Macaafa Isaayaas Raajichaa 26:1-21 GAZB1997 - Bible AI

¹Yeroo sanatti faarfannaan kanatti fufee jiru biyya Yihudaa keessatti in faarfatama, ?Nuyi mandara jabduu qabna, Waaqayyo nu oolchuudhaaf kellaa fi masaraa itti nuuf ijaare*;

²sabni qajeelaanii fi amanamaan akka ol galutti, karroota dallaa ishee banaa*!

³Isa garaan isaa cimsee si amanatu, sababii inni sitti of kennatuuf ati nagaa guutuudhaan in eegda;

⁴Waaqayyo gooftaan kattaa yeroo hundumaa jiraatu waan ta'eef, bara baraan isa amanadhaa*!

⁵Inni warra iddoo ol jedhaa irra jiraatan, hundumaa gad in qaba; mandaroota ol ka'oo biyyootti gad darbatee, lafatti isaan in dabala*.

⁶Miilli warra cunqurfamanii isaan irra in ejjeta, faanni warra dhaboos isaan in dhidhiita*.[118]

⁷?Yaa gooftaa isa qajeelaa! Ati warra qajeelotaaf karaa in tolchita, daandiin isaan irra adeemanis akka wal qixxaatu in goota.

⁸Yaa Waaqayyo, wanta si duratti qajeelaa ta'ee fudhatame in eegganna; maqaa kee fi wanta ati nuuf goote yaadachuu in dharraana;

⁹halkan garaa guutuu sin hawwa, hafuurri koos dhimmee si barbaada, ati lafatti yommuu faraddu, warri biyya lafaa irra jiraatan qajeelummaa in baru*.

¹⁰Warri jal'oonni faara tolaadhaan yoo ilaalaman, qajeelummaan maal akka ta'e hin baran; isaan biyya qajeelummaadhaan keessatti hojjetamutti iyyuu jal'ina in hojjetu, surraa Waaqayyoos hin argan.

¹¹Yaa Waaqayyo, harki kee isaan irratti ol fuudhameera, isaan garuu hin argan; akka ati saba keetiif hinaaftu arganii haa qaana'an, ibiddi ati diinotaaf qopheessites isaan haa fixu*![119]

¹²?Yaa Waaqayyo, ati nagaa nuuf in kennita, wanta hojjenne hundumaas ati nuuf raawwatteetta;

¹³yaa Waaqayyo gooftaa keenyaa! Goftooliin biraa nu irratti mo'anii turan, nuyi garuu maqaa kee duwwaa in waammanna*;

¹⁴isaan amma hin jiran, du'aniiru ekeraan warra du'aniis hin ka'an; ati isaan adabde, isaan in balleessites, seenaan isaanii hundinuus raawwatee akka irraanfatamu in goote*.

¹⁵Yaa Waaqayyo, ati saba sana in baay'ifte; saba sana in baay'ifte, daarii isaas karaa hundumaa in bal'ifte, kanaanis ati ulfina in argatte.[120]

¹⁶?Yaa Waaqayyo, yeroo gidiraatti si barbaaddatu, yommuu ati isaan adabdus boo'aa si kadhatu*.

¹⁷Yaa Waaqayyo! Akkuma dubartiin ulfaa yommuu da'uuf ciniinsifattu iyyitu, nuyis si duratti akkasuma in taane*.

¹⁸Akkuma dubartii akka waan ulfoofnetti in ciniinsifanne, garuu homaa hin deenye; wanta biyya gargaaru waan hojjenne hin qabnu, biyya lafaa irrattis nama hin daballe.

¹⁹Warri kan keetii garuu in jiraatu, reeffi isaaniis du'aa in ka'a; isin warri awwaala keessa ciiftan, ka'aa, gammadaa faarfadhaa! Yaa gooftaa, fixeensi ati ergitu fixeensa jireenya kennuu dha, egaa laftis ekeraa warra du'anii ol in baafti*.[121]

²⁰?Yaa saba koo as kottu! Kutaa mana keetti ol gali, balbala kees cufadhu; dheekkamsichi hamma darbutti, iddoo baqaa tolfadhu*!

²¹Kanaafis kunoo, Waaqayyo iddoo isaatii as ba'ee sababii yakka isaaniitiif warra lafa irra jiraatan in adaba; laftis dhiiga ishee irratti dhangala'e in mul'ifti, si'achis warra ajjeefaman dhoksuu hin dandeessu? kan jedhuu dha*.[122]