Macaafa Iyoob 14:1-22 GAZB1997 - Bible AI

¹?Nama ta'ee lafa irratti kan dhalate, barri isaa gabaabaa dha, rakkinni isaa immoo baay'ee dha*;

²inni akka daraaraatti ol in ba'a, in coollagas; akka gaaddisaatti in darba, hin turus*;

³kan akkasii kana in ilaaltaa ree? Ana immoo firdiidhaaf of duratti in dhi'eessitaa ree?

⁴Eenyutu wanta qullaa'aa hin ta'in keessaa, wanta qullaa'aa baasuu danda'a? Namni kana danda'u tokko illee hin jiru*.

⁵Barri jireenya namaa muramaa erga ta'ee, lakkoobsi ji'a isaatiis si bira erga jiraatee, akka inni irra darbuu hin dandeenyeef, situ daarii itti godhe*;

⁶akka inni boqotutti, akka nama qacaramee hojjetuuttis bara isaa kanatti akka gammadutti, ati isa dhiisiitii ija kee isa irraa deebisi*![48]

⁷?Mukti yoo murame iyyuu deebi'ee waan latuuf, damee godhachuun isaas waan hin oolleef abdii qaba*;

⁸hiddi isaa lafa keessaa yoo dulloome iyyuu, gufuun isaa lafa keessatti yoo goge iyyuu,

⁹foolii bishaaniitiin in lata, akka biqiltuu haaraas damee in baasa;

¹⁰namni garuu in du'a, in badas; erga hafuurri keessaa yaa'ee, egaa namni eessa jira ree?

¹¹Akkuma kuufamni bishaanii manii isaa keessaa badu, bishaanis yaa'aa isaa keessaa yaa'ee dhumu*,

¹²akkasuma namni in ciisa, deebi'ees hin ka'u; bantiiwwan waaqaa hamma dhabamanitti, namni hin dammaqu; yookiis hirriba isaa keessaa hin kaafamu*.[49]

¹³?Dheekkamsi kee hamma darbutti, iddoo lafa jalaa keessa utuu ana dhoksite, akkan hin argamnes utuu goote, yeroo muramaa laattee utuu na yaadatte, attam gaarii dha!

¹⁴Namni erga du'ee deebi'ee in jiraataa ree? Hamma inni na furu dhufutti, baran dadhabbiidhaan lafa irra jiraadhu hundumaatti isa nan eeggadha;

¹⁵ati hojii harka keetii in yaadda; kanaafis ana in waamta, anis nan owwaadha.

¹⁶Amma tarkaanfii koo in lakkoofta, cubbuu koo immoo hin caqaftuu ree?

¹⁷Irra-dadarbaan koo korojoo keessa buufamee, itti cufamee, mallattoon itti in godhama; ati immoo yakki koo akka hin mul'anne in goota.

¹⁸?Akkuma tulluun caccabee jijjigu, kattaanis iddoo isaatii butatu,

¹⁹akkuma bishaanonni dhagaa qarseessan, bokkaan yandoonis biyyoo lafa irraa dhiqu, atis akkasuma abdii namaa in balleessita;

²⁰ati raawwattee isa in moota, innis in du'a; fuula isaa in geddarta, isas in calaafta.

²¹Ilmaan isaa yoo ulfina argatan, inni hin beeku; yoo isaan gad deebi'anis, inni hin argu;

²²isatti dhukkuba dhagna isaatii duwwaatu dhaga'ama, kanaaf inni ofuma isaa duwwaadhaaf in boo'a? jedhe.