi'u;

³¹kormaa indaanqoo fi korbeessii reettii of bokoksee asii fi achi naanna'uu fi mootii macca isaa of naannessee adeemuu dha.

³²Gowwoomtee, yoo ol ol of qabde, yookiis garaa kee keessatti hamaa yoo yaadde, afaan kee qabadhu!

³³Aannan raasuun dhadhaa baasa, jabeessanii furrii baafachuun nama dhiigsa; tuttuqanii nama aarsuun lola in kaasa.