Macaafa Isaayaas Raajichaa 60:1-22 GAZB1997 - Bible AI

¹Ifni kee dhufeera, ulfinni Waaqayyoos siif ba'eera, kanaafis ka'ii ibsi!

²Kunoo! Dukkanni lafatti in uffisa, dukkanni limixiinis saba lafa irraa in dhoksa; siif garuu ifni Waaqayyoo in ba'a, ulfinni isaas si irratti in argama*.

³Sabni lafa irraa gara ifa kee, mootonnis gara biiftuu isa siif ba'uu in dhufu*.[287]

⁴Ol jedhii asii fi achi ilaali! Hundumti isaanii walitti qabamanii gara kee in dhufu; ilmaan kee fagoodhaa in dhufu, intaloota kees kaasuutti baatanii gara kee in fidu*;

⁵ati kana yommuu argitu fuulli kee in ifa, onneen kees gammachuu irraa kan ka'e na'ee in dha'ata; qabeenyi galaana keessa jiru hundinuu kan kee in ta'a, badhaadhummaa saba lafa irraas siif in fidu*.

⁶Gaalonni cocolleen danuun, biyya Miidiyaanii fi biyya Eefaatii dhufanii, biyya kee keessa in guutu; namoonni biyya Sheebaatii dhufan hundinuu, warqeedhaa fi ixaana fe'anii in fidu, galata Waaqayyoos in himu*.

⁷Karri bushaayee Qedaar hundinuu siif walitti in qabamu, korbeeyyiin Nabaayyootis dhimma ati barbaaddu irra siif in oolu; isaan hundinuu aarsaa fudhatamoo ta'anii iddoo aarsaa isa kan Waaqayyoo irratti in dhi'eeffamu; Waaqayyo immoo manni ulfina isaatii ulfina akka argatu in godha*.[288]

⁸Warri akka duumessaa, akka gugeewwan mann'ee isaaniitti fiiganii balali'an kun eenyufa'i?

⁹Ilmaan kee warra biyyoota galaana gidduu keessaa Waaqayyoon abdatan, biyya fagoodhaa warra fidan keessaa, markaboonni Tarshiish warra duraa ti; isaan meetii isaanii fi warqee isaanii isaanii wajjin in fidu; kanas maqaa Waaqayyo gooftaa kee isa qulqulluu kan Israa'el isa ulfina siif kenneef jedhanii in godhu*.[289]

¹⁰Waaqayyo, ?Yaa Yerusaalem, warri ormaa kellaa mandara keetii in ijaaru, mootonni isaaniis siif in hojjetu; ani aaree si rukuteen ture, amma garuu siif oo'ee sin maara*;

¹¹sabni lafa irraa badhaadhummaa isaanii gara kee akka fidaniif, mootonni isaaniis tarreedhaan akka ol galaniif, karroonni kee yeroo hundaa banamanii in taa'u, halkanii fi guyyaas hin cufaman*.

¹²Sabni yookiis mootummaan siif hin hojjenne in bada, inni raawwatee in balleeffama;

¹³yommus si Yerusaalemin deebisanii ijaaruuf, mana qulqullummaa koo ittiin miidhagsuuf, mandara koos ulfina-qabeettii gochuuf, birbirsa, muka yeroo hundumaa baalli isaa lalisuu fi qaraaroo caakkaa Liibaanon keessaa in fidu.

¹⁴Ilmaan warra si cunqursaa turanii amma gugguufanii gara kee in dhufu; warri dur si tuffatan hundinuus amma miilla kee jalatti in kufu; isaan, ?Ati mandara Waaqayyoo ti Xiyoon mandara Waaqayyoo isa qulqulluu kan Israa'el? jedhanii si in moggaasu*.[290]

¹⁵?Isa dur namni si irraa goree, si jibbees ture, isa dur namni tokko illee si keessa hin darbine, amma immoo ani bara baraan surra-qabeettii sin godha, dhaloota hundumaafis iddoo gammachuu in taata;

¹⁶ati aannan saba warra kaanii in dhugda, qabeenya moototaas in nyaatta; yommus ani Waaqayyo inni aango-qabeessi kan Yaaqoob isa si fayyisuu fi isa si furu akkan ta'e in beekta*.[291]

¹⁷?Ani qooda sibiila borrajjii, warqee, qooda sibiilaa, meetii, qooda mukaa, sibiila borrajjii, qooda dhagaas, sibiila nan fida; nagaan eegduu kee, qajeelummaanis geggeessituu kee akka ta'u nan godha,

¹⁸si'achi sagaleen humnaan nama irratti ka'uu biyya kee keessatti hin dhaga'amu; miidhaan yookiis balleessaan daarii biyya kee keessatti hin argamu; kelloota mandara kee ?Fayyina?, balbaloota kees ?Galata? jettee in moggaafta*.[292]

¹⁹?Ani Waaqayyo ibsaa bara baraa siif nan ta'a, ulfina kootu ifa kee ta'a malee, si'achi guyyaa biiftuun, halkanis jiini ifa siif hin ta'u;

²⁰aduun kee deebitee hin lixxu, jiini kees ifa ishee hin hir'iftu; ani Waaqayyo ifa bara baraa siif nan ta'a, barri gadda keetiis in raawwatama*.

²¹Yommus sabni kee hundinuu qajeelota in ta'u, biyyichas dhaala bara baraa in godhatu; isaan biqiltuu isa ani dhaabe, isa ani ulfina koo ittiin argisiisuuf harka kootiin hojjedhee dha.

²²Maatiin xinnaan baay'atee kumaatama in ta'a, inni hundumaa irra gad deebi'aanis saba aango-qabeessa in ta'a; ani Waaqayyoo dha; yeroo isaatti kana hundumaa dafee nan raawwadha? jedhe*.[293]