Macaafa Lallabaa 7:1-29 GAZB1997 - Bible AI

¹Urgooftuu gaarii irra, maqaa gaarii wayya; guyyaa dhalatan irra, guyyaa du'an wayya*;

²mana cidhaa dhaquu mannaa, mana gaddaa dhaquu wayya; duuni dhuma nama hundumaa ti, warri jiranis garaa isaaniitti isa in yaadatu;

³kolfuu irra gadduu wayya; fuulli namaa yommuu gaddu garaan namaa in gammada;

⁴garaan warra ogeessaa mana gaddaa jira, garaan warra gowwootaa garuu mana gammachuu jira;

⁵faarfannaa warra gowwootaa dhaggeeffachuu irra, ifata nama ogeessaa dhaggeeffachuu wayya;

⁶kolfi nama gowwaa akka qoraattii xuwwee jalaa xaaxa'uu ti; kunis wanta waa'ee hin baafnee dha.[31]

⁷Wanti doorsisaan argamu nama ogeessa in maraacha, gabbarsuunis amala namaa in balleessa*;

⁸jalqaba gaarii irra, dhuma gaarii wayya; nama of korsu irra, nama obsu wayya;

⁹aariin bobaa gowwootaa jala waan boqotuuf, ati daftee hin aarin![32]

¹⁰?Baroonni darban maaliif baroota ammaa irra wayyu?? jettee hin gaafatin! Gaaffiin akkasii gaaffii nama ogeessaa miti.

¹¹Ogummaan qabeenyaa wajjin gaarii dha; warra lafa irra jiraataniif bu'aa qabdi;

¹²akkuma horiin nama golgu, akkasuma ogummaan nama in golgiti; caalaatti immoo ogummaan jireenya warra ishee argatanii nagaatti in eegdi*.[33]

¹³Wanta Waaqayyo hojjete mee ilaali! Kan inni dabse, eenyutu qajeelchuu danda'a ree*?

¹⁴Namni wanta isa booddeedhaan ta'uuf jiru hin beeku; kanaafis ati bara gaariitti gammadi! Barri hamaan yoo dhufe immoo, Waaqayyo isa kana, isa sanas akka uume yaadadhu*![34]

¹⁵Ani bara jireenya koo isa waa'ee hin baafne kana keessa wanta baay'ee argeera; namni qajeelaan tokko utuma qajeelaa ta'ee jiruu in bade, namni jal'aan tokko immoo utuma jal'aa ta'ee jiruu bara dheeraa in jiraate*;

¹⁶maaliif nama qajeelaa fi nama ogeessa keessa-ba'aa taatee of balleessita*?

¹⁷Maaliif nama jal'aa fi nama gowwaa keessa-ba'aa taatee, yeroo kee malee duuta*?

¹⁸Wanta tokko yommuu qabattu, isa kaanis lafa hin buusin! Namni Waaqayyoon sodaatu, qabaa wanta hundumaa beeka*.[35]

¹⁹Wanta bulchitoonni kudhan mandara tokkoof hin hojjenne, ogummaan nama ogeessa tokkoof hojjetti*;

²⁰haa ta'u iyyuu malee, namni qajeelaan yeroo hundumaa wanta gaarii hojjetu, cubbuus kan hin hojjenne lafa irra hin jiru*.

²¹Si abaaruu hojjetaa keetii haasaa keessa akka hin dhageenyetti, wanta namni dubbatu hunduma isaa yaadaan hin qabin!

²²Atis si'a baay'ee nama akka arrabsite garaan kee iyyuu beeka.[36]

²³Ani ?Wanta kana hundumaa ogummaadhaan qoree ogeessa nan ta'a? jedhee, nan yaade; garuu ogummaan anattii in fagaatte;

²⁴wanta akkas iddoo fagoo jiruu fi wanta baay'ee gad fagoo ta'e, eenyutu barbaadee arguu danda'a?

²⁵Kanaafan ani yaada koo gara beekumsaatti, gara waa qoruutti, gara ogummaa barbaaduutti, gara hundee waan hundumaatti, gara dadhabbii warra gowwootaa beekuutti, gara gowwummaa warra qalbii hin qabne hubachuutti deebise.

²⁶Ani wanta du'a caalaa hadhaa'u nan arge; innis dubartii yaadni ishee akka kiyyoo fi futtaasaa ta'e, harki ishees akka funyoo sibiilaa ta'ee dha; namni Waaqayyo duratti gaarii ta'e ishee jalaa in ba'a; namni cubbamaan garuu isheedhaan in qabama*.[37]

²⁷?Kunoo! Ani wanta kana walitti qabaa isaa argachuudhaaf, tokko tokkoon qoree argeera? jedha lallabichi.

²⁸Wanta ani barbaadaa ture amma illee hin arganne; namoota kuma keessaa nama yaada qajeelaa qabu tokko argadheera, garuu isaan kana hundumaa keessatti dubartii yaada qajeelaa qabdu tokkittii illee hin arganne.

²⁹Waaqayyo nama yaada qajeelaa qabu uume; namoonni immoo yaada baay'ee warra ofii isaaniitii qopheessan duukaa bu'uu in barbaadu. Kunoo, wanta ani qore hundumaa keessatti isa kana duwwaan arge.