Macaafa Miikiyaas Raajichaa 4:1-13 GAZB1997 - Bible AI

¹Bara booddeetti tulluun manni Waaqayyoo irra jiru, tulloota hundumaa keessaa akka isa caaluutti jabaatee in dhaabata; gaarota hundumaa gara irraatti ol in ka'a; sabni hundinuus gara isaatti in yaa'u.

²Sabni lafa irraas baay'atanii in dhufu; Xiyoon keessaa seerri, Yerusaalem keessaas dubbiin Waaqayyoo waan ba'uuf, ?Karaa isaa akka inni nu barsiisuuf, nus daandii isaa irra akka adeemnuuf, kottaa gara tulluu mana Waaqayyootti, gara mana Waaqayyoo isa kan Yaaqoobitti ol in baanaa!? in jedhu.

³Inni saba baay'ee gidduutti firdii in kenna, saba jajjaboo fagoo jiraataniifis murtoo in godha; isaan billaa isaanii maarashaa eeboo isaaniis isa ittiin muka qeexxa'an in tumsiifatu; egaa sabni sabatti billaa hin luqqifatu, isaan deebi'aniis lola hin baran*.

⁴Garuu isaan adduma addaan muka waynii isaanii jala, harbuu isaanii jalas in taa'u; namni tokko illee isaan hin sodaachisu; isa kana immoo afaan Waaqayyo gooftaa maccaatu dubbate*.[14]

⁵Sabni warri kaan hundinuu adduma addaan maqaa waaqayyolii isaaniitiin in deddeebi'u; nuyi garuu yeroo hundumaa bara baraan maqaa Waaqayyo keenya gooftichaatiin in deddeebina.

⁶Waaqayyo, ?Gaafas ani warra hokkolan walitti nan sassaaba, warra bittimfaman, warra ani hamaa irratti hojjedhes walitti nan qaba*.

⁷Ani warra hokkolan, warra hafanii qusataman, warra achi fagaatanii turanis saba jabaa nan godha; tulluu Xiyoon irrattis, gaafasii jalqabee hamma bara baraatti isaan irratti nan mo'a? jedhee dubbateera*.[15]

⁸Ati immoo yaa riqaa eegduun hoolotaa irra ijaajjuu, yaa tulluu mandara Xiyoon! Akka duriitti mo'uun harka keetti in deebi'a, mootummaan mandara Yerusaalem in dhufa.

⁹Ammas mootiin si keessa hin jiru moo? Ati maaliif guddiftee iyyita? Gorsituun kee badnaan akka dubartii da'uuf jettuu ciniinsuun si argatee*?

¹⁰Yaa mandara Xiyoon ciniinsifadhu, ijoollee kees of keessaa baasi! Isinis ijoolleen ishee amma mandara keessaa in baatu, biyya keessattis bakkee in buufattu; biyya Baabilon in dhaqxu; achitti in ooltu, achitti harka diinota keessanii keessaa, Waaqayyo isin in fura*.[16]

¹¹Amma yeroo kanatti immoo sabni lafa irraa baay'een si irratti walitti in qabamu, ?Isheen haa xurooftu, nus Xiyoon akkas ta'uu ishee arguutti in gammanna? in jedhu.

¹²Garuu isaan yaada Waaqayyoo hin beekan, inni akka bissii oobdii irraatti akka walitti isaan qabes, akeeka isaa hin hubatan.

¹³Ka'aa! Yaa ijoollee Xiyoon, sirbisiisaa! Ani gaanfa keessan sibiila, kottee keessanis sibiila borrajjii nan godha; isin saba baay'ee rukuttanii in hurreessitu, waan isaan saaman Waaqayyoof, badhaadhummaa isaaniis gooftaa guutummaa biyya lafaatiif addaan in baaftu*.[17]