Macaafa Isaayaas Raajichaa 3:1-26 GAZB1997 - Bible AI

¹Kunoo! Waaqayyo gooftaan maccaa, waan isaan ittiin jiraataniif waan isaan ittiin gargaaraman Yerusaalemii fi Yihudaa harkaa in fuudha, buddeenaa fi bishaan isaan ittiin jiraatan isaan harkaa in fuudha*;

²gootota, loltoota, abboota firdii, raajota, warra hooda dubbatan, jaarsolii,

³angafa shantamaa, namoota aboo qaban, gorsitoota, ogeessota harka tolanii fi warra qoricha namatti godhan isaan irraa in fuudha.[17]

⁴Dargaggoonni akka isaan bulchan, ijoolleenis isaan irratti akka mo'an in godha*;

⁵sabni wal in cunqursa, namni nama irratti, ollaan ollaa irratti, dargaggoonni jaarsolii irratti, inni gad deebi'aan isa ulfina-qabeessa irratti in ka'a.[18]

⁶Yeroo sanatti namni tokko obboleessa isaa isa mana abbaa isaa keessa jiru tokko qabee, ?Ati qoloo tokko qabda, dura-buutuu nuuf ta'i, isa diigame kana harka kee jala nuuf galchi!? in jedha.

⁷Gaafas inni immoo, ?Saba kana irratti dura-buutuu ana hin godhinaa, buddeenni yookiis qoloon mana koo keessa hin jiru, ani isa madaa'e hin fayyisu? jedhee in kakata.

⁸Yerusaalemii fi Yihudaan dubbii isaaniitii fi hojii isaaniitiin Waaqayyoon mormanii ulfina isaa waan salphisaniif, Yerusaalem in gatantarti, Yihudaan immoo in kufti;

⁹akka isaan nama wal caalchisan fuulli isaanii dhugaa isaan irratti in ba'a; akka warra Sodoom cubbuu isaanii bakkeetti in mul'isu, hin dhoksanis; kanaan badiisa waan ofitti fidaniif isaaniif wayyoo*![19]

¹⁰Namni qajeelaan ija hojii isaatti gammaduuf waan jiruuf, gammadi ittiin jedhaa!

¹¹Namni jal'aan garuu wanta nama irratti hojjete hundumaa argachuuf waan jiruuf, isaaf wayyoo!

¹²Saba koo ijoolleetu gad qabaa jira, warri hiiqii kennatanis isaan irratti in mo'u. Yaa saba koo! Warri si geggeessan karaa irraa si kaachisaniiru, daandii qajeelaa irraas si gorsiisaniiru*.[20]

¹³Waaqayyo dubbii isaa falmachuudhaaf in ka'a, sabatti faraduudhaafis iddoo isaatti in argama;

¹⁴Waaqayyo jaarsolii saba isaa fi gurguddoota saba isaa firdiitti dhi'eessee, ?Isin iddoo dhaabaa waynii raawwattanii in balleessitan; inni isin hiyyeessota irraa saamtanis mana keessan keessa jira*;

¹⁵saba koo caccabsuun keessan, hiyyeessotas cunqursaa guddaadhaan yeellaasisuun keessan kun maal jechuu keessan?? jedha Waaqayyo gooftaan maccaa.[21]

¹⁶Waaqayyo, ?Intaloonni Xiyoon of gurguddisanii morma irra-keessa qabatanii, ijaan nama hawwachaa, albuus waliin rukutaa in adeemu*.

¹⁷Kanaaf ani gooftichi gubbee intaloota Xiyoonitti qaaqee nan buusa, qullaattis isaan nan hambisa? jedha.[22]

¹⁸Guyyaa sanatti gooftichi albuu isaanii miillaa isaaniittii in baasa, shaashiis adda isaaniittii in fuudha, mi'a miidhaginaas isaanittii in baasa;

¹⁹amartii gurraa fi bitawoo harkaa, marata mormaas isaanittii in baasa;

²⁰marata mataa, irboora, sabbata, bilqaaxii urgooftuu, kudhaamas isaan harkaa in fuudha;

²¹amartii mallattoo fi amartii funyaanii isaanittii in baasa;

²²uffata cidhaa, wayyaa isa irra-keessaa, qoloo, korojoo harkatti baatanis isaan irraa in fuudha;

²³of-ilaalee, uffata quncee talbaa irraa hojjetame, marata mataa, gonboos isaan irraa in fuudha.

²⁴Qooda foolii urgaa'uu, fooliin ajaa'u, qooda teepha ittiin mudhii hidhatanii, funyoon, qooda rifeensa mataa tolfachuu, haaddachuun, qooda uffata gaarii, uffata gaddaa uffachuun, qooda miidhagummaa, godaannisi isaanitti in dhufa.

²⁵Dhiironni kee billaadhaan, loltoonni kees duula keessatti in dhumu;

²⁶karrawwan Xiyoon akkuma namaatti gaddanii in boo'u, mandarattiinis akka ishee qullaatti haftee in taati.