Macaafa Lallabaa 8:1-17 GAZB1997 - Bible AI

¹Namni ogeessi hiikaa wanta kanaa beekuu danda'u jiraa? Ogummaan namaa fuula isaa in ibsaaf, nyaara isaas in hiikaaf.

²Ati Waaqayyo duratti mootiidhaaf waan kakatteef, wanta inni si abboomu akka gootu sin gorsa.

³Fuula mootii duraa ariitiidhaan hin adeemin, inni wanta jaallate gochuu waan danda'uuf, dubbii hin taaneefis hin dhaabatin*!

⁴Mootiin aboodhaan waan dubbatuuf, namni, ?Ati maaliif kana goota?? ittiin jedhu hin jiru;

⁵nama abboommii isaa eegutti wanti hamaan hin dhufu; garaan nama ogeessaa yeroo itti waa hojjetanii fi akka itti hojjetan beeka.

⁶Wanti hamaan nama irra ga'ee yoo itti jabaate iyyuu, wanti ta'u hundinuu yeroo itti ta'uu fi akka itti ta'u qaba*;

⁷namni wanta ta'uuf jiru hin beeku, yeroo inni itti ta'uuf jirus eenyutu isatti himuu danda'a*?

⁸Namni hafuurri akka hin yaane abboomuu hin danda'u; akkasumas namni guyyaa du'aa irratti gooftummaa hin qabu; akkuma yeroo lolaatti loltuun gad dhiifamuu hin dandeenye, wanti hamaan warra isatti qabaman gad hin dhiisu.[38]

⁹Ani wanta kana hundumaa argeera; wanta aduu jalatti ta'u hundumaas qoree bira ga'eera; yeroon inni tokko warra kaan irratti mo'ee isaan miidhus jira.

¹⁰Ergasiis warri hamoonni iddoo qulqullaa'aadhaa gad ba'aa, ol galaa turan akka awwaalaman nan arge; naannoon isaan jal'ina keessatti hojjechaa turanis isaan hin yaadatu; kunis wanta waa'ee hin baafnee dha;

¹¹adabni warra wanta hamaa hojjetan irra dafee waan hin geenyeef, garaan ilmaan namootaa guutummaatti wanta hamaa hojjechuutti in jabaata*.

¹²Namni cubbamaan si'a dhibba hamaa hojjetee bara dheeraa yoo jiraate illee, warri Waaqayyoon sodaachaa fuula isaa dura jiraatan isa caalaa gaariitti akka jiran ani beeka.

¹³Namni hamaan garuu Waaqayyoon sodaachaa fuula isaa dura waan hin deddeebineef, bara isaa akka gaaddisaa dheereffachaa hin adeemu*.[39]

¹⁴Wanti waa'ee hin baafne lafa irratti hojjetamu tokko jira; innis, isa wanta namoota qajeelotaaf ta'u warri jal'oonni argatanii, isa warra jal'ootaaf ta'u immoo warri qajeelonni argatanii dha; kunis immoo wanta waa'ee hin baafnee dha*.

¹⁵Namni bara lafa irra jiraatutti nyaatee, dhugee, gammaduu irra kan caalu qannoon waan hin jirreef, ani gammachuu nan jaja; gammachuun kun bara isa Waaqayyo lafa irratti akka namni itti dadhabee hojjetuuf kenneef kana keessatti isa bira kan jiruu dha*.[40]

¹⁶Ani ogummaa qoree baruuf, wanta lafa irratti hojjetamus arguuf yaada koo irra kaa'eera; namni kana qoruu barbaadu iji isaa halkanii fi guyyaa hirriba hin argatu;

¹⁷ergasiis ani wanta Waaqayyo aduu jalatti hojjete hundumaa namni tokko illee hubachuu akka hin dandeenye nan arge; namni hamma fedhe illee itti yaadee yoo qore, hiikaa wanta lafa irratti ta'aa jiruu argachuu hin danda'u; namni ogeessi kana kan beeku yoo of se'e iyyuu, qoree bira ga'uu hin danda'u*.[41]