Macaafa Lallabaa 9:1-18 GAZB1997 - Bible AI

¹Ani wanta kana hundumaa garaatti qabadheera, qoreeras; namoonni qajeelonnii fi ogeeyyiin hojii isaanii wajjin harka Waaqayyoo keessa jiru; wanti isaan eeggatu jaalala ta'ee fi jibba ta'ee isaa namni beekuu hin danda'u.

²Nama hundumaatti isa qajeelaa fi isa jal'aatti, isa gaarii fi isa gadheetti, isa qullaa'aa fi isa qullaa'aa hin ta'initti, isa gaarii fi isa cubbamaatti, isa kakuudhaan dubbii isaa jabeessuu fi isa kakachuu sodaatutti wanta tokkichatu dhufa*.[42]

³Wanta aduu jalatti hojjetamu hundumaa keessaa inni hamaan isa namoonni hundinuu dhuma tokkicha argatanii dha; kanuma irratti iyyuu garaan ilmaan namootaa hamminaan guutuu dha, bara jiraatan hundumaattis maraatummaan garaa isaanii keessa jira; kana booddee immoo in du'u*.

⁴Garuu warra jiraatan gidduu kan jiraatu abdii qaba; leenca du'e irra saree jiru wayya.[43]

⁵Warri jiran akka du'an beeku, warri du'an garuu waan tokko iyyuu hin beekan, gatii dadhabbii isaaniis deebi'anii hin argatan, seenaan isaaniis hin yaadatamu;

⁶jaalalli isaanii fi jibbi isaanii, hinaaffaan isaaniis egaa badeera; wanta aduu jalatti hojjetamu hundumaattiis si'achi qooda tokko illee hin qaban.

⁷Waaqayyo amma hojii kee faara tolaadhaan waan ilaaluuf, egaa ati dhaqii buddeena kee gammachuudhaan nyaadhu, daadhii waynii kees garaa qulqulluudhaan dhugi*!

⁸Yeroo hundaas uffata adii uffadhu, mataa kees dhadhaa ejersaa dibadhu![44]

⁹Bara jireenya kee isa waa'ee hin baafne hundumaa kana keessatti haadha manaa kee ishee jaallattuu wajjin jireenyatti gammadi! Aduu jalatti isa kanatti akka jiraattuuf Waaqayyotu siif kenne; bara jireenya kee isa waa'ee hin baafne hundumaatti wanta ati aduu jalatti itti dadhabdee hojjetteef qoodni kee isa kana*.

¹⁰Wanta harki kee hojjechuu beeku hundumaa humna kee guutuudhaan hojjedhu! Iddoo lafa jalaa lafa dhaquuf jirtu sana, hojjechuun, itti yaadanii waa qopheessuun, beekumsi, ogummaanis hin jiru.[45]

¹¹Ammas aduu jalatti waan tokko nan arge; innis isa fiiganii nama dura darbuu dadhaban, lolanii mo'uu dadhaban, ogeessa ta'anii buddeena dhaban, afchaala ta'anii sooromuu dadhaban, waa hojjechuu utuma beekanii jajamuu dadhabanii dha; isaan kana hundumaattis yeroon tokkichii fi wanti tokkichi in dhufa.

¹²Namni yeroo kamitti maal akka itti dhufu beeku hin jiru; akka qurxummoonni kiyyootti galanii qabamanitti, akka simbirroonni jigoo jala lixanii qabamanittis, akkasuma ilmaan namootaa yeroo hamaa isa dingata isaan irratti lafa dha'uun in qabamu*.[46]

¹³Ammas ani aduu jalatti wanta ogummaa guddaa anatti fakkaatu tokko nan arge;

¹⁴innis, mandarri xinnoon namoonni muraasi keessa jiraatan tokko turte; mootii guddaan tokko dhufee lola itti kaasee ishee marsee, wanta ittiin masaraa ishee yaabanis guddisee naannessee itti in ijaare.

¹⁵Namni hiyyeessi achi keessa jiraatu tokko immoo ogummaa isaatiin mandarattii badiisa in oolcha ture, garuu namichi hiyyeessi kun achi akka jiru namni tokko illee hin yaadanne;

¹⁶kanaafan, ?Ogummaan jabina irra in caalti? jedhe; haa ta'u iyyuu malee, namichi kun hiyyeessa waan ta'eef, ogummaan isaa in tuffatame, dubbii isaas namni dhaga'u hin turre*.[47]

¹⁷Isa namni biyya mo'u gowwoota gidduu dhaabatee iyyu dhaggeeffachuu mannaa, dubbii ogeessotaa gabiitti dhaggeeffachuu wayya;

¹⁸ogummaan mi'a waraanaa irra caalti, garuu namni cubbamaan tokkichi wanta gaggaarii baay'ee in balleessa.