Macaafa Hisqi'el Raajichaa 30:1-26 GAZB1997 - Bible AI

¹Ammas dubbiin Waaqayyoo gara koo dhufee,

²?Yaa mucaa namaa! Raajii dubbadhu! ?Waaqayyo gooftaan:- Boo'i! Guyyaa sanaaf wayyoo! jedhi!

³Guyyaan sun dhi'aateera, guyyaan Waaqayyoo dhi'aateera, guyyichi guyyaa duumessaa ti, yeroon sun yeroo saba lafa irraatti faradamu in ta'a*;

⁴biyya Gibxii irratti billaan in dhufa, biyya Kuush irras naasuun in bu'a; yommuu biyya Gibxiitti namoonni rukutamanii kufan, badhaadhummaan ishee yommuu jalaa fudhatamu, hundeen ishees yommuu jalaa jigu,

⁵biyyi Kuush, biyyi Fux, biyyi Lud, tuuti saba garaa garaas, biyyi Kubii fi ilmaan biyya sanaa warri ani dur isaanii wajjin kakuutti gale biyya Gibxii wajjin billaadhaan in dhumu? jedhe.

⁶Waaqayyo gooftaan, ?Warri Gibxitti irkatan in kufu, Miigdolii hamma Aswaanitti ishee keessatti billaadhaan in kufu, humni ishee inni isheen ittiin koortus in kufa? jedhe? jedhe. Waaqayyo gooftaan kana dubbateera.[134]

⁷Itti fufees Waaqayyo, ?Isaan biyya one keessatti in dhumu; mandaroonni isaaniis mandaroota warra diigamanii wajjin in diigaman.

⁸Yommuu ani biyya Gibxiitti ibidda naqu, warri ishee gargaaran hundinuus yommuu caccaban, yommus ani Waaqayyo akkan ta'e isaan in beeku*.

⁹Yommus ani ergamaa markabaan nan erga, innis Kuushin dammaqsee in naasisa; guyyaa Gibxitti faradamuuf jiru sanatti naasuun isaan in qabata. Kunoo, guyyichi dhufaa jira!? jedhe*.[135]

¹⁰Waaqayyo gooftaan, ?Ani harka Nebukadnezaar mootii Baabiloniin baay'ina warra Gibxii akka hin jirre nan godha*.

¹¹Innii fi sabni isaa warri baay'ee gara-jabeeyyiin biyya sana balleessuudhaaf in dhufu, billaa isaanii warra Gibxii irratti in luqqifatu, biyyichis warra qalamaniin in guuta*.

¹²Ani bishaanota laga sanaa nan gogsa, biyyichas namoota hamootatti nan gurgura; biyyichaa fi waan isa keessa jiru hundumaa harka warra ormaatiin nan onsa; ani Waaqayyo kana dubbadheera? jedhe*.[136]

¹³Waaqayyo gooftaan, ?Ani waaqayyolii tolfamoo nan balleessa, bifa fakkeenyaas mandara Memfiis[137] keessaa nan fixa; biyya Gibxii keessatti deebi'ee guddaan biyyaa hin argamu, ani biyya Gibxii keessa sodaa nan buusa.

¹⁴Ani Faaxrosiin nan diiga, Zo'aanitti immoo ibidda nan naqa, No'ittis nan farada*.

¹⁵Ani, ?Siin? ishee da'oo warra Gibxii taate irratti dheekkamsa koo nan dhangalaasa, baay'ina warra No'iis muree nan balleessa.

¹⁶Ani biyya Gibxiitti ibidda nan naqa, ?Siin? baay'ee na'ee in hollata, No'i humnaan in fudhatama, Memfiis immoo guyyaa hundumaa in dhiphata.

¹⁷Dargaggoonni mandara Aween keessa jiranii fi mandara Phii-Beset keessa jiran billaadhaan in kufu; warri mandaroota sana keessa jiraatanis booji'amanii in adeemu.

¹⁸Yommuu ani waanjoo warra Gibxii caccabsu, Taahafeneetti guyyaan in dukkanaa'a; yommus humni isheen ittiin koortu in dhuma, duumessaanis in haguugamti, intaloonni ishees in booji'amu*.

¹⁹Akkasitti ani biyya Gibxiitti nan farada; yommus ani Waaqayyo akkan ta'e isaan in beeku? jedhe.[138]

²⁰Waggaa kudha tokkoffaatti, ji'a tokkoffaatti, ji'icha keessaa guyyaa torbaffaatti dubbiin Waaqayyoo gara koo dhufee,

²¹?Yaa mucaa namaa! Ani irree Fara'oon mootii Gibxii cabseera; inni fayyee jabaatee billaa ittiin qabachuu akka danda'utti, namni sabbataan irree isaa walitti hidhee fayyise hin jiru? jedhe*.

²²Kanaafis Waaqayyo gooftaan, ?Kunoo! Ani Fara'oon mootii Gibxii irratti nan ka'a, irree isaa isa cabaadhaa fi isa fayyaa nan caccabsa, billaas isa harkaa nan buusa;

²³ani warra Gibxii saba lafa irraa gidduu nan tamsaasa, biyya keessas isaan nan facaasa.

²⁴Ani irree mootii Baabilon nan jabeessa, billaa koos harka isaa keessa nan kaa'a, irree mootii Gibxii immoo nan cabsa, innis mootii Baabilon duratti akka nama madaa'ee du'uuf jedhuu in aada*.

²⁵Ani irree mootii Baabilon nan jabeessa, garuu irreen mootii Gibxii lawwaasa'ee in kufa; yommuu ani billaa koo harka mootii Baabilon keessa kaa'ee, inni immoo warra Gibxiitti isa mirmirsu, yommus ani Waaqayyo akkan ta'e isaan in beeku.

²⁶Ani warra Gibxii saba lafa irraa gidduu nan tamsaasa, biyya keessas isaan nan facaasa; yommus ani Waaqayyo akkan ta'e isaan in beeku? jedhe*.[139]