Macaafa Isaayaas Raajichaa 13:1-22 GAZB1997 - Bible AI

¹Wanti Isaayaas ilmi Amoz waa'ee Baabiloniif arge kanatti fufee jira.

²Tulluu duwwaa irratti faajjii ol fuudhaa! Sagalee guddaadhaan loltoota waamaa! Karra kellaa warra gurguddootaa keessa akka lixaniif, harkaan isaan argisiisaa!

³Ani Waaqayyo ofuma kootii warran addaan isaan baafadhe abboomeera, akkasuma immoo gootota koo warra ulfina kootti gammadan waameera; isaanis dheekkamsa koo jara irratti in raawwatu*.[66]

⁴Sagaleen namoota baay'ee, wacuun mootota lafa irraas tulluu irraa in dhaga'ama; Waaqayyo gooftaan maccaa waraanaaf loltuu isaa walitti qabachaa jira;

⁵isaan biyya fagoodhaa fi daarii lafaatii in dhufu; yommus Waaqayyo mi'a aarii isaatiin lafa hundumaa in balleessa.

⁶Guyyaan Waaqayyoo dhi'aateera, innis isa hundumaa danda'u biraa badiisa waan fiduuf wawwaadhaa*!

⁷Yommus harki hundinuu in dadhaba, garaan nama hundumaas akka gagaa in baqa;

⁸isaan in sodaatu, gaddii fi dhiphinni isaan in qabata; akka dubartii ciniinsifattu in miixatu, wal ilaalaniis in rifatu, fuulli isaaniis akka barbadaa ibiddaa in diimata.[67]

⁹Kunoo! Guyyaan Waaqayyoo inni hamaan, lafa onsuuf, warra cubbamootas isa irraa balleessuuf, dheekkamsaa fi aarii boba'aadhaan in dhufa.

¹⁰Yommus urjoonni waaqaa fi urjoonni ?Sadee? jedhaman ifa isaanii hin kennan; aduun ba'aa jirtus in dukkannoofti, jiinis ifa ishee hin kennitu*.

¹¹Waaqayyo gooftaan, ?Biyya lafaa, hammina isaatiif, jal'ootas yakka isaaniitiif nan adaba; of jajuu warra of gurguddisanii irraa nan fixa, ol ka'uu warra hamootaas gad nan qaba*.

¹²Namni warqee qullaa'aa irra akka muraasatu, sanyiin namaas warqee Ofiir irra akka yaratu nan godha;

¹³kanaaf ani Waaqayyo gooftaan maccaa guyyaa dheekkamsa kootti, guyyaa aarii koo isa boba'aatti, bantiiwwan waaqaa nan rom'isiisa, laftis iddoo isaatii akka socho'u nan godha.[68]

¹⁴?Akka kuruphee namni ari'uu fi akka hoolota nama walitti sassaabu hin qabnee, akkasuma namni hundinuu kara karaa gara saba isaatti in deebi'a, gara biyya isaattis in baqata*;

¹⁵kan booji'amu hundinuu in waraanama, kan qabamu hundinuus billaadhaan in dhuma;

¹⁶daa'imoonni isaanii ija isaanii duratti gargar in ciramu, manneen isaanii in saamamu, dubartoota isaaniittis namni in roorrisa*.[69]

¹⁷?Kunoo! Ani warra Medoon warra meetii tuffatanii fi warra warqee hin jaallanne isaanitti nan kaasa*;

¹⁸iddaan isaanii dargaggoota in cira, daa'imootaaf hin oo'u, ijoollotaafis hin hilu.

¹⁹Baabilon isheen mootummoota hundumaa irra miidhagdu, isheen ulfinaa fi of jajuu saba ishee warra Kaldootaa taate, akkuma Sodoomii fi Gomoraa, warra ani Waaqayyo barbadeesse in taati*.

²⁰Bara baraan namni ishee keessa hin jiraatu, dhalootaa hamma dhalootaattis ishee keessa hin taa'u; namni biyya Arabaa achi keessa godoo hin dhaabbatu, tiksoonnis hoolota isaanii achi keessa hin deechifatan.

²¹Bineensonni achi keessa in ciisu, manneen isaanii keessas hurungoonni in guutu; guchiin achi keessa in jiraatti, korbeeyyiin reettiis achi keessa in burraaqu;

²²manneen warra jajjaboo keessatti waraabessoonni in yuusu, mana isaan itti gammadan keessattis waangonni in iyyu, yeroon Baabilon jala ga'eera, guyyaan ishees dhi'aateera? in jedha*.[70]