Macaafa Isaayaas Raajichaa 41:1-29 GAZB1997 - Bible AI

¹Isin warri biyya galaana gidduu keessa jiraattan, yeroo gara koo dhuftan cal jedhaa na dhaggeeffadhaa! Sabnis humna keessan haareffadhaa, as dhi'aadhaatii dubbadhaa! Kottaa walii wajjin firdiidhaaf in dhi'aannaa!

²Qajeelummaadhaan hojjechuudhaaf ba'a-biiftuutii isa dhufe, isa saba lafa irraa hundumaa mootota isaanii wajjin dhidhiitu, isa billaa isaatiin saba lafa irraa awwaara bade godhu, isa iddaa isaatiin akka qilleensa habaqiin fuudhuu isaan bittimsu, eenyutu kaase*?

³Inni isaan in ari'a, ofii isaatii garuu nagaadhaan of irraa bu'ee karaa kanaan dura miilli isaa irra ejjetee hin beekne irra in adeema.

⁴Kun akka ta'u kan godhe, fiixaanis kan baase eenyu? Jalqabuma iyyuu dhaloonni hundinuu akka jiraatan kan godhe eenyu? Ani Waaqayyo isa duraa ti isa booddee tis*.[185]

⁵Biyyoonni galaana qarqara jiran waanan godhe kana arganii in sodaatu, warri andaara lafaa jiranis rom'anii walitti dhi'aachuuf in dhufu;

⁶isaan hundinuu wal in gargaaru, inni tokkos obboleessa isaatiin ?Jabaadhu!? in jedha.

⁷Inni hojii harkaa beeku isa warqee tumu in jajjabeessa, inni buruusaan wal qixxeessu isa waaqa tolfamaa sana irratti warqee baqsuun ?Ba'eessa? jedhee in toosisa; bifni fakkeenyichaa akka hin sochooneef immoo cinqaaraan walitti in qabsiisa*.[186]

⁸Yaa Israa'el, ati garuu garbicha koo ti, yaa Yaaqoob ani si fo'adheera; ati sanyii Abrahaam sanyii fira kootii ti*;

⁹ani andaara lafaatii sin fide, biyya fagoodhaas sin waame, ?Ati garbicha koo ti, ani si fo'adheera, ani si hin tuffanne? nan jedhe.

¹⁰Egaa ani sii wajjin waanan jiruuf hin sodaatin! Ani Waaqayyo kee ti hin na'in! Ani sin jabeessa, ani sin gargaaras; irree qajeelummaa koo isa mirgaatiin ol sin qaba*.[187]

¹¹Kunoo! Warri si hadheessan hundinuu in yeella'u, in salphatus; warri si irratti ka'anis in dhumu malee, waa'ee hin baasan.

¹²Ati warra si irratti ka'an kana yoo barbaadde iyyuu isaan hin argitu, warri si lolan akka waan hin jirree in ta'u.

¹³Ani Waaqayyo gooftaa kee isa harka kee mirgaa qabee ?Hin sodaatin! Ani sin gargaara'o? siin jedhuu dha.

¹⁴Waaqayyo inni si furu, inni qulqulluun kan Israa'el, ?Ani ofii kootii waanan si gargaaruuf, yaa Yaaqoob raammoo nana, yaa Israa'el xinnayyoo nana hin sodaatin!? jedhee dubbateera*.[188]

¹⁵Kunoo! Ani konkolaataa midhaan siribsiisu, isa haaraa ilkaan isaa qara qabu sin godha; ati tulloota irra baatee isaan in caccabsita, gaarotas akka habaqii in goota;

¹⁶ati akka nama midhaan qoorba'uutti qilleensatti ol isaan in darbatta, innis isaan in fudhata, bubbeenis isaan in tamsaasa; ati garuu Waaqayyotti in gammadda, isa qulqulluu kan Israa'eliin of in jajja.

¹⁷Waaqayyo, ?Yommuu warri rakkatoo fi gadadamoonni bishaan barbaadanii dhaban, yommuu arrabni isaanii dheebuudhaan gogu, ani Waaqayyo kadhata isaanii nan dhaga'aaf; ani Waaqayyo inni kan Israa'el isaan hin gatu;

¹⁸ani iddoo gogaa fi ol ka'aa dhoosee isa keessaa bishaan nan yaasa, dachaa keessaa burqoota nan baasa, lafa onaa iddoo ciisa bishaanii nan godha, lafa gogaa keessaas bishaan nan lolaasa*.

¹⁹Gaattiraan, laaftoon, hadheessii fi ejersi, lafa onaa keessatti akka biqilu, lafa duwwaa keessas mukti baalli isaa yeroo hundumaa lalisu, birbirsii fi qaraaroon akka dhaabamu nan godha.

²⁰Ani Waaqayyo humna kootiin kana akkan godhe, ani qulqulluun Israa'el kana akkan uume, namoonni akka argan, akka beekanii fi akka itti yaadanii hubatanis nan godha? jedhe.[189]

²¹Waaqayyo mootiin Yaaqoob, ?Yaa waaqayyolii saba lafa irraa, mee dhimma keessan dhi'eeffadhaa! Wanta ittiin falmattanis himadhaa!

²²Mee as ba'aatii wanta si'achi ta'uuf jiru nutti mul'isaa, nuyi akka qalbifannutti yommuu inni fiixaan ba'us akka hubannutti, isa kanaan dura ta'e, yookiis wanta gara fuula duraatti ta'uuf jiru, nutti himaa!

²³Nuyi waaqayyolii ta'uu keessan akka beeknutti, mee wanta kana booddeedhaan dhufuuf jiru nutti himaa! Eyyee! Nuyi isa arginee naanee akka sodaanutti, mee wanta gaarii yookiis wanta hamaa hojjedhaa kaa!

²⁴Isin homaattuu hin galtan, hojiin keessanis waa'ee hin baasu; namni isin abdatus ciigga'amaa dha*.[190]

²⁵?Ani biyya gara bitaatii nama tokko nan kaase, innis in dhufa; gara ba'a-biiftuutiis tokko nan waame, innis maqaa koo in waammata; inni warra biyya bulchan akka dhoqqee lafatti in dhidhiita; akka namni suphee dha'u miillaan lafatti dhiitee bukeessuus, isaan in godha;

²⁶nuyi kana akka hubannuuf eenyutu duraan dursee wanti kun akka ta'u hime? Nuyi, ?Namichi dhuguma jedhe? akka jennutti eenyutu dur waa'ee kanaa raajii dubbate? Lakkii! Isin keessaa namni tokko illee kana hin beekne, namni tokko illee waa'ee kanaaf raajii hin dubbanne, waa'ee kanaa namni tokko illee isin irraa hin dhageenye;

²⁷ana, inni duraan dursee Xiyooniin, ?Ilaa, kunoo sabni kee dhufaa jira? jedhe, ana inni Yerusaalemiif isa ergaa nagaa baatu erge;

²⁸gara waaqayyolii tolfamoo yommuun ilaalu, isaan keessaa gorsa kan kennu tokko illee hin jiru; yommuun isaan gaafadhus kan anaaf deebisu hin jiru.

²⁹Kunoo! Isaan hundumti isaanii wayyitti hin galan, hojiin isaaniis waa'ee hin baasu, bifni fakkeenyaa isaaniis wanta akkasumaanii ti? jedha*.[191]