Macaafa Isaayaas Raajichaa 40:1-31 GAZB1997 - Bible AI

¹Waaqayyo keessan, ?Jajjabeessaa! Saba koo jajjabeessaa*!

²Garaa saba Yerusaalem kan rukutu dubbadhaatii, cubbuu isaa hundumaaf harka Waaqayyo keessaa adaba dachaa lama akka fudhate, barri inni garbummaatti rakkachaa ture akka raawwate, yakki isaas akka dhiifameef, itti himaa!? jedha*.[176]

³Sagaleen nama lafa onaa keessaa lallabu tokkoo, ?Waaqayyoof karaa tolchaatii haraa, lafa duwwaa keessattis karaa gooftaan keenya irra adeemu qajeelchaa!

⁴Dachaan hundinuu ol haa kaafamu, tulluun, gaarris hundinuu haa kuffifamu! Inni bu'aa-ba'iin diriiraa haa ta'u, inni wal caccaalaanis wal haa qiqixxaatu*!

⁵Yommus ulfinni Waaqayyoo in mul'ata, Waaqayyo ofii isaatii kana waan dubbateef, namni hundinuu kana arguuf jira? in jedha.[177]

⁶Sagaleen tokko, ?Labsi!? utuu jedhuu nan dhaga'e, ani immoo kana irratti, ?Maal jedhee labsu?? nan jedhe; inni immoo deebisee, ? ?Namni hundinuu akka margaa ti, miidhagummaan isaanii hundinuus akka daraaraa bakkee keessaa ti;

⁷yommuu Waaqayyo hafuura isaanitti baafatu, margichi in coollaga, daraarichis in harca'a; dhugumaan sabichi akka margaa ti;

⁸margichi in coollaga, daraarichis in harca'a, dubbiin Waaqayyo keenyaa garuu bara baraan dhaabatee in hafa? jedhi!? jedhe*.[178]

⁹Yaa isa Xiyoonitti misraachoo himtuu tulluu dheeraatti ol ba'i! Yaa isa Yerusaalemitti misraachoo himtuu, sagalee kee humnaan ol fuudhi! Ol fuudhi, hin sodaatinis! Mandaroota Yihudaatiin, ?Ilaa, Waaqayyo keessan!? jedhi*.

¹⁰Kunoo! Waaqayyo gooftaan humnaan in dhufa, irree isaatiinis in mo'a. Kunoo! Gatiin inni namaaf kennu isa harka jira, miindaa isaas of duraa qaba*;

¹¹inni akka tikseetti hoolota isaa in tiksa, ilmoolees harka isaatiin walitti in sassaaba, kaasuutti isaan in baata, haadhotii hoolotaa warra hoosisanis suuta jedhee in oofa*.[179]

¹²Eenyutu bishaanota harkaan hammaaree safare? Eenyutu waaqota taakkuudhaan safare? Eenyutu biyyoo lafaa guubootti naqee fixuu danda'a? Eenyutu tullootaa fi gaarota madaalii irra kaa'a?

¹³Eenyutu humna hafuura Waaqayyoo shallaguu danda'a? Eenyutus Waaqayyoon gorsee barsiisuu danda'a?

¹⁴Inni eenyuun gorsa gaafata? Yaada ogummaa eenyu irraa argata? Karaa qajeelaa eenyutu isa barsiisa? Beekumsa ittiin hubatus kan isa barsiisu eenyu*?[180]

¹⁵Kunoo! Sabni lafa irraa akka copha qodaa bishaanii irraa cophuu ti, akka awwaara madaalii irra buufatuu ti, kunoo! Biyya bishaan keessaa hundumaas akka awwaarri ka'utti isaan in kaasa;

¹⁶qoraan caakkaa Liibaanon keessa jiru aarsaa gubamuuf hin ga'u; bineensonni achi keessa jiranis qalma gubamuuf hin ga'an;

¹⁷sabni lafa irraa hundinuu isa duratti wayyitti hin galan, isaan isa duratti waan tokkotti iyyuu hin lakkaa'aman.

¹⁸Waaqayyoon eenyutti fakkeessitu? Fakkeenya attamiitii wajjinis wal bukkee qabdu?

¹⁹Namni harka-toleessi waaqayyolii tolfamoo bifa garaa garaatiin in tolcha; inni warqee tumu warqee isatti in uffisa, dirata meetiis isaaf in qopheessa;

²⁰namni hiyyumaaf isa akkasii godhachuu hin dandeenye, muka keessaa isa dafee hin bosofne in fo'ata, nama harka toleessas barbaaddatee, fakkeenya waaqayyolii tolfamoo isaatii hojjechiifatee, akka inni hin sochoonetti in dhaabsifata*.[181]

²¹Isin hin beeknee ree? Hin dhageenyeesii ree? Jalqaba duriitii jalqabee isinitti hin himamne moo? Biyyi lafaa attamitti akka uumame isin hin hubannee ree?

²²Isa guutummaa biyya lafaa gara irraa taa'utu isa uume, warri lafa irra jiraatan isa duratti qorophisa in fakkaatu; inni waaqa akka golgaa in diriirse; akka dunkaana keessa jiraataniis isa in dhaabe*.

²³Inni isa gurguddoota biyyaa wayyitti akka hin galle, abboota firdii biyya lafaa irraas waan tokkotti akka hin lakkaa'amne godhee dha*;

²⁴facaafamuun isaanii utuu hin beekamin, dhaabamuun isaanii utuu hin baramin, hundeen isaaniis utuu lafa hin qabatin, inni achumaan hafuura isaanitti in baafate; isaan achumaan in coollagan, akka habaqiis bubbeedhaan in fuudhaman*.[182]

²⁵Kanaafis, ?Eenyutti ana fakkeessitu? Eenyu wajjinis wal nu qixxeessitu?? jedhe inni qulqulluun.

²⁶Mee ol jedhaatii ija keessaniin ilaalaa! Urjoota kana hundumaa eenyutu uume? Macca isaanii lakkoobsaan eenyutu gad yaasa? Hunduma isaaniis maqaa maqaadhaan in waama, inni humna-qabeessaa fi aango-qabeessa waan ta'eef, isaan keessaa kan dhabamu tokko illee hin jiru*.[183]

²⁷Yaa Yaaqoob, yaa Israa'el, ?Karaan koo Waaqayyo duraa in dhokate, firdiin koos Waaqayyo koo biratti anaaf hin ilaalamne? jettee maaliif dubbatta? Maaliifis komatta?

²⁸Ati hin beeknee ree? Hin dhageenyeesii ree? Waaqayyo, gooftaa bara baraan jiraatuu dha, inni isa guutummaa biyya lafaa uumee dha; inni hin mudhuku, hin dadhabu, hubannaa isaas namni qoree bira hin ga'u*;

²⁹inni warra dadhabaniif humna in kenna, warra aangoo hin qabneefis jabina in kenna;

³⁰ijoollonni in dadhabu, in mudhukus, dargaggoonnis gufatanii in kufu;

³¹warri Waaqayyoon abdiidhaan eeggatan garuu humni isaanii in haareffama; akka joobiraas baalleedhaan ol in ka'u; in fiigu, garuu hin dadhaban, in adeemu, garuu hin mudhukan*.[184]